¿Smalkaia pliska kum silp briaia want sma ki?
1. ¿Smalkaia pliska kum silp briaia ba dîa tânka sa?
1 Kangrigisankam ra smalkaia pliska bri ba uba tara sa kaka, ban kra wamtla lamara plis kum briaia sip sma. Baha pliska ba man silp wark takaia sip sma. Organizados bukka, wahia 103 ba marikisa silp smalkaia pliska kum bri kaia ba hilp wan munbia “smalkaia warkka ra wan taimka ba kau pain yus munaia”. Baku sin: “Smalki tataukra wala kum ra paiwaia sip sma bara aikuki smalki taki waia”.
2. ¿Nahki natka ra smalkaia pliska kum silp bri ba yus munbia dakni baku smalkaia warkka tâ baikaia dukiara?
2 Smalkaia natka wala kum baku yus muns. Smalkaia pliska brisma ba wark takisma lamara sa taim, dinar piua ra apia kaka warkkam wina takma taim wih smalkaia sip sma. Smalki tataukra wala lamara wark taki sa kaka aikuki smalki taki waia sip sma. Bara smalkaia pliska silp brisma ba wamtla lamara sa kaka, pamalikam aikuki tutni taim wih smalkaia sip sma. Smalki taki waia aidrubanka kum ra waras kaka, smalkaia waras kainara Jehova wan tapahkbia dukiara, wan pura sunaia sa (Pil. 4:6). Sakuna, aitani sa diara ba ai pitka kat lukaia, bara kangrigisan daknika aikuki smalki taki waia sa, kan wik tnata ra muihni lakri nani ba kau smalkaia warkka tâ baikisa.
3. Smalkaia pliska kum silp briaia ba wina, ¿dîa yamnika sâkbia?
3 Yamnika nani. Smalkaia pliska kum silp brisma kaka, piu bani anira smalkaia pliska bri kama, bara ani awarka ra daukaia sip sma ba silp laki kaikma. Baku sin, kau taim brima smalkaia warkka dukiara. Bara tâ baiki smasmalkra apia kaka tâura smasmalkra awarka daukaia dukiara kau isi kabia. Baku sin, sim pliska kum ra smalkisa taim, kau nu takan dauki uplika nani lamam ra iwi uplika kabia bara kau isi kabia kli wih kaikaia Baibil stadika nani tâ krikaia dukiara. Piua kum kum ra, pliska silp brisma ba aima ailal smalkaia sut danh takma kangrigisan ra kli laki yabras kainara; bara upla wala naha pliska ba makabaia sip kabia. Kum kum wisa naha natka ba hilp munisa baha pliska ra iwi uplika nani wal kakaira takaia baku witin nani walaia kau wilin sa. Smalkaia pliska kum silp briaia ba man bara pamalikam ra hilp munbia smalkaia warkka takaskras kira daukaia (2 Ti. 4:5).