Watla dawanka ra hilp muns tânka briaia

1. ¿Ani natka kau pain sa smalkaia warkka ra?

¹ ¿Ani natka ba kau pain sa smalkaia warkka daukaia dukiara: natka karna wal ansika yabi ba, apia kaka upla ra hilp munaia tânka briaia? Apastil Pal naha natka las ba yus munan Tesalonaika tawanka ra Ju uplika nani ra smalki kan piua ra, “bamna tilara Ju nani kasak lukan” (Ap.St 17:2-4). ¿Dîa tânka sa upla ra hilp munaia tânka briaia?

2. ¿Smalkisa piua ra Pal samplika ba wina dîa lan takaia sip sa?

² Upla lukanka bara iwanka ba ra luki kaiks. Yawan upla nani wal aisisa piua ra witin nani nahki ai dara wali ba aman kaikaia sa. Areópago ilka ra, Pal Grik uplika nani kristian apia kan ba ra smalkan, witin smalkanka tâ krikan taim diara kum kum pat tânka bri kan ba dukiara aisan (Ap.St 17: 22-31). Smalkaia ridi takisa piua ra, upla nani dîa ai lukanka ra bri ba bara yawan dukiara dîa luki ba laki kaikaia sa (1 Ko. 9:19-22). Watla dawanka ba makabi walanka kum daukisa kaka, aman wals bara uplika dîa luki wal smalkaia natka kum pliks.

3. Makabi walanka pain yus munaia ba, ¿nahki hilp munisa upla nani ba pain ai tânka bribia?

³ Makabi walanka nani pain yus muns. Yawan upla kum ban impaki tauki ba ra dairiksan kum sip yabras, tânka nu âpu sa kaka. Sim natka ra, yawan watla dawanka ba dîa ai lukanka ra bri ba nu âpu sa kaka sip witin ra hilp munras. Jisas kau upla nani wal ai smalkanka tâ krikras kainara witin pas makabi walanka nani dauki kan, baku nu taki kan uplika ba dîa ai lukanka ra bri ba. Sampla baku upla kum mita makabi walan: “¿Dîa yamni daukamna kaka, yang sip kamna raya ban kaia lâka ba briaia?”, Jisas ba kau ansika yabras kainara natka plikan upla nani ba dîa luki kan tânka briaia (Lk. 10:25-28). Piu kum ra apastil Pita Jisas ra makabi walanka pain apia kum daukan, sakuna Jisas pana ansika pain kum yaban luki kaikbia dukiara (Mt. 17:24-26). Watla dawanka ba lukanka yamni apia kum aisisa, apia kaka makabi walanka kum daukisa kaka, ¿dîa daukaia sip sa? Makabi walanka tânkira kum daukaia bara witin ai tânka bribia.

4. ¿Dîa muni ban trai kaikaia sa upla nani ra hilp munaia tânka briaia?

⁴ Yawan upla nani ra hilp munisa piua ra Smasmalkra Tara Jisas ba tnata lukisa, bara patitara kristianka nani sin. Bara yawan baku dauki watla dawanka ba ra rispik lâka marikisa (1 Pi. 3:15). Baha mita watla dawanka ba ai brinka kabia piu wala ra wilinkira walaia.