Wark kum liliaka tara wanki ba
1. Spirit laka tanka ra, dia sat sikniska nani naiwa rakisa ki?
1 Patitara uplika nani ba, siknis nani ra raki kan kaikan taim uba lilia takan (Luk 5:24-26). Naiwa pyua ra, yawan upla sut Jehova ra kakaira takbia dukyara help munaia ba lilia tara wankisa (Par.m 22:1, 2, 17). Uba lilia wan daukisa aisi kaikaia nahki Gâd Bila bara spirit hulikira karnika mita upla rayaka kumi bani chens muni sa! Sakuna Baibil stadika kum pawi auya ba ra ta baikaia, kau liliaka tara wankisa.
2. Tanka kasak upla ra smalkisa taim dia liliaka tara yawan briaia sip sa ki?
2 Ani ba Gâd nina sa ki? Dia muni pât wauhwanka nani ba yaban takisa ki? Gâd Kingka laka ba upla nani dukyara dia daukbia ki? Baha sat makabi walanka ansika yabaia wan brinka pali sa. Sakuna, diara sut purkara stadi tatakra ba tanka kasak lan taki, bara nahki lilia ai dara wali ba kaikuya taim kau lilia wan daukisa (Sins.l 15:23; Luk 24:32). Baku sin, stadi tatakra ba pawi auya ba ra, Gâd nina yus munisa, ai kwalka dimra ba sat wala sa, daukanka saura bri kan ba swisa bara upla nani ra smalkisa. Bara naha uplika ba Jehova ra ai rayaka yabi, aihtabi takbia kaka, wan muihni lakri kum takisa bara asla wark daukisa. Baha sut dauki ba mita liliaka tara wankisa (1 Tes. 2:19, 20).
3. Baibil stadika kum pliki sakaia dukyara, dia tnatka nani help wan munbia ki?
3 Help munaia sip sma ki? Naha warkka liliaka tara wanki ba tilara wark takaia want sma kaka, Jehova ra makas Baibil stadika kum daukaia sanska maikbia, bara dia makabram ba dukyara karna wark taks (1 Jan 5:14). Ahkia bara anira upla nani pliki sakaia sip ba pyua ra wih smalks. Sip kaka, Baibil stadika kum yabaia want sma ba wis (Smas. 11:6). Uplika ba walaia ai brinka kan kaka, tanka kasak ma ba mangki swiram ba, pakaia dukyara kli wih kaiks (1 Kor. 3:6-9).
4. Dia muni aihni pali Baibil stadika kum plikaia sa ki?
4 Kau upla ailal bara sa tanka kasak ba nu takaia brinka bri sa, sin plun kum apia kaka, li diranka nitka bri ba baku. Bara ya baha uplika nani ra spirit pata ba yabia ki? (Mat. 5:3, 6). Insla dakaia pyua kau tnata aimakras ba ra, kaisa smalkaia bara disaipel daukaia warkka ba dan takbia dukyara, wilinkira help munaia (Ais. 6:8).