¿Jehova witniska nani ba Baibil ba chens munan sa witin nani dîa luki ba wal asla kabia dukiara?
Apia pali, yawan baku daukras sa, kau ni yawan dîa kasak luki ba Baibil smalkanka nani wal asla apia sa taim yawan dîa luki ba chens munisa.
Yawan dîa kasak luki ba Baibil ra ai bapanka brisa, 1950 manka ra yawan Traducción del Nuevo Mundo Baibilka ba sakan, sakuna baha daukras kainara yawan pat Baibil tihu ra stadi taki banhwi kapri bara baha daukaia dukiara baha piua ra Baibil lakanka bri kan nani ba yus muni banhwi kapri. Traducción del Nuevo Mundo Baibilka ba briras kainara yang nani diara kasak luki kan ba kaiks, bara naha lukanka nani ba Baibil wal asla sa sapa man silp laki kaiks:
Yawan dîa kasak luki ba: Gâd yumhpa kumi ra apia sa. 1882 manka julio kati ra Zion’s Watch Tower wauhkataya ba (naiwa piua ra La Atalaya nina mâkisa) naku win: “Wan aisi kakaira nani ba nu sa yawan Jehova Gâd, Jisas bara spirit holikira ra kasak lukisa, sakuna Gâd yumhpa kumi ra smalkanka ba yawan tâ baikras sa bara upla kum kum lukisa Gâd kumi ra upla yumhpa ra sa, naha smalkanka Baibil mapara sa”.
Baibil dîa smalki ba: “Jehova wan Gâdka ba Gâd kumi sa” (Kli Smalkanka 6:4, Reina-Valera [RV], 1865). “Ban sakuna, yawan mapara lika Gâd kumi baman sa, baha sika wan Aisa. Bara Aisa ba diara sut paskan, yawan na lika witin dukiara raya iwisa. Dawan sin kumi baman sa, baha sika Jisas Kraist. Witin mita diara sut ba bâra sa, bara witin bâk yawan raya iwisa” (1 Korint 8:6, Dawan Bîla Aiska). Bara Jisas witin dukiara naku aisan: “Aisa ba witin kau tara sa yang ba wal” (Jan 14:28, Torres Amat, 1823).
Yawan dîa kasak luki ba: Saura dadaukra nani ban kaia ra hil pauta ra panis wauhras. 1882 manka junio kati ra Zion’s Watch Tower wauhkataya ba ulbanka kum sakan bara naha lalka ba bri kan “Saurka ba mita mana baku wangki ba lika prura” bara baha lalka ba Roman 6:23 wina sakan, baha ulbanka ba naku aisan: “Naha bîla nani ba klir sa bara tânka briaia isi. Upla manis ba kasak lukisa Baibil ba Gâd bîla sa, kuna sim piua ra witin nani dîa aisi ba Baibil smalkanka nani mapara sa, kan witin nani kasak lukisa Baibil ba smalkisa saurka mana ba hil pauta ra ban kaia ra pât wahwaia sa”.
Baibil dîa smalki ba: “Ya saura dauki ba baman prubia” (Isikiel 18:4, 20, Dawan Bîla Aiska). Gâd waihla nani ba ban kaia ra pât wahbia yabia apia kau ni, Baibil wi ba baku “ban kaia ra sauhki tikan pâtka wal klala yan kabia” (2 Tesalonaika 1:9, Dawan Bîla Aiska).
Yawan dîa kasak luki ba: Gâd Kingka lâka heven ra gabamint kum sa, wan kupia bilara lika apia sa. 1881 manka diciembre kati ra Zion’s Watch Tower wauhkataya ba Gâd Kingka lâka dukiara naku win: “Baha Kingka lâka bapi mangkbia piua ra tasba gabamint wala nani ra sauhki tikan kabia”.
Baibil dîa smalki ba: “Baha kingka nani dauki yua nani ra kasbrika purara Gâdka ba king lâka kum bukbia bara ban kaia ra sauhki tikan kabia apia, nisan wala kumi mita sin pura lubia apia, ban sakuna, king lâka wala nani sut ra pura lubia, bâra ban kabia ban kaia ra” (Daniel 2:44, Dawan Bîla Aiska).
¿Jehova witniska nani dîa kasak luki ba Traducción del Nuevo Mundo Baibilka baman tâ baikisa ki?
Apia, yang nani Jehova witniska nani ba wan kasakka lukan lâka smalkaia dukiara Baibil lakanka sât sât ban yus muni banhwisna. Rait sa upla nani ra Baibil stadi takbia kupia bukisa taim mana luha Traducción del Nuevo Mundo Baibilka ba witin want sa kaka yabaia wilin sa, ban sakuna upla kum Baibil lakanka wala yus munaia want sa kaka yang nani aihka lukras bara Baibil stadika yabaia wilin sa.