Smalkaia mata aidrubanka nani ba
1. Dia muni smalkaia warkka ba pain asla daukan kaia sa?
1 Jisas smalkan taim, sins bri asla daukan kabia tnatka kum ra daukata. Naiwa sin, tasba aiskara smalkaia warkka ta bri nani ba want sa baha tnatka kat sin daukaia. Baha mita, smalkaia auya daknika nani ba pain asla ai warkka daukbia dukyara, tasba aiska kangrigisanka nani sut ra smalkaia mata aidrubanka nani daukisa (Mat. 24:45-47; 25:21; Luk 10:1-7).
2. Smalkaia mata aidrubanka nani ra dia daukisa?
2 Yus tara brisa. Smalkaia mata aidrubanka nani dauki ba sika, wan kupia buki smalkaia warkka ba nahki lan pain daukaia wan wiaia dukyara daukan sa. Smalkaia tanka laka ra aisisa kaka, sip sa Yu Bani Tikska ba laki kaikaia. Baku sin, sip sa Gâd Warkka Dauki ba wina, apia kaka Razonamiento wihki Benefíciese bukka ba wina sin yus bri tanka kum kum sakaia. Ani ulbi sakanka upla mihta ra kahbi swiaia sip ba sin marikanka kum daukaia sip sa. Pura suni prakras kainara, sut nu takaia sa ya wal, bara anira sin smalkaia sa. Smalkaia mata aidrubanka ba 15 minit ra, apia kaka kau kunhku ra daukaia sa. Bara dan takisi muni, sut ba smalkaia mata wi kaia sa.
3. Smalkaia mata aidrubanka nani ba ya nani ta brisa?
3 Ya nani ta brisa? Smalkaia Warkka Pura Kakaira ba mita, smalkaia mata aidrubanka nani ba ridi kabia ta brisa. Satadi, sandi sin, dakni bani pura kakaira ba, apia kaka ai ta babaikra nani ba, Smalkaia Warkka Pura Kakaira wi ba kat ai daknika yula kahbi anira smalkaia pliska kum sakbia. Bara wik bilara sip sa yabaia almuk wihki help mamunra napakanka wala nani dakni nani ba ta bribia. Dakni bani anira wabia pliska kum yabaia ba Smalkaia Warkka Pura Kakairika mihta ra sa.
4-6. a) Smalkaia mata aidrubanka pliska saki ba, wihki smalkai pliska ba wal diaura wilkan sa ki? b) Smalkaia mata aidrubanka nani ba ahkia, anira sin daukbia ba ra luki, dia aman laki kaikaia sip sa?
4 Ahkia, anira sin daukisa? Smalki tasbaia pliska ba kasak smalkan kabia wisi, ban kra almuk nani ba kau pain kaikbia kangrigisan ul ba plis kumira baman aipaswi waia sirkara, smalkaia mata aidrubanka ba utla sat sat ra daukaia. Aidrubanka Watla ba sin sip sa naha dukyara yus munaia. Upla mawanra aisanka ba wihki Aihwakisa stadika ba dan takan minit kum kum ningkara, kangrigisan ailal ba, mahka smalkaia mata aidrubanka kum daukisa. Sip ba kat, trai munaia sa, smalkaia mata aidrubanka pliska sakan ba wina, smalkai pliska ba kat, uba laiura kabia apia. Smalki tasbaia pliska nani ba kasak pain smalkan kabia dukyara, ani wina taki wisa pliska nani ba aitani sa sapa, pat pat aman laki kaikaia sip sa.
5 Tasbaia piska smalki satka ba kaiki, sip sa wiaia ahkia, aima an, bara dia awarka ra sin na’sat aidrubanka nani daukaia nit sa. Nahamuna aidrubanka nani ba ahkia, anira sin daukaia kau pain sa sapa laki kaikaia wisi, naika makabi wali ba help tara kaia sip sa.
6 Kangrigisan smalki tasbaia piska tila wina, ani ba ra kau smalkaia nit sa? Utla utla smalkaia wisi ani awarka kau pain sa ki? Utla utla waia, apia kaka upla kli wih kaikaia wisi tutni kum sakaia nit sa ki? Ba’wina dia dia luki brin ba sut ulbi, maisapahkanka nani tatka ba ra pamaia sa. Kan Pâl win ba baku, yawan King laka smalki tataukra sut want sa wan tasbaia piska kasak pain smalki wiaia: “Naha tasbaia sut ra warkki ba sut daukri sa” (Rom 15:23).
