¿Muihni bara lakri nani diara ailal nu ba wina yawan dîa lan takaia sip sa?

Wan kangrigisanka ra kristian almuk nani piu aihwa wina Jehova warkka dauki ba bâra sa kaia sa. Witin nani Jehova ra kasak lukan lâka marikan ba wina yawan diara ailal lan takisa. Witin nani ra yawan makabaia sip sa wan wibia pas taim wan asla takanka ba nahki kan, bara Jehova karnika wal dîa trabilka nani pura luan sa. Pamali mayunra ba yawan daukbia taim, witin nani ra paiwaia sip sa bara ai rayaka sturka ba walaia.

Man ba piu aihwa wina Jehova warkka daukisma kaka, rayakam sturka ba wahma bara tiara nani ra aisas. Jekob bara Josep baku daukan, Jehova witin nani dukiara dîa daukan ba ai kiamka nani ra aisan (Bla.St 48:21, 22; 50:24, 25). Ningkara, Jehova bui aisa bara yapti nani ra makaban ai luhpia nani ra smalkbia witin sain karnakira nani daukan ba (Kli S 4:9, 10; Law 78:4-7). Naiwa piua ra, Jehova asla takanka ba wark pranakira daukan sturka ba aisa nani bara kristian wala nani bui wahma bara tiara nani ra aisaia sip sa.

WAN NINA BLIKI RAU WAN SAUHKBIA SIN YAWAN BAN ASLA SA LILKIKA BA KAIKBIA NINGKARA, NAHA MAKABI WALANKA NANI LAKI KAIKS:

• ¿Austria sucursalka ba muihni bara lakri nani ra nahki hilp munan ai kuntrika ra gabamint mita smalkaia warkka daukaia chanska yabras kan taim?

• ¿Muihni bara lakri nani na dîa daukan ai kasakka lukan lâka bapi briaia dukiara?

• ¿Rumania smalki tataukra ailal ba dîa muni Jehova asla takanka ba wina dakwi takan ki, kuna ningkara witin nani dîa muni kli asla takan?

• ¿Naha lilkika na nahki kasakkam lukan lâka karna daukisa?