Tâ Bri Daknika Wauhkataya Blikan ba

Spirit lâka ra muihni lakri nani:

Uba lilia mai ulbisa Gâd napakanka nani. Nanara yawan ba 7 milian pura banhwisa. Yawan ba muihni lakri kum kuntri wala wina kakaira takisa taim, minitka ra witin ra latwan kaikisa (Jan 13:34, 35). Yawan kasak lukisa Anuario bukka ba man nani pat aisi kaikram, bara muihni lakri kasakka lukan lâka ba dukiara aisi kaikram. Baha ba kaiki yawan kumi bani ra kau asla lâka ra wan dara walisa.

Tasba aiska ra muihni lakri nani dîa ulbi ba wan marikisa Pamali Mayunra Tihmika ba rait pali diara tara baku kaikisa. Man nani tilam wina luhpa sirpi bri ba natka sinskira nani pliki sakram witin nani ra smalkaia dukiara (Epe. 6:4). Marit uplika nani kau lamara ai dara walisa, kan aikuki spirit lâka ra tânka kasak ba laki kaikisa (Epe. 5:28-33). Baku sin, upla yakan iwi nani ba bara pamali nani ba yamnika manis sakan sa Gâd Bîla stadi taki ba wina (Jas. 1:8, 9).

Yawan ba man nani dukiamra lukisa, kan man nani tilam wina kum kum tasba nikbanka bara prari tara nani lui banhram. Yawan tingki tara maikisa kan muihni lakri nani ra trabil ailal bri kan piua ra hilp munram ba (Ap.St 11:28-30; Gal. 6:9, 10). Baku sin, kangrigisan bani ra muihni lakri ba nitka tara brisa piua ra hilp munisa. Dorcas baku man nani ‘diara yamni man dauki kapram, upla umpira nani ra sin uya hilp munram’ (Ap.St 9:36). Kasak luki banhs dîa daukisma ba Jehova kaikisa bara mana pain kum maikbia (Mt. 6:3, 4).

Kuntri kum kum ra, wan raitka bri ba upla saura nani ba mita wankaia want apia sa bara lâ nani ba saura yus munan sa trabil wan munaia dukiara (Law. 94:20-22). Jisas baha mapara buanka lâka aisan. Bara yawan kaikisa taim sibrin âpu kira Jehova ra wan yukuwaika baku plikaia sa (Jan 15:19, 20). Kasak luks yawan wan pura sunra nani ra man nani dukiamra makabisa ‘piu sut ridi kama, man nani diara bîla kaikanka brisma ba, ya ya mita tânka ba mamkabi walbia kaka, klir pali saki wiaia’ (1 Pi. 3:13-15).

Yawan kupiam bukisa klin lâka diara sut mapara marikaia. Sitan saurka lâka natka ailal yus munisa yawan nina blîkbia dukiara, sakuna man nani klin kaia trai munisma. Naiwa piua ra upla daukanka nani kau saura takisa, sakuna ‘karna banhs Jehova aslika lâka ra, Witinka karnika tara pali bri ba wal’ (Epe. 6:10). “Gâd mita aiklabaia dukia nani wanki ba sut brih dims, bara baha ni sip kama bapi kaia Sitan kuninka nani ba mapara” (Epe. 6:11, 12). ¡Nu bas Jehova dîa pain daukisma ba yus munisa Sitan ra marikaia witin ba kuninkira kum sa! (S.L 27:11.)

Yawan uba lilia wan dara walisa 2011 manka ra upla 19.374.737 Jisas Pruan Kupia Kraukanka yua ra bâra kan. Tâ baiki smasmalkra warkka Lih Wainhka kati ra daukram ba mita naha numbika tara takan. ¡Upla milian milian tasba aiska ra ba Jehova Witniska nani nahki Jehova ra mayunra lâka ba yabi ba walan! (Ro. 10:18.) Man baha uplika 2.657.377 tilara kapram bara tâ baiki smasmalkra warkka daukram ba, apia kaka smalkaia warkka ra kau daukram kaia sa. Man nani sut wan kupia bukan spirit lâka ra wilinkira bara takaskraskira smalkisma ba mita (Law. 110:3; Kol. 3:23).

Mani luan ra, upla 263.131 Jehova ra ai rayaka yabi aihtabi takan. Yawan Jehova ra tingki tara yabisa bara man nani sut ra sin, kan aikuki upla wala nani ra sin paiwisa “‘¡Bal!’ Bara wali uplika ba wiaia sa: ‘¡Bal!’ Ya din dauki ba, balaia sa; ya brin dauki ba, raya kaia laya ba mana luha dibia” (Par.M 22:17). Aidrubanka Kau Tara nani 2011 ra daukan ba ra King lâka tânka kum kum laki kaikan. Yawan liliakira wisa “Gâd Kingka lâka balbia”. Jisas dîa pramis munan ba wan kupia bukisa: “Yang aihni aulni”. Yawan wan kupia aiska ni apastil Jan dîa aisan ba baku sin aisisa: “Baku kabia. ¡Bal, Dawan Jisas!” (Par.M 22:20.)

Yawan Jisas balaia ba kau bîla kaiki ba ra, pliskam pali nu bas kumi bani ra latwan mai kaikisna. Kan Jehova ra latwan kaikisma bîlam ni aisi ba baman apia, sakuna dîa daukisma bâk marikisma (1 Jn. 3:18).

Muihkam lamkra nani,

Jehova Witniska nani Tâ Bri Daknika ba