Jisas Pruan Kupia Kraukanka paiwanka ba Lih Wainhka kati 2 wina upla ra yabia
1. Ahkia Jisas Pruan Kupia Kraukanka paiwanka nani upla ra yabia, bara dia muni naha dauki ba yamni pali sa?
1 Lih Wainhka kati 2 wina 17 ba kat, Jisas Pruan Kupia Kraukanka paiwanka nani upla ra yabia. Mani luan nani ra, upla ailal baha pyua ra aidrubi bangwan. Sampla baku, Jisas Pruan Kupia Kraukanka pyua ra mairin kum Betel apiska ra wini win: “Bisiura balri bara waitla durka un ra wauhkataya kum bara kan sakri. Ai paiwisma ba ra waia want sna, sakuna dia awarka kabia sapa nu apu”. Bara Betel apiska ra wark taki kristian waitna ba mairka ra win wauhkataya bila ra awarka ba anira ulban kan. Mairka ba naku aisi, pramis kum daukan: “Naha tihmia, Jisas Pruan Kupia Kraukanka ra wamna!”
2. Paiwanka nani yabi kabia pyua ra dia wibia ki?
2 Nahki daukbia ki? Smalkaia pliska ba uba tara ba mita, wan aisanka nani kunhku daukaia sa. Sip sa naku wiaia: “Naksa. Yang naha paiwanka na maikaia want sna. Naha kulkanka yua ba tasba aiska ra Lih Wainhka kati, sandi yua 17 ra daukan kabia. [Wauhkataya ba yas.] Baha yua ra Jisas Pruanka yua kupia kraukisa. Baku sin, Baibil wina smalkanka kum mana luha yabia, bara Jisas atki wan sakan ba tanka marikbia. Naha paiwanka ra dairiksanka bara awarka ulban sa.”
3. Nahki tnatka ra upla ailal ra paiwaia sip sa ki?
3 Kangrigisankam smalkaia pliska bri ba tara sa kaka, almuk nani ba wiaia sip sa paiwanka nani ba upla apu watla nani ra swiaia. Baku sin, upla kli wih kaikisma nani ra, pamalikam ra, man wal wark taki uplika nani ra, apia kaka, man wal skul dimi pânika nani ra, bara upla wala kakairikam sin yabaia sip sma. Bara wik tnata yua nani ra paiwanka nani yabi kama taim, sanska bara sa kaka wauhkataya nani sin yas. Lih Wainhka kati ra ta baiki smasmalkra baku takaia sip sma, naha paiwanka nani yabaia warkka ba ta baikaia?
4. Dia muni yawan want sa upla nani ba Jisas Pruan Kupia Kraukanka yua ra wabia?
4 Jisas Pruan Kupia Kraukanka yua ra wabia nani ba kasak diara ailal lan takbia! Witin nani ba Jehova latwanka laka tara bri ba dukyara walbia bara nahki atki wan sakan ba dukyara sin (Jn. 3:16). Witin nani sin lan takbia nahki Gâd Kingka laka ba upla nani ra help munbia (Lk. 22:29). Baku sin, paiwan uplika nani ba Baibil wina stadi takaia want sa kaka, kristian waitna nani witin nani ra plis yaban ba ra makabaia sip sa. Yawan wan brinka sa upla ailal Jisas Pruan Kupia Kraukanka yua ra wabia!