Kingka Laka Sturka Num. 37

Maisa Pahkanka Kum Upla Sut Dukyara

Rilidian Kuninkira Tnata Aimakanka ba Pat Baila Sa!

▪ Rilidian kuninkira tanka ba dia sa ki?

▪ Nahki tnata aimakbia ki?

▪ Man rayakam ra dia kabia ki?

Rilidian kuninkira tanka ba dia sa ki?

Rilidian mita lâ krikanka nani dauki ba dukyara kupiam ra uba lukisma ki? Naiwa pyua ra upla nani Gâd ra lukisa wi nani ba wâr ra dimisa, upla ra sibrin dingki rau muni banghwisa bara warbanka nani sin daukisa. Man baha kaikisma bara saura damra walras sma ki? Dia muni rilidian nani ba wina trabil ailal nani bal takisa ki?

Pâtka ba sika rilidian satka sut nani ra lika apia sa, sakuna rilidian kuninkira ra baman. Jisas Kraist bui win, rilidian kuninkira ba daukanka saura nani baman sakisa, “dus saura” kum baku “ma saura baman sakisa” (Matyu 7:15–17). Dia sat ma ba rilidian kuninkira ba sakisa ki?

Rilidian kuninkira ba, naha nani daukisa:

■ POLITIK BARA WÂR NANI RA DIMISA: Asiaweek piriudikuka ba naku ulbi win: “Asia ra bara plis wala nani ra sin, tâ uplika karnika brin dauki nani ba swira apukira, rilidian uplika lukanka nani ra, taibi bri yus munisa witin nani ai painka dukyara”. Baha ba mita, piriudikuka ba pura praki aisi win: “Naha tasba uplika nani ba krisi takisa talia sa”. Miriki kuntrika ra serts tâ upla kum mita win: “Upla ikanka takaskbia dukyara, sibrin dinki rau munanka laka dauki nani ra pas ikaia sa”. Witin lukanka ra trabilka ba wapni mangkaia dukyara naha sa: “Gâd nina ra, witin nani sut ra iki banghwaia”. Ban sakuna, Baibil bila: “Bamna upla kum wisa: ‘Yang lika Gâd ra latwan kaikisni’, kuna ai muihni ra misbara kaikisa kaka, witin lika kuninkira pali sa” (1 Jan 4:20). Jisas pali sin win: “Waihlam nani ra latwan kaiki bas” (Matyu 5:44). Rilidian an man kakaira sma ai uplika ra wâr ra blikisa?

■ LUKANKA KUNINKIRA SMALKISA: Rilidian ailal nani smalkisa upla pruya bara, ai sulka apia kaka ai spiritka ba raya takaskisa. Baha smalkanka nani wal naha rilidianka nani ba ai uplika ra lalah dakbisa, bara lalah makabisa upla pruan sulka nani tnata mana pura sunra daukaia dukyara. Ban sakuna, Baibil ba smalkanka sat wala kum marikisa, wan wisa: “Raya nani ba ai dahra walisa, witin nani pruaia ba, sakuna pruan nani ba diara tanka sin briras” (Smasmalkra 9:5). Jisas smalkan pruan nani ba kli buan kabia, sakuna baha ba nit apia kaia kan upla nani ba sip pruras sulka kum bri banghwisa kaka (Jan 11:11–​25). Rilidiankam ra upla sulka ba sip pruras smalkisa ki?