7. Smalkaia mata aidrubanka ta brabrira pahpaya ba purara dia twilkanka brisa?
7 Nahki ta briaia sa. Smalkaia mata aidrubanka ba ta briaia wisi pain ridi takaia ba sika, Gâd warkka ba dukyara rispik laka marikisa. Aidrubanka nani na rait lan wan dauki sat, kuna bila prahni ra kaia sa. Awarka kat ta krikaia sa. Bara 10 wina 15 minit kat prais wihka kaia sa. Ta krikras kainara sin, ta brabrira ba bri kaia sa anira smalkaia wabia. Let aula nani ra bila kaikaia nit apia sa. Sakuna anira smalki bangwbia maisapahkanka kum lika swiaia sip sa. Aidrubanka na dan takbia wal baku, ul ba mahka smalkaia mata wi kaia sa. Aidrubanka ba kasak pain lan daukan sa kaka, baha yua smalkaia taki wan ba sut nu takbia ai warkka nahki pain sin daukaia (Sins.l 11:14).
8. Yawan dia tnatka ra sip sa smalkaia mata aidrubanka ta brabrira ba ra ta baikaia?
8 Aidrubanka ba ta baiki. Pana pana pain asla ta baiki wark takaia nit pali sa (Hibru 13:17). Sip ba kat, ta brabrira ba daukbia ya nit ba ai panika kum bribia. Kau lan smalki tataukra nani mita naha aidrubanka nani ra ta baikuya taim, uya lan apu kau raya nani ra sin help tara takisa. Bara sat sat smalki tataukra nani wal takaia wilin kaia ba sin help tara sa (Sins.l 27:17; Rom 15:1, 2). Yawan sut trai munaia sa awarka kat aidrubanka ra kaia. Yawan Jehova warkka ba rispik muni ba mita, bara wan muihni-lakri nani ra pas luki ba mita sin wan kupia nikbaisa naha sut laka mapara trai munaia (2 Kor. 6:3, 4; Pil. 2:4).
9. Taura Smasmalkra nani ba dia tnatka ra smalkaia mata aidrubanka nani ba ta baikisa ki?
9 Taura Smasmalkra nani ba sin ta baikisa. Taura Smasmalkra nani ba smalkaia mata aidrubanka nani na ta baikuya taim, kasak wan ta baiki diara tara kum sa. Wel, param sa, witin nani diara ailal daukaia brisa. Kan upla kli wih kaiki, stadi sin daukaia bri ba purkara, ai pamali wihki ai warkka bri ba main kaiki kaia sa. Baha mita, smalkaia mata aidrubanka bani kangrigisan ra dauki ba ta baikbia —kau pali yu bani daukisa kaka— makabaia apia sa. Ban sakuna, aidrubanka kum kum pan ta baikaia lika sip munisa kaia sa. Tnatka kum ra, smalkaia mata aidrubanka ba kul kum baku, sip munisa Taura Smasmalkra nani mita ai spirit pawanka ba, wihki kau lan takan tanka bri ba wala nani ra sin laki yabaia. Kan smalkaia warkka ra kau taimka yabi ba taka, kau lan uplika takan. Dia lan taki ba sip sa wala nani ra sin yuaia. Bara smalkaia warkka ra, wihki smalkaia mata aidrubanka nani ra uba lilia ban trai muni ba mita, tanka pain kum mangkisa. Rait pali wiaia sa, witin nani warkka dauki ba yawan sut dukyara kasak kulkanka tara brisa.
10. Dia muni smalki tataukra sut ba, ai kupia aiska ni smalkaia mata aidrubanka nani ba misar ta baiki kaia sa?
10 Jisas, ai disaipelka nani sin daukan baku, naiwa yawan sin smalkaia warkka taka kum baku kau pali utla utla smalki taukisa. Smalkaia mata aidrubanka nani ba wankisa pana pana wan kupia buki, kau lan takaia. Bahamna, smalki tataukra bani ba sip ba kat aidrubanka nani na misar ta baiki kaia sa (W.n 5:42; 20:20). Naha ta baikaia wisi, trai munpi wan kupia aiskakira ni dia dia wan mihta ra daukaia bri ba daukaia. Daukbia sa kaka, Jehova blisinka tara bribia, bara wan Ta Uplika Jisas Kraist kupia ba sin lilia daukbia. Kan yawan ba King laka sturka ba smalkisa (Mat. 25:34-40; 28:19, 20).