Jehova Witniska nani spirit lâka ra tihmu lâka wina takisa
Baibil ra, ingni lâka ba tânka kasak wal praki kaikisa, bara tihmia tara lâka ba, kunin lâka wal prakisa (Law. 43:3; Ais. 5:20). Sitan Iv ra kunin munan taim, tasba aiska ba tihmia lâka ra takaskan. Naiwa piua ra upla nani ba, spirit lâka ra, tihmia tara tilara iwisa (Par.M 12:9). Los testigos de Jehová: una historia de fe viva. Parte 1: Salen de la oscuridad lilkika ba wan aisisa upla nani ba nahki tihmia tara wina taki, spirit lâka ra, ingni tilara diman sa (Ais. 60:1, 2). Naha lilkika kaikbia ningkara, trai kaiks makabi walanka nani ansika yabaia.
1) Apastil nani pruan ningkara, ¿nahki, spirit lâka ra, tihmu lâka ba kau takan? 2) Patitara 1100 manka wina, ¿dîa sât dukia nani ba upla nani ra hilp munan ai tânka briaia kristian rilidianka nani ba Baibil smalkanka nani wina tnaya ra tawan? 3) Henry Grew bara George Storrs ba, ¿ya nani kan? 4) ¿Dîa sât dukia nani takan ba mita Charles Russell lukanka ba chens munan? 5) Russell, ai aisika, bara ai kakairika nani ba, ¿nahki natka ra Baibil ba stadi taki kan? ¿Nahki natka ra Baibil tânka bri banhwan? 6) Russell wal Baibil stadi taki kan nani ba, ¿nahki muni Nelson Barbour uplika nani wal asla takan? Ningkara, ¿dîa muni dakwi takan? 7) Mani 1879, Sikla kati wina, ¿nahki muni ingni lâka ba kau klir takan? 8) Baha wina, ¿Baibil Stadi Tatakra daknika ba dîa daukan sturi yamni nani ba smalkaia dukiara? 9) Baibil Stadi Tatakra nani ba 1914 manka ra, ¿dîa takbia bîla kaiki kan? 10) Russell pruan ningkara, Baibil Stadi Tatakra nani ba, ¿dîa trabilka mapara buan? 11) Baibil Stadi Tatakra nani ba Rutherford ai pânika aikuki pri lâka yaban taim, ¿dîa dauki banhwan? 12) Naha lilkika DVD ra taki ba, ¿nahki hilp mai munan Jehova asla takanka ba kau pain kulkanka yabaia? 13) Naha lilkika DVD ra taki ba, ¿nahki kupiam bukisa smalkaia warkka ba kau daukaia, trabil ailal tilara kabia sin? 14) ¿Nahki naha DVD lilkika ba yus munma, pamalikam, stadi tatakrikam, apia kaka upla wala ra hilp munaia dukiara?
¡Patitara Baibil Stadi Tatakra nani ba, spirit lâka ra, prapatika nani ba wankan! Witin nani, spirit lâka ra, tihmia ra iwi kan, sakuna ban sibrin âpu takaskraskira smalki kan. Naha samplika pain ba nina blikaia sip sa bara “ingni uplika nani baku” kaia (Epe. 5:8).