Ban wina smalkaia sip sma!
1. a) Ban wina smalkaia dia tanka sa ki? b) Naha kangrigisanka ra, ya bara sa ban wina smalkan tawan tanka kasak ba lan takan?
1 Kangrigisankam ra ban wina smalkan tawan, tanka kasak lan takan upla an bara sa ki? Ansika ba nu takma taim kasak ta iwma. Ban wina smalkaia ba, anira kabia, upla nani ra kakaira taki bara sturi yamni nani smalkaia tanka sa. Baha mita, impaki tauki ba ra, kakaira kum wan kaikaia balan ra, apia kaka diara atki tauki ba ra, kul watla ra sin, wark taki pliska ra, bara wan lama uplika nani ra sin sturi yamni ba pyu bani smalkaia sa. Kangrigisan kum ra, 200 muihni lakri nani wina, 40% ka ban wina smalkan tawan tanka kasak ba nu takan! Baha mita, ban wina smalkaia tnatka ba uba pain pali sa.
2. Dia tnatka nani ban wina smalkaia ba Baibil ra takisa ki?
2 Pas kristianka nani sin aima kum kum ra ban wina smalkan. Sameria tasbaia ra Jisas lui auya kan taim, mairin kum Jekob liwahntika ra pangki kan ba ra witnis aisan (Jan 4:6-26). Pilip mita Itiupia kwinka suliarka nani wihtka tara kum wal aisi ta krikan, naha ba, Aiseya bukka aisi kaiki kan taim, Pilip mita makabi walan: “Man aisi kaikisma ba tanka brisma ki?” (W.n 8:26-38). Pilipai taunka ra, Pâl ba silak watla ra kan pyua ra, witin silak watla main kakairika ra smalkan (W.n 16:23-34). Baha wina, utla kum ra priski bri kan taim, “ya ya sin witin ra kaikaia wan ba, witin mita baha nani ba pain brin. Pri pali Pâl Gâd kingka laka ba smalki kan, Dawan Jisas Kraist sturka sin” (W.n 28:30, 31). Witin nani smalkan kaka, srinhka mai dauki kabia sin, ban wina smalkaia sip sma. Nahki muni?
3. Dia ba help wan munbia wan srinhka tikaia?
3 Nahki ta krikaia. Yawan tila wina kum kum ba sîa brisa upla tringsar nani wal aisaia. Wan kakaira kum kabia kra sin, witin ra witnis aisaia wan swira brisa bara sîbrin wan daukisa. Sakuna, Jehova yawan wal nahki pain ba ra luki, spirit dukya nani wanki ba, bara naiwa upla nani sari laka ra iwi ba kaiki, smalkaia wan kupia bukbia (Jona 4:11; Lawana 40:5; Mat. 13:52). Baku sin, Jehova ra ‘sîbrin apu’ laka makabaia sip sa (1 Tes. 2:2). Galaad kulka diman uplika kum, naku aisata: “Upla nani wal sip aisaras sna taim, kaikisna pura sunra ba help ai munisa”. Nahmpa nahmpa lukisma kaka, kupiam munuhtara pura sunra kunhku kum dauks (Nih. 2:4).
4. Dia lukanka briaia sa bara dia muni?
4 Ban wina smalkaia dukyara nit apia sa aisanka kum ridi daukaia, apia kaka Baibil tikska kum aisi ta krikaia. Yawan dis want sa uplika wal aisaia, sakuna mahka smalkaia lika apia. Muihni lakri ailal wisa naha sut dauki luan ningkara kau isi ai dara walisa uplika ra smalkaia. Bara uplika ba aisan daukras sa kaka, yawan nit apia sa taibi munaia. Dis aisabi wi mahka waia sa.
5. Kristian mairin kum ba nahki ban wina smalkisa ki?
5 Kristian mairin kum upla nani wal aisaia ai srinhka bri ba, markit ra taukisa taim, kau aisaras kainara, upla nakra nani ra kaiki, kikaia baku munisa. Bara uplika ba pana witin wal kikisa kaka, witin sturi kum aisisa. Uplika ba walan daukisa kaka, baha kupia bukisa kau aisi kaia. Baha wina, upla ba dia aisi ba pain walisa, bara lukisa dia pali ba uplika ba kau ai brinka sa walaia. Naha tnatka ra, witin ulbi sakanka ailal upla mihta ra swin sa bara Baibil stadika sin ta krikan sa.
