Ta Bri Daknika Wauhkataya Blikan ba

Spirit laka ra muihni lakri nani:

Yawan pyua ba uba aihka pranakira sa, baku sin uba lilia wan dara walisa! Yawan uba lilia wan daukisa upla “kumi baku” man nani aikuki wark takaia. Yawan upla sut ra Jehova tanka smalkisa (Sof. 3:9; Jn. 14:12).

Yawan liliakira Jehova ra mayuni kabia sin, wan trabilka nani ban brisa. Smalkaia warkka ba naha mani luan ra, muihni lakri ailal tasba nikbanka, lisamra tara, prari, bara trabil sat wala nani sin luan (Mt. 24:7). Kristian ailal ba yu bani ai sikniska nani mapara aiklabisa, bara kau almuk sin takisa. Yawan sut “pât wahwaia” trabilka brisa (Mt. 24:8). Baku sin, kuntri ailal ra, Armenia, Corea del Sur bara Eritrea ra sin, muihni lakri nani ai kasakka lukan laka mita silak watla ra mangkan sa (Mt. 24:9).

Dia ba yawan ra help wan munan sa liliakira naha trabilka nani pura luaia? Naha mani 2010 tikska ba ansika wankisa: ‘Latwan laka diara sut ba twilkisa. Latwan laka ba pruras, ban raya iwisa’ (1 Ko. 13:7, 8). Baku sin, yawan pana pana latwan laka bri ba mita asla wan daukisa, bara Jehova ra latwan kaiki ba mita sin help wan munisa ban bapi buaia.

Kristian kuninkira nani ba ta iwisa yawan smalki ba, baku sin kli kli upla ra wih kaiki ba mita. Upla kum kum wan smalkanka nani pain kaikras, sakuna naku aisan sa: “Yang nani daukaia sna warkka ba man nani daukisma”. Dia Jehova Witniska nani ra help munisa yu bani smalkaia? Latwan laka ba mita. Jehova brin daukras baku, yawan sin want apia sa upla kumi tanis tiwbia (2 Pi. 3:9). Mani luan ra smalki tataukra 7.508.050 bara kan, baha pawanka raya wan marikisa yawan sut want sa upla sut ai saurka wina ai kupia lakbia. Rilidian wala bara sa ki upla wala nani ra wih latwan laka mita help muni ba?

Naha dahra prapit Aiseya aisanka nahki tnatka ra aimaki ba wan kupia bukisa: “Mani nani kau lui wabia ba ningkara, Dawan ra pura sunaia watla ilka ba lika, tara pali kabia. Il wala nani sut wal kau purara kabia, bara upla sâtka nani sut baha ra aidrubi bangwi kabia” (Ais. 2:2-4). Jehova watla ra upla aidrubi ba tilara smalkaia warkka mani luan ra upla 294.368 tahbi daukan nani ba bara sa, yawan liliakira yamni balan bila yabisa. Bara yawan witin nani ra latwan kaiki ba mita help munbia Setan traika kaikanka nani mapara buaia (1 Pi. 5:8, 9).

Kakamuk kati, 2010 manka, tiusdi 30 yua ra upla 18.706.895 Jisas Pruan Kupia Kraukanka ra wih bangwan. Naha pawanka raya ba wan marikisa kau upla milian milian bara sa yawan aikuki Jehova ra mayunaia sip sa. Jehova upla saurakira nani ra kau sauhki tikras ba mita yawan lilia sa. Baha pyua kau balras bara, latwan laka ba help wan munisa ban bapi buaia (2 Tes. 3:5).

Tasba aiska ra Asla Aidrubanka Kau Tara nani “Jehova lamara ban kaia” nina bri kan ba, help wan munan Jehova wal kau asla kaia dukyara. Baku sin, lawana aîulbra kum naku win: “Yamni pali sa baha uplika bangwi ba, baha Gâdka lika Jehova sa!” (Law. 144:15, Salmo Lawana Nani). Yawan kasak lukisa trabil saura balbia sin, Jehova wan lamara sa, baha mita sia bribia apia (Law. 23:4). Tisku pali, Jehova ai Luhpia bak “Debil warkka ba sut apu” daukbia (1 Jn. 3:8). Baha pyua ba mahka balbia want sa! Sakuna, kau balras ba ra yawan wark ailal daukaia brisa (1 Ko. 15:58).

Muihni lakri nani kasak lukaia sip sma yawan wan pura sunra “bani ra” man nani dukyamra makabisa (Ro. 1:9). Pliskam pali, “Gâd latwanka laka ra ban bas, bara bila kaiki bas wan Dawan Jisas Kraist mita ai kupia pihni laka ra, raya ban kaia laka ba wankbia” (Jud. 21).

Muihni lakri nani latwan mai kaiki bangwisna!

Muihkam lamkra nani,

Jehova Witniska nani Ta Bri Daknika ba