Smalkaia warkka kau pain daukaia sip sa: stadi tatakra nani ra lan daukaia silp diara tânka pliki kakaira takaia
¿Dîa muni daukaia sa? Spirit lâka ra pâwaia dukiara, Baibil stadi tatakra nani ba nit sa Baibil tânka tihu nani ba ai kupia bara ai sinska ra briaia (Hib. 5:12–6:1). Âu, stadi takaia dukiara sakripais kum daukaia sa, naha tânka sa, yawan dîa pat nu kan ba wihki namika lan taki ba wal laki kaikaia, bara nu kaia nahki alki daukaia (S.L 2:1-6). Stadi tatakra nani ba, dîa makabi wali ba ansika briaia dukiara, witin nani lan takaia sa, silp tânka pliki kakaira takaia. Witin nani dîa lan taki ba, ai kupia aiska ni wilin alki daukisa taim, tâ baikisa kristian lâka ra dîa traika kaikanka nani taki ba, pura luaia (Lk. 6:47).
Kati kum bilkara daukaia trai muns:
Sapta apia kaka ulbanka lalka sirpi kum danh takuma bara, stadi tatakra ra makas dîa tânka brin ba bîla prahni ra mai wibia. Baibil stadi tatakra kum âpu sma kaka, Baibil tikska kum kum apia kaka, La Atalaya baiki sakanka kum ra dîa aisi kaikisma tânka ba, trai muns asla dauki bîla prahni ra laki kaikaia. Naha daukma kaka, hilp mai munbia dîa aisi kaikisma ba kau pain tânka briaia.