Lisin 6
Paradais Ba Baila Sa!
Diara saura nani Tasbara taki ba mariki bangwisa Paradais ba baila sa. Patitara wina Baibil wan win yawan nani piu saura nani kaikbia Paradais balaia kaina palira. Nanara yawan baha piua nanira iwi sa! Naha nani sa diara kum kum Baibil win taki bangbia ba:
War tara nani: “Nisan kum nisan wala mapara bara king laka kum king laka wala mapara bubia” (Matyu 24:7). Naha dahra aisanka na aimakan sa. 1914 manka wina, war tara wal takata tasba aiskara bara war wala kau sirpi nani ba sin ailal. Upla milian nani prui bangwan baha ra.
Siknis nani uba ilihwan sa. “Siknis nani sat sat plis ailal ra” bara kabia (Luk 21:11). Naha sainka na aimakan sa ki? Ao. Kiansa ba, kupia sikniska nani, pusa sikniska ba, rih siksa, SIDA, bara siknis wala nani bui upla milian nani ikan.
Plun nani apu. Tasba aiskara upla barasa plun aitani briras sa piaya. Upla milian nani plun bla prui bangwi sa mani banira. Naha na sain wala sa Paradais ba tisku pali naha ra kabia. Baibil wisa: “Plun wauhwan tara bara kabia”.—Mark 13:8.
Tasba nikbanka nani. “Tasba nikbanka nani plis kumi wina plis wala ra bara kabia” (Matyu 24:7). Naha na sin aimakan sa wan piuara. Upla nani milian kumi purkara prui bangwan tasba nikbanka nani taka mita 1914 manka wina.
Upla saura. Upla nani ba ‘lahlara latwan kaiki bangbia’ bara ‘klauna ai wînara latwan kaiki bangbia’. ‘Wîna brinka nanira kau latwan kaikbia God ra wal.’ “Luhpa nani ba ai aisa nani bila walras kabia” (2 Timoti 3:1-5). Kaikras sma upla nani ailal bara sa baku naiwa piuara? God ra rispik munras bara witin dukiara lan takaia trai kaiki bangwi nanira trabil muni sa.
La pura luanka. Baku sin “la krikanka ba ailal kabia” (Matyu 24:12). Bankra aitani lukma la pura luanka ba ailal takan sa naha manka las nanira. Plis nani sutra, upla nani ra dukia implikaia sipsa, kunin munbia apia kaka saura munbia.
Naha sutna marikisa God Kingka laka ba pat baila sa. Baibil wisa: “Naha dukia nani takan kaikisma bara, damra wali bangwi bas God kingka laka ba pat baila sa” (Luk 21:31). Sakuna dia sa God Kingka laka ba? Baha sika God gabamintka heven wina ba naha Tasbaika na Paradais kum daukbia. God Kingka laka ba upla gabamintka nani sut pliska alki bribia.—Daniel 2:44.