■ RUG TAKAIA LAKA SAURKA NANI BA MAPARA AISARAS: Kuntri ailal nani ra serts kum kum nani bara sa, waitna apia kaka mairin nani ai tahkia wal rug taki nani ra yus munisa serts tâ bribia dukyara. Bara gabamint nani ra kat sin taibi munisa ai tahkia wal rug taki uplika nani ra, lâ kat marit takaia ba yabia dukyara. Serts nani rug takaia laka ra saura kulki nani ba kat sin, rilidian tâ uplika nani tuktan nani ra alki rug muni ba mapara aisi banghras. Sakuna, baibil ba dia smalkisa ki? Param wan wisa: “Man nani aimawahkpara! Kan ai maia takras taski laka dauki ba, aidul nani ra ai pura suni mayuni banghwi ba, marit laka sasauhkra nani ba, waitna nani ai tahkia wal taski laka dauki nani ba Gâd king aimaki ba laka ra ai dukya bribia apia” (1 Korint 6:9, 10). Man kakaira sma ki rilidian nani rug takaia laka ba mapara aisi banghwras ba?

Kaina pyua ra dia bila kaikanka bara sa, rilidian nani ma saura saki ba dukyara? Jisas naku kupia krauki win: “Ani dusa ma pain sakras ba, klaki dakbi pauta ra angkisa” (Matyu 7:19). Baku sika, rilidian kuninkira ba klaki dakbi sauhki tikan kabia! Sakuna naha na ahkia bara nahki takbia ki? Param marikan (Reveleshan), sapta 17 bara 18 ra baibil yaprisauhkanka kum ra, ansika ba wankisa.

Rilidian kuninkira ba nahki tnata aimakbia ki?

Lilka ba kaiks. Rug mairin kum daiwan saura kum purara iwi ba. Daiwan saura ba lal 7, bara aringka 10 sin brisa (Param marikan 17:​1–4). Rug mairin ba dia tanka sa ki? Witin ‘naha tasba kingka nani purara karnika alki taibi brisa’. Kwala balyanta kum dimisa, dus kia painkira sat, sat yus munisa, bara pura luan lalahkira sa. Baha purkara sin, sukia laka ra ai daukanka nani ba bak, ‘nisan sut nani ra kunin munisa’ (Param marikan 17:18; 18:12, 13, 23). Baibil ba param wan marikisa naha rug mairka na tasba aiska ra rilidian aipaswanka kum sa. Tanka ba sika, rilidian kumi baman ra lika apia, sakuna ani rilidianka nani ma saura saki banghwi ba lika.

Daiwan saura tara ba tanka ba sika, tasba aiska ra pulitik asla takanka nani ba (Param marikan 17:10–​13).a Rilidian kuninkira ba naha daiwra purara uli, trai munisa maisa kapi, tâ bri witin dia luki ba daukbia dukyara.

Sakuna, tisku pali, diara aihkakira kum takbia: “Aringka 10 daiwan saura brikan kaikram ba mita mairin rugkira [ra] misbara kaiki banghbia, bara witin dia, dia bri ba sut mihta dakbia bara kwala luha swibia; ai wîna tara ba pibia, bara witin ba pauta ni angki sauhki tikbia” (Param marikan 17:16). Ban wina dara walras, pulitik asla takanka nani ba mita rilidian kuninkira ba mapara aiklabi aiska sauhki tikbia. Dia muni baku daukbia ki? Baibil ulbanka ba wan wisa: “Gâd mita witin nani kupia ra mangkan Witin kupia laka daukaia” (Param marikan 17:17). Baku bamna, Gâd mita rilidian kuninkira ra lâ ra dingkaisa, daukanka saurakira nani sut ba Gâd nina ra daukan ba mita. Ai lâka kasak kat dauki bara sin, pulitik asla takanka nani ra yus munaisa naha mairka rugkira na rau munbia dukyara.

Man dia daukaia sma ki rilidian kuninkira ra dia takbia ba man ra mai alkbia apia dukyara? Gâd insalka ba naku aisi wisa: “Bal taks witin ba wina, yang upliki nani” (Reveleshen 18:4; Dawan Bila Lâ Raya Wauhkataya 1986). Nanara ba, rilidian kuninkira ba wina bal takaia pyua sa. Sakuna, anira waia? Gâd ra lukras uplika nani wal lika apia, kan baha nani kaina pyua ba sin bila kaikanka apu banghwisa (2 Tesalonaika 1:​6–9). Yukuwaia pliska kumikira pali ba sika, rilidian rait aihwa ra baman sa. Nahki man rilidian rait aihwa ba pliki sakaia sip sma ki?

