Lisin 3

Yawan God ra kakaira kaia

God panika nani kaia sa kaka, yawan kakaira takaia sa. Wan panika nani ba wan nina nusa bara sin yus muni bangwi sa, rait apia? Bamna God sin brinka sa yawan ai nina ba nu taki bara yus munaia. God nina ba Jehova sa (Salmo 83:18; Matyu 6:9). Baha purkara, yawan nu takan kaia sa dia witin want ba bara dia want apia ba. Ya nani ba ai panika bara ya nani ba ai waihla ba. Kan upla kum ra kakaira pain takaia ba piu wihka bri ba bui. Baibil ba wisa piu saki Jehova ra kakaira takaia ba sinskira sa.​—Efesus nanira 5:​15, 16.

God panika nani ba witin dia ai brinka bri ba dauki bangwi sa. Panikam nani ra luks. Man bui witin nani ra saura munma kaka bara ai brinka apia nani ba daukma sa kaka, panikam nani ban bangwi kabia ki? Apia pali! Baku sin, yawan God panika nani kaia want sa kaka, witin dia brinka bri ba yawan daukan kaia sa.​—Jan 4:24.

Rilidian nani ba sut sip hilp wan munras sa God panika nani kaia. Jisus, God panika kau pain ba, yabal wal dukiara aisan. Kumi ba bila tara bara upla bangki sa. Naha yabalka na sauhki tikanka laka ra brih wi sa. Wala ba bila sirpi sa bara witin kau upla wiria baman impaki bangwi sa. Baha yabalka ba raya ban kaia laka ra brih wi sa. Naha tanka ba yawan God panika laka briaia want sa kaka, yawan nu takaia sa ani tnatka kasak ba wal mayunra yabaia.​—Matyu 7:​13, 14.