Sturka 46

Jeriko Tnaya Kutbanka Nani Ba

DIA mita munan Jeriko tnaya kutbanka nani ba kauhwisa? Bum tara kum purara kauhwan talia sa. Sakuna baha pyua ra kau bum, bara kanyun nani sin apu kan. Naha ba Jehova sainka wala kan! Kaisa nahki takan sapa kaikaia.

Wals Jehova mita Jasua ra dia win ba: ‘Man, bara war aiklaklabrikam aikuki taun tnaya kutbanka ba ra wapi bangws. Yu 6 bilara, yu bani aima kum wapi taui bas. Lâ aisi daukan arkka ba brihwi bas. Prîst 7 nani ba arkka taura wapi, syîp aringka nani ba puhbi waia sa.’

‘Sakuna yu 7 ba, taun tnaya kutbanka ra 7 taim wapi bangws. Bara syîp aringka nani wal wihka puhbi bangws, bara war aiklabaisma baku puram wini bangws. Bara tnaya kutbanka nani ba kauhbia!’

Jasua bara taun uplika nani ba Jehova win ba baku dauki bangwan. Wapi kan pyua ra, sut ba sap bangwi kan. Dis syîp aringka puhbi kan ba, bara mina binka nani taki kan ba baman walaia sip kan. Jeriko ra waihla nani ba sibri kan kaia sa. Kiwa pauni kum windar ra paman ba, kaikaia sip sma ki? Baha ba ya windarka kata ki? Au, biki kakaira wal ba mita Rahab ra dia win kan ba kat daukan kan. Ai pamalika aiska ba watla bilara aihwaki bangwi kan.

Las kat, yu 7 ra, witin nani aima 7 wapi tauan pyua ra, syîp aringka nani ba puhban, aiklaklabrika nani ba ai pura wini bangwan, bara taun tnaya kutbanka nani ba kauhwan. Bara Jasua win: ‘Upla nani ba iks bara taun ba angki bangws, bilara dia ba sut aikuki, sakuna silba, gul, bras bara ayan ni daukan dukya nani ba, tempel dukya sa.’

Bara biki kakaira wal ba ra, Jasua mita win: ‘Rahab bara ai pamalika aiska ba, watla wina saks.’ Bara biki kakaira nani ba mita pramis munan kan ba baku, swakwi taki bangwan.

Jasua 6:1-25.