Lisin 7

Luan dukia ra kupia kraukanka kum

Jehova swibia apia upla saura nani Paradais sauhki tikbia. Ai panika nani ba baman bahara iwbia. Upla saura nanira dia takbia ki? Ansika nu takaia dukiara, kaisa yawan Noa sturka rait aihwa ba kaikaia. Mani tausin nani luanra Noa iwi kan. Waitna kum pain kan piua sutra ai karnika nani aiska wal trai kaikan Jehova kupia laka daukaia. Sakuna Tasbara upla wala nani iwi nani ba ai daukanka saura bri bangwi kan. Baha mita, Jehova Noa ra win lisamra tara kum brih balaya upla saura nani ba sut sauhki tikaia. Baku sin Noa ra blikan daukbia ark kum prui bangbia apia dukiara witin bara ai pamalika sut Lisamra tara balbia piuara.​—Genesis 6:​9-18.

Noa bara ai pamalika aikuki ark ba paski bangwan. Noa upla wala nanira maisa pakan Lisamra tara balai ba dukiara, sakuna kumi sin walras kata. Ban saura dauki bangwi kan. Noa ark dan daukan taim, bahara daiwan nani dinkan, bara ninkara witin bara ai pamalika aikuki dimi bangwan. Bara, Jehova pasa tara kum brih balan. Kakna 40 bara tihmia 40 li auhwan. Li ba Tasba aiska dinkan kata.​—Genesis 7:​7-12.

Upla saura nani ba ai rayaka tiki bangwan, sakuna Noa bara ai pamalika aikuki swakwi bangwan. Jehova witin nanira main kaikan Lisamra tara piuara bara Tasba kum saurka wina klin bara brih wan (Genesis 7:​22, 23). Baibil ba wisa naika piuara Jehova kli sauhki tikbia la kat daukaia want apia nanira. Upla pain nani ba sauhki tiki bangbia apia. Tasbara bankaiara iwi bangbia Paradais daukanka kumra.​—2 Piter 2:​5, 6, 9.

Naiwa yua, upla ailal diara saura nani dauki sa. Tasba na pât nani bangki sa. Jehova ai Witniska nani blikisa aima banira upla nani kupia kraukaia dukiara, sakuna aihkika ba Jehova bila nani walaya want apia sa. Ai iwanka tnatka sins munaia want apia bangwisa. God bui sin wibia want apia sa dia rait bara dia rait apia ba. Dia takbia naha uplika nanira? Sins taki bangbia yu kum? Witin nani wina ailal sins taki bangbia apia. Pat lamara aula upla saura nani sauhki tikaiba yua bara piu kumira sin raya iwi bangbia apia.​—Salmo 92:7.

Tasba na sauhkan kabia apia; witin ba paradais kum daukan kabia. Ya nani God panika nani taki bangbia ba Paradaisra bankaiara iwi bangbia naha Tasbara.​—Salmo 37:29.