Rilidian rait aihwa ba, nahki pliki sakma ki?

Rilidian rait aihwa ba, dia sat ma yamni sakaia sa ki? (Matyu 7:​17.)

Rilidian rait aihwa ba, naha nani daukisa:

■ LATWAN LAKA MARIKISA: Gâd napakanka rait aihwa daukanka nani ba “naha tasba wina apia sa”, witin nani upla ra sat aihka kaikras sa ai kyamka apia kaka ai taya kalatka sat wala ba tawan. Sakuna “pana pana ai walka ra latwan kaikisa” (Jan 13:35; 17:16; Wark nani 10:34, 35). Pana pana ikaia watlikara upla wala nani dukyara pruaia wilin banghwisa (1 Jan 3:​16).

■ GÂD BILA RA KASAK LUKISA: Rilidian rait aihwa ba “upla lâka” smalkras. Witin nani smalkanka ba Gâd wina sa, wibia kaka baibil ba wina sakan sa (Matyu 15:6–9). Dia muni? Kan “ulbanka aiska ba Gâd winka puhbra mita sika, bara baha ba yamni sa upla ra smalkaia bara laui daukaia, swakwanka nani ba wapni daukaia, bara kasakka laka mapara upla ra smalkanka yabaia dukyara” sin (2 Timoti 3:16).

■ PAMALI NANI RA ASLA DAUKISA BARA LÂ YAMNI NANI BA YABAN DAUKISA: Rilidian rait aihwa ba maia waitna nani ra smalkisa witin ai “wîna [ra] latwan kaiki ba baku ai maia mairin ra [...] latwan kaikaia” sa. Baku sin maia mairin nani ra hilp munisa “ai maia waitna ra kulkaia” dukyara. Bara luhpa nani ra smalkisa ‘aisa, yapti nani ra bila walaia’ dukyara sin (Epesus 5:28, 33; 6:1). Baha purkara, ya tâ upla baku wark taki nani ba daukanka aihka painkira kum marikaia sa (1 Timoti 3:​1–​10).

Naha lâka nani sut alki brih daukisa rilidianka kum bara sa ki? Buk kum Holocaust Politics, 2001 manka ra ulbi sakan ba naku ulbi win: “Jehova witniska nani dia smalki bara dauki ba kat upla wala nani ba sin alki brih daukan kaka, [...] upla ailal nani ra ikan ba tasba ra kli takaia apia kan”.

Kasak pali, Jehova witniska nani ba 235 kuntrika ra smalki banghwisa. Sakuna witin nani smalki warkka baman lika daukras, baha lâka smalki ba kat alki brih dauki banghwisa sin. Kupiam buki banghwisna witin nani ra hilp makama, bara nu takma yawan dia daukaia ba wan mayunanka ba Gâd yamni kaikbia dukyara. Nanara ba, baha daukaia pyua sa. Takaski banghpara. Kan rilidian kuninkira tnata aimakanka ba pat baila sa! (Sipanaia 2:​2, 3.)

Jehova witniska nani baibil maisa pahkanka smalki ba dukyara kau nu takan mai daukisa kaka, mai paiwi banghwisna mayara dairiksanka ba ra wauhtaya ulbi blikma.

□ Pramis apukira, God dia yawanra karnapali makabisa ki? wauhkataya ba kum brin ai daukisa.

□ Upla watla kat baibil stadika yabi banghwisma ba dukyara maisi pahkma want sna.

[Ulbanka mina ba]

[Wahya 3 Lilkika ba]

Rilidian kuninkira ba ‘naha tasba kingka nani purara karnika alki taibi brisa’

[Wahya 3 Lilkika ba]

“Bal taks witin ba wina, yang upliki nani”