Kupiam krauks taura smasmalkra kapram pyua ra!
1. Muihni lakri ailal dia blisinka brin sa, sakuna witin nani dia daukan sa?
1 Mani ailal luan ba ra, muihni lakri tausin tausin Gâd kingka laka “sturka yamni” nani ba pyu aiska smalki tataukra nani baku smalkan (Ap St. 5:42). Sakuna, muihni lakri ailal trabil bri kan ba mita swih bangwan. Man taura smasmalkra kum kapram kaka, kli baku takaia dukyara rayakam bara taimkam ba sin pat laki kaikram sa?
2. Taura smasmalkra warkka swin nani ba, dia muni ai taimka bara ai rayaka laki kaikaia nit sa ki?
2 Rayaka ba chens takisa. Trabil kum ba mita taura smasmalkra warkka swiram kaka, ban kra nanara baha trabilka apu sma. Sampla baku, 90 awar daukaia sip daukras mai muni kan ba mita taura smasmalkra warkka ba swiram kaka, ban kra nanara 70 awar nani lika daukaia sip sma! Pamalikam main kaikaia ba tawan, apia kaka wark kum bri kapram ba mita swiram kaka, ban kra nanara baha trabilka nani apu sma. Kristian mairin kum siknis kan ba mita smalkaia warkka ba swin, sakuna 89 mani bri kan taim kli alkan. Witin pat mani kum alkan kan aspital wina takan, bara ai wîna tara mapara pain takan kan, baha mita kli taura smasmalkra baku takan.
3. Upla kum taura smasmalkra baku takbia dukyara pamali sut dia daukaia sip sa?
3 Ban kra taura smasmalkra kaia sip apia sma, sakuna pamalikam tilara upla kum ai aisika apia kaka ai yaptika pat almuk takan ba ra main kaikaia tawan taura smasmalkra warkka ba swin (1 Ti. 5:4, 8). Baku sa kaka, man bara pamalikam kum witin ra help munaia sip sa? Dia muni man nani pamali baku baha trabilka nani laki kaikras sma ki? (S.L 15:22.) Pamali sut upla kum taura smasmalkra takbia dukyara ta baikisa kaka, sut baha warkka ba dauki ba pitka baku sa.
4. Naiwa pyua ra taura smasmalkra takaia sip apia sma kaka, dia daukaia sip sma ki?
4 Nawas taura smasmalkra kaia sip apia sma kaka, sari kapara. Kan baha brinka brisma ba Jehova kaiki lilia ai dara walisa (2 Ko. 8:12). Bara taura smasmalkra warkka ra dia lan takram ba yus muns. Baku sin, baha brinka brisma ba puram sunra bak Jehova ra wis, bara sanska nani ba yus muns kli baku daukaia dukyara (1 Jn. 5:14). Ban kra, naika pyua ra Jehova man ra “sans tara pain kum” maikbia bara yu kum taura smasmalkra baku takma (1 Ko. 16:9).