Smalki tataukra kau lankira nani wina lan takaia

Rait pali smalki tataukra lankira nani kangrigisan ra bri ba diara kum tara sa. Kum kum ba mani ailal ai kasakka lâka dutki brih aula sa. Wala nani ban kra, bisi pali wina lan taki aula sa. Naha smalki tataukra nani ba kaiki aula sa nahki Jisas ba, kristian kangrigisanka tâ brisa naha yua tnata nani ra, piu bani ra kau smalkisa bara disaipil daukaia warkka sin (Mt. 28:19, 20). Witin nani smalkaia warkka dauki ba mita, Gâd wina karnika brin sa trabil nani mapara pura luaia dukiara (2 Ko. 4:7). Smalki tataukra lankira nani wina yawan diara manis lan takaia sip sa. Witin nani ra sanska yabisa taim, liliakira ai walka ra sir munisa dîa lan takan ba (Law. 71:18). Baku bamna, sanska plikaia sa witin nani wina lan takaia dukiara. ¿Nahki daukaia sip sa?

Smalkaia warkka ra. Smalkaia warkka ba pain daukaia dukiara, raya nani bara kau wiria lan banhwi ba nit sa kau lan daukbia. Yawan naha smalki tataukra lankira nani ra kaiki nahki ai warkka dauki ba wina diara ailal lan takaia sip sa. (La Atalaya wauhkataya, Kuswa kati 15, 2015 “Cómo mantener el entusiasmo en la predicación” ulbanka lalka mununhtara, baiki sakanka yumhpa ra “Ayude a los nuevos” ba laki kaiks.) ¿Smalki tataukra lankira nani wal smalki wina yamnika manis sakram sa?

¿Smalki tataukra lankira kum ra man wal smalki taki waia paiwaia sip sma ki? Smalki tataukra ba sikniskira sa kaka, sip sma stadikam tila wina kum smalki tataukra watla ra wih daukaia. Stadika danh takbia taim, smalki tataukra lankira ba ra makabi wals stadika dukiara nahki kaikan bara kupia kraukanka kum brisa sapa.

Witin nani wal piu luaia. Smalki tataukra lankira nani wal kau pain kakaira takaia dukiara taim sakaia sma. Pamali Mayunra daukma taim, witin nani ra paiws bara witin ra makabi walanka nani dauks. Smaki tataukra ba siknis sa kaka, witin wal aisi, ¿Pamali Mayunra ba ai watla kat lilia luaia sip sa? Trai muns nu takaia nahki witin Jehova Witniska takan ba. ¿Dîa blisinka nani brin sa? ¿Ai pliska kat nahki smalkaia warkka ba pâwisa? ¿Jehova ra mayuni ba wina dîa yamnika sakan sa?

Smalki tataukra lankira kabia sin sakuna ai swapnika nani brisa, baha mita bîla kaikaia apia sa hilpka ailal wankbia. Yawan sut baku piu aiska bri smalki tataukra nani ba hilpka ailal yabia dukia manis brisa smalkaia warkka ra (Ro. 12:6-8). Kum kum ba pat almuk takan sa, bara yawan wal taim uba luaia sip apia kabia. Sakuna, yawan sip sa witin nani wina diara ailal lan takaia, kan witin nani diara ailal lan takan sa piu wihka wina Jehova kupia lâka dauki ba mita.