Stadi Taki Uplika Kupia Alks
1. Dia muni trai munaia sa stadi taki uplika kupia ra, Baibil tanka latwan kaikbia daukaia?
1 Yawan Baibil stadika kum ta brisa taim, dia help wan munbia upla kupia alki, Jehova warkka daukaia nikbia? Yawan wark dauki ba ma pain krikaia want sa kaka, trai munaia sa daukaia stadi taki uplika ba Baibil tanka ba latwan kaikbia. Baha ba ai kupia nikbaisa (K.smal 6:5; Sins.l 4:23; 1 Kor. 9:26). Sakuna, nahki muni daukbia?
2. Pain ridi takaia wisi, pura sunra ba nahki help wan munisa?
2 Ridi Takaia Wisi Puram Suns. Jehova mita sika stadi taki uplika kupia ra ma ba yan pawisa bamna, aitani sa yawan stadika dukyara ridi takras kainara, wan pura suni stadi taki uplika pali, bara ai nitka nani dukyara sin makabaia (1 Kor. 3:6; Jems 1:5). Baha pura sunra ba help wan munbia Jehova kupia laka “tanka kaikaia” ba uplika kupia ra nahki dingkbia sapa kaikaia (Kol. 1:9, 10).
3. Stadi taki uplika ra luki, nahki ridi takaia sip sa?
3 Uplika ra Luki Kais. Jisas nu kan pain smalkaia dukyara wali nani ra lukaia sa. Aima wal ra pan, Jisas ra naku makabi walan: “Dia daukamna kaka raya ban kaia laka ba brimna ki?”. Bara aima wal sut ra, sat wala wala ansa munan (Luk 10:25; 18:18). Yawan ridi takisa pyua ra, stadi taki uplika ra luki kaia sa. Ani tikska witin wal aisi kaikbia? Dia pitka kat tanka laki kaikbia? Dia mapara ai tanka briaia, apia kaka kasak lukaia karna munbia ki? Dia dia wan makabi walbia kra kaina manas luki ridi takisa kaka, pain ansa munaia ridi kabia.
4. Pain ridi takaia ba tilara dia dimisa?
4 Man sin Tanka ba Laki Kais. Pyu luan ra yawan aima an tanka ba pat stadi takan kabia kra sin, stadi taki uplika ba wal lika aima pas kabia. Baha taka mita, ai kupia alkaia want sa kaka, stadika kumi bani ba dukyara pain ridi takaia nit pali sa. Tanka ba sika, stadi taki uplika ra dia witin stadi takbia yawan wi ba, yawan sin stadi takaia sa. Ulbanka wihki tikska nani pain laki kaikaia sa. Bara stadi taki uplika ra aman luki kaiki, bapanka kau tara nani sin saki mark munaia sa (Rom 2:21, 22).
5. Nahki muni yawan Jehova baku daukisa ki?
5 Baibil stadi tatakra kumi bani pawanka ba ra Jehova uba lukisa (2 Pita 3:9). Yawan stadika kumi bani dukyara ridi takaia trai munisa kaka, Jehova baku uba luki ba mariki kabia.