Nu Takan Daukisa

◼ Nahki muni yawan kumi bani aidrubanka nani ra wih lan takaia lukanka bri kaia sip sa ki? (K.smal 31:12.)

Jehova ra, bara Witin wanki aidrubanka nani ra rispik muni ba mita, kau sun waia bara lan wan daukbia ridi kaia wan makabisa. Kau yamni sa taura sirka nani ra iwaia, baku lika ninara bangwi sirka nani ba ra luhpa sirpi bri nani, bara sam taim let bali nani dukyara swibia. Aidrubanka ta krikras kainara, bin daukaika ridi daukaia sa, bin saura walbia apia dukyara. Yawan sut aidrubanka nani ba rispik wal kaikisa kaka, uya bin apu kabia (Smas. 5:1; Pil. 2:4).

Upla raya nani wabia taim, muihni-lakri kum witin nani ra kakaira sa kaka, ai lamara iwaia sip sa. Naha ba witin nani mapara uba yamni kabia, kau pali luhpa sirpi nani bri ba lan takbia dukyara. Ban kra aidrubanka nani ba pamali baku diara raya kum kabia, baha mita nina tanira iwaia uba tingki lukbia. Baku lika, ai luhpia nani nitka mita taki waia nit kabia taim, uya bin daukras kabia (Sins.l 22:​6, 15). Naha pamalika nani ba saitra plis wala ra iwaia apia sa, kan tuktan nani ba bin daukaia sip sa lukbia. Kau pain kabia, aisika apia kaka yaptika bui minit kum latara saki wapnika mangki, apia kaka ai nitka yabi si, kli dimi iwbia.

Asla dadaukra nani ba mayunra watla kum ra ailal ta baikisa. Aidrubanka watla ra kau sun bali, pamali nani ra, bara sam taim let bali nani ra sin plis pain kum saki yabisa. Plis kum saki yabisa taim, bin apu, sins bara kulkan laka ni upla ra aisisa. Diara kum bila kaikras kan takisa kaka, ai sinska yamni ni wapnika mangkisa. Bara tuktan kum wala nani aman kaiki walaia swiras kaka, wilinkira help muni bangwisa.

Kaiki baku, aidrubanka ra wi nani sut ba, Jehova wina bara tasba ra auyapah bara wapni laka bri balaia want ba dahra lan takaia pliska ba yamni kabia daukaia sip sa (Hibru 10:​24, 25).