Jisas Pruanka katka ra, ¿Jehova Jisas wal wark kasak dauki baku man sin daukma ki?
1. ¿Jisas Pruan Kupia Kraukanka katka ra dîa muni Jehova Witniska nani ba smalkaia warkka ra kau daukisa?
1 Jehova witin dîa daukaia luki ba ai kupia aiska ni daukisa. Gâd Kingka lâka yamnika kum kum ra luki, Aiseya 9:7 wisa: Jehova, karnika sut bri ba ai latwanka laptika ba ni baha daukbia. Sim baku Ai luhpia tasba ra kan taim, mayunra lâka pain ba dukiara kasak aisan (Jn. 2:13-17; 4:34). Mani bani, Jisas Pruanka katka ra smalki tataukra milian milian, tasba aiska ra trai muni banhwisa Jehova bara Jisas tnata lukaia smalkaia warkka ra kau daukaia. ¿Man sin baha tilara kama ki?
2. ¿Dîa mita wan kupia bukbia naha Kakamuk kati 7 warkka tâ baikaia?
2 Ahkia wina paiwanka yabia: Naha manka ra Jisas Pruanka katka ba upla nani ra paiwaia ba, satadi Kakamuk kati 7 ra tâ krikbia. Baha mita, nawas wina mahka ridi takaia sa wan kupia aiska ni upla nani ra paiwaia dukiara. Kangrigisan nani ba wark karna taki kabia bara trai munbia dîa sip ba kat upla nani ra paiwaia. Kaisa wan taika nani ra, skul pânika, kli wih kaiki uplika nani bara wan kakairika nani ra paiwanka wauhkataya kum mihta ra swiaia, apia kaka jw.org wina sin upla nani ra marikaia.
3. Kakamuk kati bara Lih Wainhka kati ra, ¿nahki smalkaia warkka ba kau daukbia?
3 Tâ baiki smasmalkra: Wan kupia aiska wark takaia ba hilp wan munbia kau smalkaia. Namhpa namhpa lukpara tâ baiki smalki tataukra takaia Kakamuk kati bara Lih Wainhka kati ra, baha kati nani ra sip kama 30 awar ba daukaia. Pamali Mayunra Tihmika ra, apia kaka silp wan stadika daukisa piua ra wan pura suni nahki daukaia sip ba dukiara laki kaikaia sa (S.L 15:22). Wan kupia aiska wark takbia kaka, wala nani sin wan kaiki daukaia want kabia. Smalkaia warkka kau daukaia dukiara, kaina manis ridi takisa kaka, Jisas nahki wark takan ba tnata lukisa (Mk. 6:31-34).
4. Jehova bara Jisas baku wark takbia kaka, ¿dîa yamnika bribia?
4 Jehova bara Jisas wal ai warkka kasak dauki ba natka Jisas Pruanka katka ra yawan nina blîkbia kaka, yamnika ailal bribia. Upla manis ra witnis aisan kabia. Kasak lilia bara wan âuyapah lâka Jehova wina bribia, kan Witin dukia daukisa bara sim piu ra wan walka ra hilp munisa (Ap.St 20:35). Sakuna diara kau tara ba, wan kupia aiska ni wark takbia ba Gâd bara ai luhpia kupia lilia daukbia.