6. Ban wina smalkaia ba nahki ta krikisa ki?
6 Ta krikaia bila nani. Aisanka kum ta krikaia dukyara, yawan dia wiaia sip sa ki? Jisas Sameria mairka wal liwahnta ra aisan taim, dis li makabi ai aisanka ta krikan (Jan 4:7). Ban kra, wan lakula wiaia, apia kaka makabi walanka kum dauki aisanka kum ta krikaia sip sa. Bara, uplika wal aisi kabia taim, sanska kum plikaia sa Baibil lukanka kum dingkaia bara baku tanka kasak ma ba mangkbia (Smas. 11:6). Muihni lakri kum kum ba pain kaikan sa naku aisanka nani ta krikaia, makabi walanka pain kum daukisa, bara upla nani ba nu takan daukisa taim mahka sanska yus munisa. Sampla kum, daktar balbia bila kaikisa taim upla walbia dukyara aisisa: “Kli siknis takras kamna taim misar lilia takamna!”
7. Diara sut kir ra ba kaiki, nahki help wan munbia aisanka nani ta krikaia?
7 Diara sut kir ra ba kaiki, help wan munbia aisanka nani ta krikaia. Tuktan nani ai daukanka pain bri ba kaikbia kaka, aisika apia kaka yaptika ra, kupia lilia dauki sip sa makabi walaia: “Dia help mai munisa luhpiam nani ra pain pakaia?” Kristian mairin kum, ai warkka ra upla nani ba dia aisi ba walisa, baha wina, wauhkataya nani baha dukyara aisi ba upla ra yabisa. Yu kum, witin nu takan mairin wala kum marit takaia want kan, baha mita, ¡Despertad! wauhkataya kum, marit dukyara aisi kan ba yaban. Naha ba, sanska yaban Baibil stadika kum ta krikaia.
8. Nahki wan ulbi sakanka nani ba yus munaia sip sa aisanka kum ta krikaia?
8 Tnatka wala ba sika wan ulbi sakanka nani upla mawanra aisi kaikaia. Kristian waitna kum Aihwakisa bara ¡Despertad! ka ba kwakisa, bara ulbanka lalka nani upla kau pain kaiki ba, iwi aisi kaikisa. Baha wina, upla kum ai lamara wauhkataya ba kaikisa kaka, makabi walanka kum daukisa, apia kaka dia aisi kaiki ba wina aisanka kunhku kum daukisa. Naha dauki ba mita aisanka ailal ta krikisa, bara sanska yabisa witnis aisaia. Wan ulbi sakanka nani, upla kaikbia dukyara swisa kaka, yawan wal wark taki uplika nani, apia kaka yawan wal kul dimi nani sin, ban kra baha kaiki, makabi walanka nani wan daukbia.
9, 10. a) Ban wina smalkaia dukyara nahki sanska nani yus munaia sip sa ki? b) Man nahki daukram sa ki?
9 Sanska nani plikaia. Smalkaia warkka ba aihni daukaia ba mita aitani pali sa ban wina smalkaia warkka pyu bani daukaia. Bara, ani ani ra kabia sin, smalkaia sanska nani pliki kaia sa. Aisanka pain kum daukaia dukyara, kaina manas luki kaiks dia sat uplika nani wal prawma, bara dia wiaia sip sma. Pyu bani ra Baibil kum brih tauki bas, bara upla ra swiaia dukyara ulbi sakanka kum kum brih tauks (1 Pi. 3:15).
10 Muihni lakri manas ban wina smalkaia tnatka sinskira pliki sakan sa. Kristian mairin kum, upla tringsar sip dimi waras uptiska watla kum ra iwi ba, smalkaia wisi, uptiska latara pulanka kum tasba paskanka painkira lilkika bri ba, saki baha wal pulisa. Bara, upla nani ba kaiki nahki pain ba dukyara aisuya taim, kristianka mairin ba sanska yus munisa, “heven raya bara tasba raya” Baibil pramiska dukyara witnis aisaia (Par.m 21:1-4). Ban wina smalkaia dukyara tnatka wala nani brisma?
