Upla bâra pliska nani ra smalkaia natka raya nani
1. ¿Patitara kristianka nani dîa samplika pain mangkan?
1 Patitara kristianka nani ba utla utla ra baman smalkras kan. Witin nani sin upla bâra kan pliska nani ra sin smalkan (Ap.St 20:20). Sampla baku, tempel ra, bara anira upla bâra kan pliska ra sin smalkan (Ap.St 5:42). Apastil Pal ba Atenas tawanka ra kan piua ra, yu bani markit ra upla bâra kan nani ra smalkan (Ap.St 17:17). Naiwa piua ra sin, smalkaia warkka daukaia dukiara natka kau tara ba sika utla utla ra smalkaia. Sakuna, yawan sin, truk nani takaski pliska ra, bisnis pliska, parki nani, upla ailal bâra sa yabalka nani, bara ani anira upla nani bâra sa pliska nani ra sin smalkisa. Kristian nani ra kupia bukisa upla bâra sa pliska nani ra smalkbia, sakuna nanara natka raya wâl bara painkira bâra sa upla ra smalkaia dukiara.
2. ¿Yahbra kati, 2011 manka ra, smalkaia dukiara dîa natka raya tâ krikan?
2 Upla ailal bâra sa pliska nani ra smalkaia. Anuario 2013 bukka, wahia 16 bara 17 ra mariki ba baku, smalkaia dukiara natka raya kum tâ krikan Yahbra kati, 2011 manka, Nueva York tawanka ra. Ulbi sakanka nani kahbaia dukiara tibil nani apia kaka truk lupia nani ba mangkan upla ailal bâra sa pliska nani ra bîla aisanka sât sât ra smalkaia dukiara. Yu bani upla milian milian bâk wapisa; baku sin ya nani utla uptis tara nani upla sut dimaia adar âpu pliska ra iwi ba, bara ya nani uya ai watla nani ra takaskras ba sin bâk luisa. Bara upla ailal pali ba ulbi sakanka nani brin. Kati kum bilara, wauhkataya 3.797 bara 7.986 buk nani upla mihta ra swin. Upla manis sin Baibil stadika kum makaban. Bara Baibil stadika nani tâ krikaia brinka bâra kan ba mita, ani uplika wahia kum ulbi banhkan ba, minitka ra kangrigisan lamara kum ra bliki kan uplika ra wih kaikbia dukiara.
3. ¿Dîa natka raya ba tasba aiska ra tâ krikisa?
3 Smalkaia dukiara naha natka raya uba painkira takan ba mita, nanara naha ba tasba aiska ra daukan kabia upla ailal bâra sa tawanka nani ra. Betel apiska tara nani ba laki kaikbia ani tawanka nani ra daukbia. Naha tawanka nani ra impakaia dukiara upla nani yus muni pliska ailal, apiska manis bara uptis watla tara nani sin bâra kaia sa; baku natka ra upla manis yabal nani ra tauki kabia. Baku sin, Betel apiska tara nani ba ya nani baha warkka daukbia ba sin maisa pakbia bara nahki daukaia ba sin wibia. Tâura smasmalkra nani bara piu aiska smalki tataukra nani baha warkka daukbia, sakuna plis kum kum ra tâ baiki smasmalkra nani ba sin sip kabia tâ baikaia.
4. Upla ailal bâra sa tawanka nani ra, ¿nahki smalkisa?
4 ¿Nahki natka ra smalkaia sa? Tâura smasmalkra nani bara piu aiska smalki tataukra nani naha natka raya dauki ba dis bîla kaikisa upla kum ulbi sakanka nani tibil ra apia kaka trukka lupia lamara balbia. Bara upla kum tibil lamara balan taim, smalki tataukra ba kupia bukisa ulbi sakanka kum briaia. Bara smalki tataukra ba Baibil wal ani makabi walanka bri ba ansika yabisa. Uplika ba ulbi sakanka kum brin kaka, smalki tataukra ba prisantka kum yabaia sip ba dukiara aisaras. Sakuna, uplika ba ban makabi walisa kaka, witin ra tânka marikaia sip sa ani dairiksanka ra blikaia sip sa bara ulbi sakanka nani ra ulban sa wiaia. Sip sa kaka, makabi walaia sa: “¿Upla kum wamtla ra wih mai kaikaia sip sa ki?” apia kaka “¿Pat nu kapram naha ulbi sakanka ra Baibil stadika kum briaia sip ba dukiara aisisa?”.
