Lisin 10

Nahki rait aihwa rilidianka ba sakaia

Yawan God wal pâna takaia brinka sa kaka, rilidian kum God aitani kaiki ba alki brih daukaia sa. Jisus win: “rait aihwa ai pura suni mayuni bangwi ba” God ra ai pura suni mayunbia “rait” ba wal (Jan 4:​23, 24). Tnatka kasak ba kumi baman sa God ra mayunaia (Efesus nanira 4:​4-6). Rait aihwa rilidianka ba raya bankaiara brih wisa, bara kunin rilidianka ba sauhki tikaia lakara brih wisa.​—Matyu 7:​13, 14.

Yawan nu takaya sip sa ani ba rait aihwa rilidianka ba upla nani alki brih dauki bangwi ba. Kan Jehova pain ba mita, witinra rait aihwa laka wal mayuni nani ba sin pain bangwi kaia sa. Andris dusa pain kum ai ma pain nani saki baku, rait aihwa rilidianka ba upla pain nani saki sa.​—Matyu 7:​15-20.

Jehova panika nani ba rispik tara brisa Baibil ba. Nu bangwi sa Baibil ba God wina aula. Baku mita, swisa naha na ai rayaka ta bribia, ai patka nani wapnika mankbia, bara hilp muni bangbia Godra kau kakaira takaia (2 Timoti 3:16). Baha purkara, traikaiki bangwi sa daukaia witin nani smalki bangwi ba.

Jehova panika nani ba pana pana ai latwan bangwi sa. Jisus marikata upla nanira latwan kaiki kan God dukiara smalki bara siknis kira nani raki. Rait aihwa rilidianka alki brih dauki bangwi ba upla wala nanira sin latwan kaiki sa. Jisus baku, upla umpira nanira bahki kulkras kiamka apia kaka nisan wala nanira sin apia. Jisus wisata upla ba nu kabia ya nani ba ai disaipilka nani pana pana latwan kaiki bangwi ba wal.​—Jan 13:35.

God panika nani ba Ai nina tara kulki sa: Jehova. Yakra wan nina yus munaia want apia sa kaka, wan panika asla pali kabia ki? Apia pali! Yawan pâna kum bri taim, ai nina maki yawan wini sa bara witin dukiara pain aisi sa wala nanira. Baha mita, God wal ai panika kaia brinka brih bangwi kaka ai nina ba yus muni bangwan kaia sa bara witin dukiara aisan kaia sa upla wala nanira. Jehova wantsa yawan baku daukbia.​—Matyu 6:9; Roman nanira 10:​13, 14.

Jisus baku, God panika nani ba upla nanira smalki bangwi sa God Kingka laka dukiara. God Kingka laka ba heven gabamintka sa Tasba na paradais kum daukbia. God panika nani ba upla wala nanira mariki bangwi sa naha God Kingka laka sturka yamni dukiara.​—Matyu 24:14.

Jehova Witniska nani ba traikaiki bangwisa God panika nani kaia. Baibil ra rispik muni bangwi sa bara pana pana ai latwan bangwi sa. Baku sin God nina ba yus muni bara tara kulki bangwi sa bara smalki bangwi sa upla wala nanira God Kingka laka dukiara. Jehova Witniska nani ba naiwa rait aihwa rilidianka alki brih dauki bangwi sa Tasbara.