Mani 2015 Nahki Smalkaia ba Skulka ba hilp wan munbia wan smalkanka ba kau yamni daukaia

¹ Lawana âiulbra Debit win: “Bîli aisinka nani ba, kupi mununhtara lukisna ba sin, yarka man mamwanra briaia yamni kulkan kabia; Jehova, yang yukuwaiki walpaya tara, ai atki sasakra sma ba” (Law. 19:14). Yawan sin want sa wan bîla aisinka nani, bara diara kau manakira bri ba Kangrigisan ra tânka kasak ba dukiara aisaia bara smalkaia warkka ra sin dauki ba Jehova yamni kulkbia. Nahki Smalkaia ba Skulka ba natka kum sa Jehova yawan ra lan wan daukisa smalkaia warkka daukaia dukiara. Naha Skulka lan wan dauki aula ba, tasba aiska ra wik bani kangrigisan 111.000 nani ra daukisa. Baku sin, muihni lakri nani nisan sut, iwanka sât sât ba ra sturi yamni smalki tataukra lankira kaia, upla kupia lakaia sip uplika takaia, pain aisaia, bara tânkira lâka ni aisaia sât uplika kaia hilp munan sa (Ap.St 19:8; Kol. 4:6).

² Mani 2015 Skulka nahki kabia ba ra ulbi sakanka nani yus munbia ba, Baibil tânka ba ¿ani sa ki?, “Gâd Latwanka Laka ra Ban Bas” bara Yawan Sipsa God Panika Kaia! Baku sin, diara raya kum dauki kabia ba lika, Baibil Aisi Kaikanka ra tânka kum smalki ba, bara aisanka numba 1 piua ba kau wiria kabia. Aisanka kumi bani skulka ra nahki daukbia ba kaisa laki kaikaia.

³ Baibil Aisi Kaikanka. Naha aisanka tâ bribia uplika ba tu minit bri kabia tânka painkira kum bara wan rayaka ra nahki alki daukaia sip ba dahra aisaia. Naha tânka ba wikka bîla ra Baibil aisi kaikaia blikan ba wina sâkbia. Pain ridi takbia kaka, kangrigisan ra tânka painkira kum sir munaia sip kabia piua ba yaban bilka ra. Baha wina, Kangrigisan ba patitara dauki aula baku 6 minit bribia aisanka kum 30 sekan apia kaka kau wiria bilka ra aisaia. Naha tânka ba painkira kaia sa bara wikka bîla ra Baibil aisi kaikaia blikan ba wina sâkbia. Aisanka kum pain luki 30 sekan ra aisaia ba, nit sa yawan silp kaina manis ridi takaia tânkira lâka wal, baku daukbia kaka yawan kumi bani dukiara lan takaia natka kum pain kabia. Naha ba muihni lakri wala nani ra sanska yabia witin nani sin silp ai stadika wina dîa lan takan ba sir munbia.

⁴ Aisanka numba 1. Baibil aisi kaikaia dukiara taimka kau wiria alahban sa nanara 3 minit apia kaka kau wiria kabia, bara nanara kau kunhku kabia. Baha nani Baibil aisi kaikaia aisanka bribia ba aima ailal ai bîla baikra karna aisi kaikaia praptis munaia sa. Baku sin, aman kaikaia sa ulbanka nani nahki aisi ba kakahwras pain aisi sakaia, baku baman Baibil smalkanka nani ba pain walbia. Jehova napakanka sut ba trai munaia sa pain aisi kaikaia, kan aisi kaikaia ba wan mayunanka lâka ra uba nit pali sa. Uba lilia wan daukisa wan tuktika nani pain aisi kaiki ba, bara aisa yapti nani latwan lâka ni ai luhpia nani ra aisi kakaira nani pain takbia dukiara hilp muni ba ra kupia bukaia sa.

⁵ Aisanka numba 2. Naha aisanka ba mairin kum ra yabia bara 5 minit ra daukaia sa. Dîa ulbanka lalka daukbia yaban ba aisanka ba daukbia. Bara smalkisa pliska ra upla nani wal nahki aisi ba natka daukaia trai munaia sa. Baku sin, witin sip kabia Baibil borska wala nani aisanka tâ baiki ba yus munaia. Skulka tâ brabrira ba hilp mamunra kum pliki yabia.

⁶ Aisanka numba 3. Naha aisanka 5 minit ra daukaia sa, bara waitna apia kaka mairin kum ra yabaia sip sa. Kristian Mairin kum ra yabia taim, aisanka numba 2 baku daukbia. Kristian waitna kum ra yabia kaka, aisanka kum baku daukbia wali nani aidrubanka ra balan ba ra luki. Stadi tatakra ba ulbanka lalka yaban ba dukiara aisabia, bara Baibil tikska pain nani ba pliki tânka marikaia.

⁷ Kupia kraukanka ba. Stadi tatakra ba ai aisanka yabi danh takbia ningkara Skulka tâ brabrira ba 2 minit bribia bara Benefíciese bukka, wina kupia kraukanka hilp wan muni ba sâtka yabia. Skulka tâ bri uplika ba stadi tatakra kum aisanka yabia ba maisa pakbia taim, stadi tatakra ba diaura wark taki ba dukiara lika wibia apia. Aisanka bani danh takbia taim, skulka tâ brabrira ba ai kupia aiska ni stadi tatakra ra kupia buki bîla nani wiaia sa, stadi tatakra ba diaura wark taki kan ba maisa pakbia, bara ani pîska ra pain daukan ba saki wibia, apia kaka tânkira lâka ni marikbia dîa muni kau bahara wark taki kaia sa.

⁸ Stadi tatakra nani diaura wark taki ba dukiara Benefíciese bukka, wahia 79-81 ra tânka pliki sakaia sip sa. Aidrubanka danh takbia taim, stadi tatakra ba aisanka yaban kaka, skulka tâ bri uplika ba stadi tatakra bukka ra anira wark takan ba ulbi mangkbia bara stadi tatakra ba ra makabi walbia ejercicios nani daukaia taki kan ba daukan sapa. Baku sin, baha sanska ra apia kaka piu kau pain wala ra stadi tatakra ra kupia buki bîla nani bara hilpka wala nani sin yabia sip sa. Stadi tatakra nani ba mapara pain kabia skulka tâ bri uplika dîa dîa wibia ba spirit lâka ra kau pâwaia hilpka kum baku kaikbia (1 Ti. 4:15).

⁹ Stadi tatakra ba ai piua luan sa kaka, skulka tâ bri ba apia kaka hilp muni uplika kum mita sain munbia, ban kra bil lupia kum mangkbia, apia kaka pinsil kum brih plis kum ra tawa pruki kaia sip sa, baku rispik lâka ra stadi tatakra ra marikbia ai taimka ba pat danh takan sa. Baku takbia taim, stadi tatakra ba dîa aisi kan ba danh praki mahka bal iwaia sa (Benefíciese bukka, wahia 282, baiki.s 4 ba kaiks).

¹⁰ Ya nani Nahki Smalkaia ba Skulka dimaia ridi sa kaka, kupia bukisa mahka ai nina mangkbia (Benefíciese bukka, wahia 282, baiki.s 6 ba kaiks). Naha skulka ra dîa smalki ba Gâd uplika nani ra ridi daukan sa King lâka sturka yamni ba liliakira, rispik lâka mariki bara latwan lâka ni upla ra aisi smalkaia. Param sa, Jehova yamni kaikisa spirit lâka ra dîa lan taki ba Witin ra mayunaia dukiara yus munisa taim (Law. 148:12, 13; Ais. 50:4).