5. ¿Nahki muni naha natka raya ra smalkaia ba marit nani kum ra yamni munan?
5 Naha natka raya ra smalkaia ba yamnika manis yabisa. Marit uplika kum win: “Tibil mawanra bûi kaia bara yu bani upla tausin tausin bal lui ba kaikaia ba wan kupia bukisa, kan yawan kaikisa tasba aiska ra upla nani ra smalkaia warkka tara bâra sa. Naha upla ailal pali kaikaia bara Jehova upla kumi bani ra luki ba yawan lukisa taim, wan kupia bukisa smalkaia warkka ba wan rayaka tâura mangkaia. Yawan lukisa Jehova upla kupia bani laki kaikisa, ya nani rait pali swaki sakan lâka briaia sa. Baku sin, insal nani yawan aikuki wark taki ba lamara baku wan dara walisa.”
6. a) ¿Kangrigisan manis ba, ani natka raya brisa upla ra smalkaia, sakuna naha ba nahki sât wala sa upla ailal bâra sa tawanka nani ra smalkaia ba wal? b) Upla nani ra smalkisa taim, ¿nahki kangrigisan nani ba asla wark takaia sa?
6 Kangrigisan smalki pliska ra upla ra smalkaia. Upla ailal bâra sa tawanka nani ba wina, natka wala sin bâra sa yawan smalkaia sip ba. Naha ba kangrigisan almukka nani ba laki kaikisa kangrigisan smalki pliska ra daukbia sapa. Naha natka raya ra smalki tataukra nani ba ulbi sakanka nani kahbaia dukiara tibil kum apia kaka truk lupia ba mangkisa bisnis pliska kum lamara. Sakuna naha ba kangrigisan smalki ba pliska nani bilara kaia sa. Naha ba sât wala sa upla ailal bâra sa tawanka nani ra smalkaia ba wal. Bahara, ya nani tâ baikbia ba kangrigisan sât sât wina wahbi sakisa bara witin nani Betel apiska tara laki kaikan pliska nani ra aikuki smalkisa (“Asla wark takaia nit sa” bakska ba kaiks).
7. ¿Sip sa kaka, nahki upla nani ra smalkaia sip ba warkka ba kangrigisan almukka nani laki kaikbia?
7 Kangrigisan almukka nani ba laki kaikbia kangrigisan smalki pliska ra upla ailal yabal nani ra wapisa bara upla ailal bara sa pliska nani ra smalkaia natka daukbia sapa. Plis kum kum ra ulbi sakanka nani kahbaia dukiara tibil kum mangkaia sip sa: impakaia dukiara pliska nani, parki, yabal tara nani, bisnis pliska, skul watla, bara upla nani mani bani sim pliska aipaswi nani ra sin. Pain kabia tibil kum sim pliska ra mangkbia, sim yua nani, bara sim awarka ra sin. Tibil kum bisnis sirpi ailal pliska mawanra mangkbia kaka, kau pain kabia bisnis tara kum mawanra mangkbia ba wal. Kan upla nani ba plis kumi baman ra auya ba mita uya taim âpu takaskaia. Plis kum kum yabal lupia nani bri ba sip sa tibil sirpi kum mangkaia. La Atalaya bara ¡Despertad! wauhkataya nani bara Smalkisa bukka kahbaia dukiara tibil kum nahki paskaia sip ba Internet wan pliska wina kangrigisan almukka nani ba alahbaia sip sa. Ya nani upla ailal bâra sa pliska nani ra smalki ba natka raya ba baku daukbia. Baku sin smalkaia warkka pura kaiki kristianka waitna dîa wi ba daukbia. Upla kum ai dairiksanka yabisa, bara uplika ba witin nani smalki pliska ra iwras kaka, witin nani isti pali Sírvase Visitar (S-43-S) wahia kum ulbi banhbia bara kangrigisan âiulbra ba ra yabia.
