Naha tasba tnata aimaki ba ra si bripara

Jehova naha tasba ra wihka bîla kaikan lâka bri ba tisku danh takbia. Naha takbia taim, rilidian kuninkira nani sut sauhki tikbia, kuntri nani asla takanka daknika ba Gâd uplika nani mapara bubia, bara Jehova Armagedan ra upla saurakira nani sut ra sauhki tikbia. Yawan sut naha dukia pranakira nani takbia wan kupia aiska wal bîla kaikisa.

Âu, pât tara piua dukiara yawan diara sut lika nu âpu sa. Tânka kum baku, ahkia tâ krikbia yua pali lika nu âpu sa. Baku sin dîa tâwan gabamint nani rilidian mapara bubia nu âpu sa. ¿Gabamint nani Gâd uplika nani mapara bubia taim, piua an kabia, bara dîa takbia ki? Bara ¿Armagedan ra upla saurakira nani sauhki tikbia dukiara, Jehova dîa daukbia ki? Yawan baha nani nu âpu sa.

Sakuna kainara dîa takbia ba ra si briaia apia sa, kan Baibil ba yawan âuyapah briaia dukiara dîa nu takaia nit ba sut wan wisa. Nahaura luks, yawan nu sa “tnata yua nani ra” pat iwisa (2Ti 3:1). Baku sin nu sa, rilidian nani mapara bubia taim, rilidian rait aihwa ba bapi bubia dukiara, baha piua “prahni” kabia (Mt 24:22). Yawan kasak lukisa Jehova ai uplika nani ra swaki sâkbia (2Pi 2:9). Bara pain nu sa, upla saurakira nani ra sauhki tikbia dukiara, bara kwâra tara Armagedan ra swaki sâkbia dukiara, Jehova upla kasakkira bara karnakira kum ra wahbi sakan ba (Par.M 19:11, 15, 16).

Naha dukia nani takbia taim, upla nani sibrin tâka ai kupia lap tiwbia (Lk 21:26). Sakuna yawan nani lika apia. Jehova luan piua ra ai uplika nani ra nahki swaki sakan, bara kaina piua dukiara dîa wan wi ba yawan aisi kaiki aman lukisa kaka, sip kabia Luk 21:28 dîa wi ba kasak pali daukaia: “Kupiam karna dauki, lamla ba purara buks, kan pri sakan lâka ba pat baila sa”.