11. Ban wina smalkan uplika ra kli wih kaikbia dukyara, dia daukaia sa ki?
11 Kli wih kaikaia. Upla nani ba uba liliakira mai walisa kaka, baha brinka bri ba pakaia sip sma. Sip sa kaka, uplika ra wiaia sip sma: “Brin ai daukisa yu wala kli man wal aisaia, anira iwisma ki?”. Smalki tataukra wala nani sin upla numbika, bara dairiksanka makabi walan ningkara, wisa: “Uba lilia yawan wal aisan, rait apia? Bara yawan wal aisan ba dukyara kau nu takan mai daukisa kaka, numbiki nara sa.” Bara, man uplika ra sip wih kaikras sma kaka, aihni muni kangrigisankam aîulbrika ra Sírvase visitar (S-43) wauhkataya ba yabaia sip sma, bara kangrigisan kum kau lamara ba wih kaikaia sip kabia.
12. a) Dia muni yawan ban wina smalkuya taimka ba ulbi bri kaia sa ki? b) Dia yamnika sakan sa ban wina smalkan tawan? (“Ban wina smalkan yamnika sakan ba!” sin laki kaiks.)
12 Ban wina smalkan taimka ba ulbaia sa. Amya tiwbiara, pyu kum bilara minit kum kum baman aisaram kabia sin ulbaia sma. Naha dukyara luki kaiks: Smalki tataukra kumi bani ba yu bani 5 minit smalkisa kaka, kati kum bila ra 17 milian awar daukan kabia.
13. Ban wina smalkaia dukyara dia ba wan kupia bukaia sip sa?
13 Diara tara wal tawan ban wina smalkisa; Jehova ra latwan kaikisa bara wan walka nani ra sin (Mat. 22:37-39). Wan kupia nani ba lilia ni bangwan sa Jehova daukanka painkira nani bara ai lukanka nani tawan, bara naha wan tukbisa Witin “karnika bara ai king aimaki ba prana ingnika” ba dukyara aisaia (Lawana 145:7, 10-12). Kau pyua bri ba ra, wan walka nani ra latwan kaiki ba sanska nani sut yus munisa sturi yamni ba aisaia dukyara (Rom 10:13, 14). Ban wina smalkaia dukyara, kaina manas wina ridi takaia sa... ban kra, upla kum bauan laka bri ba ra help munaia sip kabia tanka kasak ba lan takaia.
[Wahya 4 Lilkika ba]
Ban wina smalkaia dukyara lakula kum yabi aisanka dauks; baku man mampara kau isi kabia.
[Wahya 5 Lilkika ba]
Muihni lakri manas ban wina smalkaia tnatka sinskira pliki sakan sa.
[Wahya 5 Bakska ba]
Ban wina smalkaia helpka nani
◼ Ta krikaia dukyara puram suni Jehova helpka makas.
◼ Mawan lilia uplika nani pliks bara ris brisa kaka wal aisas.
◼ Uplika mawanra kaiki bara pâna laka ba mariks, baha wina, sturi yamni kum aisas.
◼ Dia aisabia ba pain wals.
[Wahya 6 Lilkika ba]
Ban wina smalkan yamnika sakan ba!
• Kristian waitna kum ai trukka paskaia dukyara plis kum ra brihwan, bara bila kaiki kan pyua ra, uplika nani ra mahka smalkan. Baha wina, upla sut dukyara aisanka ba ra wabia paiwanka kum kum swin. Mani kum luan ningkara, aidrubanka tara kum ra, kristian waitna kum kakaira apia kan ba lakula daukan, sim waitnika mani luan ra, truk paski pliska ra paiwanka brin uplika tila wina kum kan! Waitnika na aidrubanka tara aisanka ra wan. Baha wina, Baibil stadika kum makaban. Nanara, witin bara ai maritka mairin aihtabi takan sa.
