Lisin 11
Yawan kunin rilidianka ba want apia wiaya sa
Sitan bara ai lasi ka nani aikuki want apia bangwi sa yawan God dukia daukbia. Trai kaiki bangwi sa God wina laihura sakaia upla nani an pali sip ba kat. Nahki witin nani trai kaikisa daukaia? Tnatka kum wal daukaia sip ba kunin rilidianka ba (2 Korint nanira 11:13-15). Rilidian kum ba kunin sa Baibil wina rait ba smalkras kaka. Kunin rilidianka ba kunin lahla ka baku sa: rait aihwa baku kaia sipsa kuna yus apu. Kau pali ba, sipsa pât nani ailal wan bribalaia.
Rilidian kuninka laka ba Jehova ra yamni yabaia sip apia sa, rait laka God ka ba. Jisus Tasbara kan taim, baha piuara rilidian ta bri bangwi kan nani bui ikaia muni bangwan. Witin nani luki bangwi kan ai mayunra tnatka ba rait pali kata. Aisi bangwi kata: “Yawan Aisa kumi bri sa, God”. Sakuna Jisus baha wal aitani luki kata? Apia! Witin nanira pana win: “Man nani aisikam Dibil wina atia sma” (Jan 8:41, 44). Naiwa yua, upla nani ailal luki bangwi sa God ra mayuni bangwi sa, sakuna rait pali ba Sitan bara ai lasi ka nani wal ra dukia dauki bangwi sa!—1 Korint nanira 10:20.
Dus sukwan kum ma nani saura saki baku, kunin rilidianka ba upla saura dadaukra nani baman saki sa. Tasba na pât nani bangki sa upla diara saura nani dauki ba bui. Sunu apia laka bara sa, aiklabanka nani, implikan nani, taibi munaia nani, upla ikanka nani bara alki saura munanka nani. Upla nani ailal naha dukia nani dauki bangwi ba ai rilidianka bri bangwi sa, sakuna naha rilidianka witin nanira nikbras sa diara yamni daukaia. Sip apia bangwi sa God panika nani takaia diara saura nani dauki bangwi ba swiras sa kaka.—Matyu 7:17, 18.
Kunin rilidianka ba uplara smalki sa aidol nanira ai pura sunaia. God wan wisa yawan aidol nanira wan pura sunaia apia sa. Naha ba aitani sa. Yawan brinka kabia upla kum wan aisaras sakuna wan lilkara lika aisi kaka? Sip kabia baha uplika ba wan panika kaia? Apia, sip apia kabia. Jehova wantsa upla nani ba witinra aisi bangbia, paski daukanka kum ra sin apia, lilka kum rayaka apu bara sin apia.—Exodo 20:4, 5.
Kunin rilidianka ba smalki sa upla wala nanira ikaia sip sa war piuara. Jisus win God panika nani ba pana pana ai walka nanira latwan kaiki bangbia. Yawan upla nanira latwan kaiki bara iki bangras (Jan 13:35). Upla saura nanira kat sin aitani apia sa ikaia. Jisus waihla nani witinra alkaia wan taim, witin swiras kan ai disaipilka nani ai tawan aiklabia diara munbia apia dukiara.—Matyu 26:51, 52.
Kunin rilidianka ba smalki sa upla saura nani ba il pauta ra panis brih bangbia. Ban sakuna, Baibil ba smalki sa saurka laka bui prura ra brih wisa (Roman nanira 6:23). Jehova ba latwan laka God ka kum sa. Latwankira God ka kum ba bankaiara upla nanira panis munbia? Apia pali sa! Paradais ra, rilidian kumi baman kabia, Jehova aitani kaiki rilidianka ba (Reveleshen 15:4). Rilidian nani sut Sitan kuninka ra ai plamaia bri bangwi ba tiwi bangwan kabia.