Piu bani ra smalkaia ridi kaia
1. ¿Yawan nahki nu sa patitara kristianka nani piu bani ra smalkaia ridi kan ba?
1 Patitara kristianka nani sturi yamni ba ‘takaskraskira’ smalki kan upla bâra kan pliska ra (Ap.St 5:42). Baha mita, witin nani smalki tauki kan taim upla an ai lamara kan ba ra smalki kan. Sampla baku, smalki danh takan ningkara diara atkaia markit bâk lubia sin, bahara sanska kum saki smalki kan. Jisas daukan baku, witin nani piu bani ra smalkaia ridi kan (Mk. 6:31-34).
2. ¿Yawan dîa daukaia wilin kaia sa Jehova Witniska nani sa kaka?
2 Ban ridi kaia. Wan nina, Jehova Witniska nani mâki ba, dîa warkka dauki baman tânka apia sa; sakuna yawan dîa sât uplika ba marikisa (Ais. 43:10-12). Baha mita, utla utla ra smalki taukras kabia sin, yawan piu bani ra smalkaia ban ridi sa (1 Pi. 3:15). ¿Man nu sma ani sanska nani bâra sa ban wina smalkaia dukiara, bara dîa wiaia sip sma? ¿Yu bani ulbi sakanka nani brih taukisma upla kum kau walaia want ba ra yabaia dukiara? (Sins.L 21:5.) ¿Utla utla ra baman smalkisma, apia kaka plis nani sut ra upla nani ra smalkaia ridi sma?
3. ¿Dîa muni yabal ra, truk takaskaika pliska, bara bisnis pliska nani ra, “sip sa kaka baman smalkaia” tânka apia sa?
3 “Sip sa kaka baman smalkaia”. Mani kum kum luan ra, “sip sa kaka baman smalkaia” bîla ba yus munan. Naha wiaia want kan yabal nani ra, truk takaskaika pliska ra, bisnis pliska ra bara ani ra sip kan ba ra smalkaia kan. Nanara, yawan kau pain tânka brisa naha bîla “sip sa kaka baman smalkaia” uya pain apia sa, kan ban kra muihni lakri nani lukbia smalkaia warkka ba sip sa kaka baman daukbia, apia kaka witin nani mihta ra sa smalkaia, apia kaka smalkaia apia. Apastil Pal win ‘upla sut ra’ smalkan, baku sin utla utla ra smalki kan (Ap.St 20:20). ‘Upla sut ra’ smalkaia tânka ba kau param sa “sip sa kaka baman smalkaia” tânka ba wal. Yawan utla utla ra smalkaia warkka ba pas daukisa kan naha bâk yawan sanska kum brisa upla ailal ra King lâka ba smalkaia. Sakuna, patitara kristianka nani ba upla sut ra smalki kan. Witin nani ba sanska ba yus muni kan tânka kasak ba smalkaia, utla utla ra, plis nani sut ba ra upla ra smalki kan. Yawan sin witin nani luki kan ba kat lukaia sa, smalkaia warkka ba pain pali daukaia dukiara (2 Ti. 4:5).