• Kristian mairin kum ban wina smalkan tawan, tanka kasak lan takan ba, selp ai tasbaia piska smalki ba brisa, naha na, ai luhpia yuhmpa tnatka ku kakaira takan uplika nani sa. Bara naha, sanska yabisa ai lama uplika nani, bara kul watla ra aisa yapti nani ra smalkaia. Bara aisanka kum daukaia dukyara upla ra lakula dauki mahka aisisa nahki Baibil ba help munisa ai luhpia nani ra pakaia; baha ningkara, witin aisanka wala ra tauisa. Witin ta krikan ningkara, kau isi ai dara walisa Baibil tanka ba kau aisi kaia. Naha tnatka ra upla 12 ra help munan sa aihtabi takaia.
• Kampani kum upla lalahka dakbi bri ba, aksidint takuya taim kli laki yabi ba wina, wark tatakra kum ba, kristian mairin kum watla ra wan. Bara kristianka mairin, baha sanska brih waitnika ra smalkan. Baha wina, kristianka mairin ba waitnika ra makabi walan ai wîna tara ba siknis apu, lilia, bara raya ban kaia iwaia want kan sapa. Waitnika ba au win, sakuna nu takaia want kan dia sat rayaka kan kahbaia dukyara aisi kan. Kristianka mairin ba Gâd pramiska nani dukyara aisan. Bara waitnika ba, ulbi sakanka nani brin bara tutni kum ra sut aisi kaikan. Baha wina, Baibil stadika kum brin, bara asla aidrubanka nani ra wan ningkara, aihtabi takan.
• Kristian mairin kum plen kum ra impaki auya kan taim, ai lamara iwi uplika ba ra smalkan. Impakanka las ba ra, kristianka mairin ba ai dairiksanka bara ai teleponka numbika yaban. Baku sin, mairka ra kupia bukan Jehova Witniska kum wih kaikbia pyua ra Baibil stadika kum makabia. Yauhkika kan taim, Jehova Witniska wal ai watla ra wih winan. Bara mairka ba Baibil stadika kum brin, isti pali ai taura wan, bara aihtabi takan. Baku sin, mairka ba pyua wiria bila ra, Baibil stadika yuhmpa yabi kan.
• Kristian waitna blain kum, andat mani bri kan ba, almuk nani main kaiki pliska kum ra kan. Baha ra witin kli kli aisi kan: “King laka ba nit sa”. Naku dauki ba tawan nurs mairin bara upla almuk wala nani makabi walanka kum kum daukisa, bara naha, sanska yabisa King laka dia ba tanka smalkaia. Yu kum, wark tatakra mairin kum ba ra kan ba makabi walan, paradais ra dia daukaisa sapa. Kristian waitna ba naku win: “Kaikaia bara wapaia sip kamna, baku lika wil sirka na angkamna”. Witin blain ba mita, upla wala ra makabisa wauhkataya nani aisi kaikbia. Yu kum, ai luhpia mairin ba witin ra kaikaia wan, bara wark tatakra mairin ba, makaban wauhkataya nani ba ai watla ra brih waia. Nurs kum mita luhpia mairin ra naku win: “Nanara naha pliska ra wan aisanka raya kum brisa ‘King laka ba nit sa’”.
• Kristian mairin kum plun atki pliska ra bila kaiki kan pyua ra, waitna man takan daknika kum, pulitik dukyara aisi kan walan. Tila wina, waitna kum ba aisan, gabamint nani ba sip apia sa upla trabilka nani wapni mangkaia. Kristian mairin ba lukan: “Nanara sanska pain kum briri sa”. Baha wina, pura sunra kunhku kum daukan bara witin nani lamara wan. Lakula win ningkara, gabamint kum upla trabilka nani ba wapni mangkaia sip ba dahra aisan, baha Gâd Kingka laka sa. Baha wina, wauhtaya tara kum yaban. Baha minitka ra, baska pali ba walaia dukyara lamara wan. Bara, kristian mairin ba lukan witin ra kangbi sakaisa, sakuna baska ba win, witin nani dia aisi kan ba wali kan bara witin sin wauhtaya tara kum want kan. Tisku kan taim, wark tatakra mairin wala kum, ai nakra laya saki balan, bara witin sin dia aisi kan ba wali kan. Kainara, naha mairka ba Baibil stadi taki kan bara nanara kli stadi takaia want kan.