Bisnis pliska ra nahki sibrin âpu kira smalkaia
1. Bisnis pliska nani ra smalkaia, ¿dîa muni sibrin âpu kaia sma?
1 ¿Bisnis pliska nani ra smalkaia si brisma ki? Baku sa kaka, sari kapara, kan apastil Pal ba takaskraskira smalki kan, sakuna sam taim witin ‘sibrin âpu kaia lâka nit kan’ smalkaia dukiara (1 Tes. 2:2). Naha wauhkataya ra takisa trabil kum kum bisnis pliska nani ra wan takaia sip ba.
2. ¿Dîa muni bisnis pliska ra wark taki uplika nani ra sibrin âpu kira smalkaia sa?
2 ¿Wark taki nani ra aisamna kaka saura ai kaikbia ki? Bisnis pliska ailal ra upla nani ba trabil âpu lukisa witin nani wal aisabia kaka. Kan witin nani lukisa upla nani ba diara atkbia. Baha mita aitani sa wan kwalka dimra pain kum briaia, bara wan pânika lâka marikaia, baku natka ra witin nani wan walbia.
3. Bisnis pliska ra wark taki uplika nani ai kupia baikbia apia dukiara, ¿nahki smalkaia sip sa?
3 ¿Upla ailal mawanra smalkamna ki? Sip sa kaka, upla uya âpu taim bisnis pliska nani ra smalkaia sa. Bisnis pliska dawanka ba apia kaka lalah kulki uplika ba yakan sa kaka, witin ra smalks. Bara aisanka kunhku ra dauks.
4. ¿Bisnis pliska kum ra dîa wiaia sip sa?
4 ¿Dîa wiaia sna ki? Upla ailal bâra sa kaka, bisnis pliska dawanka wal aisas. Naku wiaia sip sma: “Upla wark taki nani ba uya ai watla ra takaskras, ¿rait apia? Baha mita yang nani ai warkka ra wih smalkisna. Yang nu sna man wark takisma, baha mita aisanki ba kunhku ra daukamna.” Bara upla diara wahwi tauki baku wan kaikbia apia dukiara, kau pain kabia prisantka nani yabaia sip ba dukiara aisaia apia sa. Bara sip sa kaka, dawanka ra makabi walaia sip sma wark tatakra wala nani wal aisaia sip sma sapa. Baha wina witin nani ra sim bîla nani wis. Wark tatakra nani ba uya taim âpu sa kaka, sip sma ulbi sakanka kum ai mihta ra yabaia, apia kaka plis wala ra swiaia. Baku witin nani ris takbia taim aisi kaikaia sip kabia.
5. ¿Dîa muni bisnis pliska nani ra sibrin âpu kira smalkaia sa?
5 Jisas bara apastil Pal bisnis pliska nani ra sibrin âpu kira smalkan, bara man sin sip sma baha daukaia (Mt. 4:18-21; 9:9; Ap.St 17:17). Jehova ra makas sringka briaia apia bara sibrin âpu kaia (Ap.St 4:29). Bisnis pliska nani ra wark taki uplika nani ban bâra sa. Baha mita ¿dîa muni naha warkka daukaia trai munras?