Nahki sip sa wan walbia nani ra kupia alkaia
1. Disaipil nani ba Jisas smalkanka wal, ¿nahki ai dara walan?
1 Jisas ba witin ra wali kan nani kupia alkan, baku daukan ba ra, aima kumi ra pan, Baibil wisa disaipil nani kupia ba “lapta taki kan” ulbanka nani tânka ba klir walan taim (Lk. 24:32). Gâd bîla walaia dukiara, wan kupia wina takaia sa baha mita, ¿nahki sip sa wan stadi tatakra nani kupia bukaia ai rayaka ba sins munaia want kabia dukiara? (Ro. 6:17.)
2. ¿Nahki hilp wan munisa upla tânka briaia bara luki kaiki aisaia ai kupia alkaia dukiara?
2 Tânkira bara luki kaiki aisas. Dîa ba pain bara dîa saura baman wiaia ba upla rayaka ba sins munras. Baku sin, tiks ailal ai kuninka nani klir saki ba aisi kaikisa kaka, Baibil smalkanka ba mapara buaia sip sa. Witin nani kupia nikbaia dukiara, yawan pas tânka briaia sa dîa muni ai lukanka nani bara ai daukanka nani ba sât wala brisa. Makabi walanka nani pain luki wisa bara tânkira aisisa kaka, witin nani kupia bukbia wan wiaia dîa lukisa (S.L 20:5). Baku daukbia taim, sip kabia Baibil tikska nani pliki sakaia ai kupia alkaia dukiara. Baha mita nit pali sa witin nani dukiara lukaia bara bîla kaikaia (S.L 25:15). Nu bas, upla kumi bani spirit lâka ra pâwi ba, sim sât apia sa. Piu lubia nit sa Jehova spiritka holikira ba witin nani lukanka bara daukanka nani ra dimi sins munbia dukiara (Mk. 4:26-29).
3. ¿Dîa daukaia sip sa wan stadi tatakra nani kristian daukanka nani bribia dukiara?
3 Wan hilpka wal kristian daukanka bribia. Jehova yamni lâka bara ai latwan lâka tikska nani witin nani wal laki kaikaia ba, hilp munbia kristian daukanka nani tawa tawa briaia dukiara. Lawana 139:1-4 bara Luk 12:6, 7 sip sa aisi kaikaia. Jehova kupia pihni lâka bri ba upla kum rait pali pain ai tânka brisa taim, Gâd ra kau latwan kaikisa bara Witin dukiara kulkanka lâka bri ba kau pâwisa (Ro. 5:6-8; 1 Jn. 4:19). Baku sin, witin lan takisa dîa dîa daukbia ba, Jehova kaiki saura apia kaka pain ai dara walaia sip sa. Baha mita witin nani want kabia Gâd kupia lilia daukaia bara kulkanka tara yabaia (Law. 78:40, 41; S.L 23:15).
4. ¿Nahki Jehova samplika nina blikisa upla wala nani ra tânka kasak smalkisa taim?
4 Jehova upla kumi ra sin taibi munras sa ai bîla walbia dukiara, kau ni wan marikisa nahki sins lâka brisa ai smalkanka nani ba nina blikaia (Ais. 48:17, 18). Jehova samplika nina blikisa, stadi tatakra nani ba silp tânka kum sakaia hilp munisa taim. Baku daukbia kaka, witin nani ai rayaka ra dîa sins muni ba, ban kaia dukia kum kabia (Ro. 12:2). Baku natka ra, Jehova lamara kau balbia, Witin sika upla kupia lukanka nani laki kaikisa (S.L 17:3).