Awarka kat taukaia sa
1. ¿Jehova dîa samplika wankisa awarka kat taukaia dukiara?
1 Jehova diara sut ai piua kat daukisa. Sampla baku witin ai napakanka nani ra ai piua kat hilp munisa (Hib. 4:16). Baku sin spirit lâka pata ba “piua kat” wan dakakisa (Mt. 24:45). Baha mita, yawan kasak lukaia sip sa Ai lawanka yua ba ai piua kat balbia (Ab. 2:3). ¡Jehova awarka kat diara sut dauki ba kasak yamni wan munisa! (Law. 70:5.) Yawan ba mistikkira bara wan rayaka ra diara ailal dauki baman yu dimisa mita, karna wan munisa awarka kat tauki kaia. ¿Dîa muni trai munaia sa piu bani ra awarka kat tauki kaia?
2. ¿Dîa muni awarka kat taukaia ba Jehova ra mayunisa?
2 Naha yua tnata ra upla nani ba silp ai lukanka ba ra baman luki ba mita, silp alki takaskaia lâka âpu sa, bamna awarka kat taukaia lâka ba lap tiwan sa (2 Ti. 3:1-3). Bamna kristian baku yawan wan warkka, wan bisniska nani bara aidrubanka nani ra awarka kat wisa taim upla nani ba kaikisa, bara naha ba Gâd ra mayunanka yabisa (2 Pi. 2:12). ¿Naha ba pat wan takan sa? Wan warkka ra awarka kat wisa, sakuna aidrubanka nani ra lika lit wisa. Aidrubanka nani ra kau aiwanras bara pura sunra daukras kaina ra wabia kaka, marikisa yawan wan Aisa heven ra ba wal baku kaia want sa (1 Ko. 14:33, 40).
3. ¿Dîa muni awarka kat tauki kaia ba tânka sa wan walka dukiara luki ba?
3 Awarka kat taukaia ba tânka sa wan walka dukiara lukisa (Pil. 2:3, 4). Aidrubanka nani ra, smalkaia warkka aidrubanka nani sin, awarka kat aidrubisa taim, wan muihni lakri nani ra ambuk munbia apia. Baku sin uba piua bani ra lit taukisa kaka tânka marikbia wan taimka ba kau tara sa witin nani taimka ba wal. Awarka kat tauki kaia ba marikisa yawan ba kasak sa bara wark tatakra nani sa, naha daukanka painkira nani ba upla sut yamni kaikisa.
4. Piua bani lit taukaia trabilka brisa kaka, ¿dîa hilp wan munbia kau pain kaia?
4 Plis kum ra pat pat lit wisma kaka, mamkabi wals dîa muni. Awarkam nani ba pain ridi bris, dîa dîa daukaia lukram ba sut awarka kat daukma dukiara (Smas. 3:1; Pil. 1:10). Jehova ra hilpka makas (1 Jn. 5:14). Awarka kat tauki kaia ba tânka sa yawan naha Lâ wâl kau tara ba kulkanka yabisa: Jehova ra latwan kaikbia bara wan uplika ra sin (Mt. 22:37-39).