Upla ba wan kaiki dia lan takbia ki?

1. Disaipel nani Jisas ra kaiki, dia lan taki bangwan ki?

¹ Jisas win: “Twilkaika puramra sunisna ba man nani bris, bara yang wina lan taks.” (Mat. 11:29.) Param sa, turi baman aisi taukras kan, witin dia smalki kan ba daukan. Disaipel nani Jisas ra kaiki dia lan takan sapa luki kaiks. Witin upla ra latwan kaiki kan, ai kupia swapni, bara kupia pain (Mat. 8:1-3; Mark 6:30-34). Rait aihwa upla bauikira kan (Jan 13:2-5). Disaipelka nani, smalkaia warkka ra yula kahbi kan taim, Jisas ba upla kum wark tatakra bara takaskras tanka kasak pain smalki uplika baku kaikan (Luk 8:1; 21:37, 38). Smalkaia warkka ra sa taim, upla ba wan kaiki dia lukisa ki?

2. Nahki upla kupia nikbisa wan kwalka dimra bara wan daukanka pain nani ba?

² Watla dawan. Wan kwalka dimra yamni ba, wan daukanka pain, bara upla ra rait aihwa luki ba, watla dawanka ra kasak kupia nikbia (2 Kor. 6:3; Pil. 1:27). Witin nani nu takisa yawan Baibil ba ban yus munisa. Baku sin witin turi aisi pyua ra yawan rispik laka ni walisa kaka, pain ai dara walbia. Amya tiwbia ra baha daukanka pain daukisma kaka, upla ba Gâd Kingka laka sturka ba walaia wilin kabia.

3. Dia tnatka pain ra wan muihni lakri nani ra ta baikbia ki?

³ Muihni lakri nani. Muihni lakri nani ra sin ta baiki ba dukyara luks. Smalkaia warkka wan kupia aiska ni dauki ba tawan witin nani sin kaiki daukaia want kabia. Ayan ba ayan wal mala daukisa, sin baku yawan dia aisaia ba pain ridi takisa kaka wala nani ra sin kupia nikbia smalkaia warkka ra sim sat daukaia (Sins.l 27:17, Testament Almuk, 1992). Walan dauki uplika nina, diriksanka ulbi brih bara pat wih kaiki ba, kaiki wala nani sin baku daukaia want kabia. Smalkaia warkka ba pain pali daukisa kaka, wan muihni lakri nani ra tnatka pain ra kasak ta baikisa (2 Tim. 4:5).

4. Dia muni wan daukanka pain sapa pyua kum kum ra laki kaikaia sa?

⁴ Dia muni laki kaikras pyua kum kum ra dia daukisma bara aisisma ba, wala nani ra tnatka pain ra ta baikisma sapa? Wan daukanka pain mariki ba Jehova yamni kaikbia bara apastil Pâl ai dara walan baku wan dara walbia, witin param aisan: “Baku bamna, yang daukisna ba baku dauki bas, yang mita Kraist dia daukan ba kat daukisna ba baku.” (1 Kor. 11:1.)