“Sinska laka ba ai daukanka nani bak latan marikisa”
1. Upla kum kum nani ba wan warkka dukyara dia lukisa?
1 Pyua kum kum ra smalkaia warkka ra sa taim watla dawanka mita bila karna nani wan mapara aisisa. Bankra, upla nani ba radiu, tilivisan bara piriudiku bak Jehova Witniska nani mapara saura aisan walan, baha mita aihka wan kaikisa, apia kaka Jehova Witniska nani ra pain kakaira apia sa. Bara plis kum kum ra yawan ba “rilidian kuninkira” wan wisa. Baku kaka, yawan dia daukbia ki?
2. Wan dahra saura aisi kaka, dia help wan munbia wan spiritka ba mayara iwbia apia?
2 Wan spiritka laka ba dutki bri kaia. Jisas bara pas kristianka nani mapara sin kasak aisan, baku sin, aihka kaiki bangwata (W.n 28:22). Sakuna, baha wisi witin nani smalkaia dukyara ai swira briras kan. Kau ni, Jisas naku aisata: “Sinska laka ba ai daukanka nani bak latan marikisa” (Mat. 11:18, 19). Bara ban ai kupia aiska ni ai Aisa kupia laka daukan. Baku sin witin kasak luki kan sturi yamni nani ba tanka kasak pliki uplika mapara param kabia. Bamna Gâd luhpia pali ra munan baku yawan ra sin wan munbia lukisa kaka, help wan munbia wan spiritka ba mayara iwbia apia.
3. Wan mapara bui, apia kaka wan dahra saura aisi kabia sin, dia muni yawan sirang iwi bangwaia apia sa ki?
3 Jisas win tasba uplika mita witin ra misbara kaikan baku yawan ra sin misbara wan kaikbia (Jan 15:18-20). Bahamna, upla wan mapara bui, apia kaka wan dahra saura aisi kabia sin sibrin wan dingkras sa. Kan yawan pat nu sa tnata yua nani ba dan taki auya bara Setan kau ai kupia baiwanka ra daukbia baha dukya nani ba kau kaiki kabia (Par.m 12:12). Uba lilia wan daukisa tanka param kaikaia, Setan tasbaia na tisku pali dan apu kabia.
4. Upla nani mita bila karna ni wan aisabia kaka yawan dia daukbia ki?
4 Ansika pain kum yabaia. Upla kum bila karna ni wan aisabia kaka yawan pyu bani ra swapni bara praut apu laka wal aisaia sa (Sins.l 15:1; Kol. 4:5, 6). Uplika ba param aisan sapa kaiki bara sanska kum maikbia kaka makabi wals dia muni baku lukisa, apia kaka waia sip sa Jehova Witniska nani dukyara naiwa upla manis ba tanka uba nu apu sa. Rispik laka ni pana aisabia kaka uplika ba yawan dukyara ta iwan kabia, bara kli Jehova Witniska kum ai watla ra wabia taim walaia wilin kabia. Sakuna uplika ba uba praut takan sa kaka aitani kabia rispik laka ni mahka waia. Yawan kasak lukaia sip sa upla ba nahki wan kaikbia kra, Jehova mapara wan warkka dauki ba witin tara kaikisa (Ais. 52:7).