Nahki muni marit waitna apia kaka marit mairin lalukra apia ba help munaia?
1. Ya nani sin want sa muihni lakri nani ai maritka lalukra apia ba Gâd kupia laka daukbia?
1 Marit waitna apia kaka marit mairin lalukra apia ba kangrigisankam tila ra bara sa ki? Bara sa kaka, ani kristianka ai maritka lalukra apia bri ba want sa ai maritka ba mayunra kasak ba ra dimbia. Sakuna witin nani baman baha want apia sa. Kangrigisan sut ba Gâd brinka bri ba baku “want sa, upla sut ba swaki sakan kabia, kasak tanka ba sin witin nani kakaira taki bangwbia” (1 Tim. 2:4). Nahki muni kangrigisan ra marit waitna apia kaka marit mairin lalukra apia ba ra help munaia sip sa?
2. Marit nani lalukra apia ba ra tanka brisa kaka, nahki witin nani ra help munbia ki?
2 Pas ba, yawan marit nani lalukra apia ba ai lukanka ra dia bri ba tanka briaia sa. Marit nani lalukra apia ailal ba ai pamalika ra latwan kaikisa, baku sin trai munisa aisa kum apia kaka yapti kum pain kaia, ban kra witin nani dia luki ba yawan luki ba wal sat wala sa. Bara marit nani lalukra apia kum kum ba Jehova Witniska nani dukyara uya nu apu sa, ban kra ai pânika nani Jehova Witniska nani dukyara saura aisan apia kaka pain kaikras ba dukyara baman walan sa. Marit nani lalukra apia kum kum ba uya pain kaikras sa ai maritka nani ba ai pamalika aikuki kaia dukyara ai taimka yus muni kan ba nanara “rilidian” ra mangkbia. Sakuna yawan witin nani ra tanka brisa kaka, rispik laka bara latwan laka wal kaikbia, bara witin nani aikuki aisi kabia taim wan srînhka bribia apia (Sins.l 16:20-23).
3. Tnatka kau pain ba marit nani lalukra apia kupia alkaia dukyara, ani sa ki?
3 Uplika ra lukaia. Tnatka kau pain ba marit nani lalukra apia kupia alkaia dukyara, pas ba wan daukanka pain marikaia sa, Baibil tanka smalki wina lika apia (1 Pi. 3:1, 2). Yawan marit nani lalukra apia ba ra ban lukaia sa. Kristian mairin nani ba marit mairin lalukra apia nani ra lukaia sip sa, bara kristian waitna nani ba marit waitna lalukra apia nani ra lukaia sa. Nahki muni?
4. Nahki tnatka ra yawan marikaia sip sa marit nani lalukra apia ba ra lukisa?
4 Yawan marit waitna apia kaka marit mairin wal kau kakaira takras sa kaka, dia daukaia want ba pas maritka nani wal aisaia sa. Bara marit lalukra apia ba yawan wal aisan taim uya pain ai dara walras kan kaka, aihka lukaia apia sa. Ban kra yawan witin dukyara luki ba tawan witin ai kupia lakaia sip sa bara Jehova Witniska nani ra pain kaikaia sip sa (Rom 12:20). Sampla baku, kristian kum kum ba marit nani lalukra apia bara ai pamalika sut ra paiwisa ai watla ra wih plun kum piaia. Baku witin nani wal kakaira takisa bara marit lalukra apia ba saura ai dara wali kan kaka baha tikaia sip sa. Bara kristian nani ba marit lalukra apia dia aisaia want ba dukyara aisisa, Baibil dukyara baman lika apia. Baha wina, aisi auya taim Baibil dukyara mahka aisisa. Ban kra marit lalukra apia ba kangrigisan uplika nani ra kakaira takbia taim asla aidrubanka nani ra wabia bara kaikbia ai maritka dia baha ra lan taki ba. Sakuna marit lalukra apia ba tanka kasak ba lan takaia want apia sa kaka, witin ai maritka ra ta baiki ba uba pain daukisa yawan wiaia sip sa.
5. Kangrigisan almukka nani ba dia daukaia sip sa ki?
5 Kangrigisan almukka nani ba marit nani lalukra apia ba ra help munaia sa, bara ridi kaia sa witin nani ra smalkaia. Kainara, marit lalukra apia kum Baibil stadika kum briaia want apia kan, sakuna siknis aspital ra kabia pyua ra Baibil wina maisanihkanka kum yabia kaka ban kra walbia. Pamali tila ra upla kum Jehova Witniska apia sa, bara witin nani trabil tara kum wauhwisa, sampla baku, ai pamalika kum pruan sa, kangrigisan almukka nani ba pamalika ra maisanihkisa pyua ra, marit lalukra apia ba ra paiwaia sip sa Baibil wina maisanihkanka kum walaia.
6. Dia muni muihni lakri maritka nani lalukra apia ba ra help munaia sa ki?
6 Kristian marit nani ba ai maîa lalukra apia ba Jehova Witniska takbia kaka lilia kabia! Baku sin, Jehova, ai insalka nani, bara kangrigisan aiska sut lilia pali kabia (Luk 15:7, 10). Bara marit lalukra apia ba Gâd kupia laka daukaia want apia kabia sin, yawan ban lilia kaia sa, kan wan warkka ba Jehova pain kaikisa, bara “witin brin daukras upla kumi kra tanis tiwbia, kuna upla sut ai daukanka saura wina ai kupia lakbia” (2 Pi. 3:9).
[Wahya 6 Lilkika ba]
Tnatka kau pain ba marit nani lalukra apia kupia alkaia dukyara, pas ba wan daukanka pain marikaia sa, Baibil tanka smalki wina lika apia