Lasa nani ba upla aîkra bangwisa!

Setan bara lasa nani ba, pyu bani ra panis mamunra bara pât dadaukra bangwisa. Pyu wihka luan ra, Setan mita Job daîwra bara albika nani ra sin ikan. Bara “pasa tara kum” wal, Job luhpia 10 utla bilara kan ba, sut ra ikan. Ningkara Setan “mita Job purara siknis saura blikan, taya ra mina wina lal kat yukri takan”. (Job 1:7–19; 2:7.)

Jisas pyua ra lasa nani ba upla kum kum ra bilas bara nakra blain dauki bangwi kan. (Matyu 9:32, 33; 12:22.) Waitna kum ra lasa pruki, yaban ai wîna ra walpa wal klaki kan. (Mark 5:5.) Tukta kum ra ‘lasa pruki’, yaban kisbi bara ‘tasba ra lulki sabi kan’. (Luk 9:42.)

Sitan bara lasa nani ba Job ra siknis saura ai taya ra yabisa, bara upla kum ra bataki lasa prukisa — Pyu luan ra, lasa nani ba upla kum kum ra munan siknis taki kan bara wala nani ra pruki bataki tatatwi wakia aubi muni kan

Naiwa yuara pyu bani ra baku, Setan bara lasa nani ba upla aîkra pali bangwisa. Bamna, ai daukanka saura ba kau ailal daukisa heven wina lulkan ba wina. Sturi nani tasba aiskara taki bara marikisa ai saurka paniskira pali wal dauki ba. Upla kum kum ra siknis saura wal prukisa. Wala nani ra trabil munisa tihmia yaban yapras bara yaprisauhkan saura kaiki bakku. Wala nani ra rug munisa. Bara wala nani ra krisi, upla aîkra kabia, apia kaka silp ai wîna ra ikbia munisa.

Lasa nani ba waitna kum ra munisa rau mamunra takbia, bara waitna kum ra sirang ikisa yapri sauhkan saura kum wal — Naiwa pyua ra lasa nani ba upla kum kum ra yaban praut wal diara nani ba daukisa; wala nani ra trabil munisa yaprisauhkan saura kaiki bakku

Lintina, Surinam kuntrika ra iwi ba aisisa, lasa apia kaka spirit saura kum mita ai pamalika tila wina 16 ra ikan, bara witin ra ai wîna tara ra ai sinska lukanka nani ra mani 18 baku panis muni kan. Witin ra takan ba tanka kaiki wal aisisa, lasa nani ba “panis muni latwan yabaia bara upla nani ikaia lihkisa”.

Sakuna Jehova sip sa Setan saura munanka ba wina ai napakanka nani ra kaina kahbaia. (Sins laka 18:10.)