¿Jehova witniska nani lukisa Gâd yua 6 ra baman naha tasba ba paskan?

Apia, yawan baku lukras sa, yawan Jehova witniska nani ba kasak luki banhwisna, Gâd diara sut paskan, sakuna diara sut ba yua 6 ra baman paskan lukanka ba lika yawan tâ baikras sa. ¿Dîa muni? Kan naha lukanka ba, Baibil dîa smalki ba wal asla apia sa, kaisa lukanka wâl dukiara laki kaikaia:

1. Yua 6 tasba paskanka bilkara piua an bri ba. Kum kum lukisa baha yua 6 nani ba kumi bani 24 awar brisa. Sakuna Baibil ba yua bîla yus munisa taim piua yari kum dukiara aisisa (Blasi Sturka 2:4; Lawana Nani 90:4).

2. Tasba ba piua an bri ba. Kum kum lukisa naha tasba ba mani milian kum kum baman brisa. Ban sakuna Baibil smalkisa, yua 6 nani ra Gâd diara nani paskaia tâ krikras kan kainara, tasba bara kasbrika ra dîa bâra ba sut pat paskan kan (Blasi sturka 1:1). Baha mita cientifik nani ba, naha tasba ba mani milian pura milian brisa tânka aisi ba Jehova witniska nani ba mapara aisaras sa.

Au rait sa, yang nani Jehova witniska nani ba, Gâd ba diara sut paskan kasak lukisa ban sakuna, cientifik nani ba dîa aisi ba mapara apia sa, kau ni kasak luki banhwisna witin nani dîa aisi ba Baibil wal asla sa.