8. Kangrigisankam smalki ba pliska ra upla ailal ba yabal nani ra uya âpu sa kaka, ¿dîa sanska nani bâra sa upla ra smalkaia dukiara?
8 Yawan kumi bani upla sut ra smalkaia sip sa. Ban kra kangrigisan kum kum ba smalki pliska nani ra upla ailal ba uya yabal nani ra taukras bara tibil kum bahara mangkaia sip apia sa. Sakuna, baha kangrigisanka nani ra, smalki tataukra nani ra kupia bukisa ani anira upla bâra sa pliska nani ra smalkbia. Ban kra, bahara bisnis kum kum bâra sa, markit lupia kum apia kaka plis kum upla ailal wi ba bâra sa. ¿Anira upla nani ba asla takisa? ¿Upla nani ba liliaka nani ba anira kulkisa? Baha sât pliska nani bâra sa kaka, ban kra bahara sin upla ra smalkaia sip kabia.
9. ¿Dîa muni trai kaikaia sa ani anira upla bâra sa pliska ra smalkaia?
9 Jehova kupia lâka sa “upla sut ba swaki sakan kabia, kasak tânka ba sin witin nani kakaira taki banhbia” (1 Ti. 2:4). Baha mita, yawan trai munisa upla kau ailal kupia alkaia bara Gâd Kingka lâka smalkaia tnata yua ba kau balras ba ra (Mt. 24:14). Plis kum kum ra karna munisa upla nani ai watla ra sakaia. Sakuna, witin nani yabal nani ra taukisa taim, smalkaia sip sa. Ban kra naha natka ra baman baha uplika nani ba sturi yamni nani ba walbia. Baha mita, smalkaia warkka ba upla nani ani ani ra bâra sa kaka smalkbia (2 Ti. 4:5).
[Wahya 5 lilkika ba]
Asla wark takaia nit sa
Sam taim smalki tataukra kum kum ba kangrigisan lamara nani wina sim yabalka nani, truk nani takaski pliska, bara sim bisnis pliska nani ra smalkisa. Bara smalki tataukra nani kangrigisan wala wala wina sim pliska nani, sim yapaia pliska nani, upla nani kwala tuski pliska nani ra sin wauhkataya nani swin sa. Bahara iwi uplika bara wark taki nani ba sin aihka ai dara walan sa; smalki tataukra nani ba sim piua ra smalkras kabia sin. Baha mita, kau pain sa smalki tataukra nani ba ai kangrigisanka smalki pliska ra baman naha natka ra smalkbia.
Smalki tataukra kum kangrigisan wala pliska ra smalkaia want sa kaka, ai kangrigisanka ra smalkaia warkka tâ bri ba wal aisabia. Bara baha kristianka waitna ba kangrigisan wala smalkaia warkka tâ bri ba wina adar makabia. Baha wina, smalki tataukra ba sip kabia bahara smalkaia. Ani anira kangrigisan kum bîla aisanka wala aisisa, bara sim pliska ra kangrigisan wala nani smalkaia sa kaka, smalkaia warkka tâ bri kristianka nani asla wark takaia sa; baha natka ra upla nani bahara iwi ba ambuk munbia apia. Asla wark takisa kaka, diara sut ba “painkira bara wapni kat sin” daukbia (1 Ko. 14:40).
[Wahia 6 lilkika ba]
[Wahia 6 lilkika ba]