Ta Bri Daknika Wauhkataya Blikan ba

Spirit laka ra taya nani:

Yawan ba rait kulkanka tara brisa, kan tasba aiska Papaskra Jehova nina ba twilkisa! Ai nina ba ban sa, tiwras, bara nina wala kum sim sat apu sa. Jehova sika Ai nina wankan yawan twilki kabia dukyara, bara 1931 manka wina yawan baman baha Nina twilkisa (Ais. 43:10). Bara wan swira apukira yawan kumi bani Jehova Witniska kum sa marikisa.

Debil ba Gâd nina sauhkaia trai kaikisa. Ai karnika wal, Nisan nani ba, Jehova nina bahki kulkisa. Babilun Tara, tasba aiskara rilidian kuninkira nani sut ba, Gâd nina misbara kaikisa, bara Baibil lakanka ailal wina sin diki sakan sa. Kuna Jisas lika ai Aisa nina ba kau purara sunan, kan pura sunra ai nina blablikra nani ra lan daukan ba baha dukyara aisi ta krikisa. Witin win: “Baha mita, man nani naku puram suns: ‘Yawan Aisa kasbrika purara sma ba, ninam ba hulikira kulkan kabia’ ” (Mat. 6:9). Ba’ wina ai Aisa ra pura suni naku win: “Upla nani ra man ninam marikri” (Jan 17:​6, Lâ Raya Wauhkataya, 1986). Jisas baku, yawan sin Jehova nina ba tasba aiskara ban brihwi kaia lukisa.

2009 manka tikska ba, ‘Sturi Yamni ba Takaskras Upla ra Witnis Aisi Kap’ wi ba smalkaia warkka kau dauki kaia wan kupia bukan (W.n 20:24). Param sa, mani luan smalkaia warkka ba Jehova mita uba yamni munan sa. Jehova nina prana kulkanka ba dukyara tasba aiskara ailal pali smalkan sa. Smalki tataukra 7.313.173 numbika pawan ba, upla kupia pain bri, bara naiwa pyua trabilka nani wapnika mangkaia pliki nani sut ra lan daukaia dukyara bakahnu smalkan. Jisas Pruan Kupia Kraukanka yua ra upla 18.168.323 asla takan ba, marikisa naha tasba tnatka saura tnata kau balras ba ra, kau upla milian bara sa Jehova helpka pliki.

Jehova Gâd wan bri kaka, yawan smalki pliska nani ra tnatka sat sat ra upla kau pliki, ban King laka sturka yamni nani ba wan kupia aiska smalki kabia (Mat. 24:14; Mark 13:10). Utla utla ra, yabal nani ra, wauhtaya ulbi, teleponku, bara ban wina smalki kabia sin, yawan sip ba kat Jehova nina, bara Witin dia daukaia luki ba sin upla nani ra lan daukaia trai munbia.

Yawan diara ailal tawan kasak nu sa, tisku pali Jehova ai nina huli daukan kabia (Isi. 36:23). Gâd nina sauhki nani ba ai bila prakbia yua isti pali aula sa. Jehova ra mayuni uplika mapara baha yua ba misar lilia kabia, kan Jehova nina smalki, King Aimakaia Raitka bri ba ra purara buki bangwisa.

2009 manka ra “Aihwaki Bas!” Aidrubanka Kau Tara, bara Kuntri Ailal Aidrubanka Tara nani tasba piska ailal ra daukan ba, latan marikisa Jehova mita ai taunka ra latwan laka ni main kaikisa. Baha aidrubanka nani ba smalkaia warkka tilara diara tara kum sa, kan Jehova yua aula ba dukyara aihwaki kaia nit ba wan kupia bukan (Mark 13:37; 1 Tes. 5:​1, 2, 4).

Kasak pali, Jehova Gâd ba yawan wal ai kupia pain brisa; wan kupia ra yan auyapah laka ni bangkisa. Witin mita twi sangni nani ra wankan ris brisa, li lamni tingnika nani ra wan brihwisa (Lawana 23:​1, 2; 100:​2, 5).

Naha kati aula nani ra, King laka warkka ra kau karna wark takisma ba ra, Jehova kupia kumi laka ba ban man nani wal kabia bila kaikisa.

Wan latwanka laka ni, tasba aiska muihni-lakri nani dukyara,

Kristian pamnika nani,

Jehova Witniska nani Ta Bri Daknika ba