Lisin 12

Pruya Bara Dia Wan Taki Bangwi Sa?

Prura ba rayaka mapa tani wala sa. Yapan wihra tara kum baku sa (Jan 11:​11-14). Pruan nani ba sip wali bangras, sip kaikras, sip aisaras, sip diara kumira lukras (Eclesiastes 9:​5, 10). Kunin rilidianka ba smalkisa pruan nani ba spirit nani tasbaiara wihbangwisa ai almuka pruan nani ba aikuki iwaia dukiara. Kuna baha apia sa Baibil smalki ba.

Upla nani prui bangwan ba sip hilp wan munras, sip saura sin wan munras. Mayunra tnatka nani bara sakripais upla aihkika nani ba daukisa lukisa naha nani na pruan nani ba yamni kaiki sa. Ban sakuna, naha daukanka tnatka nani na God nakra ra yamni kaikras Sitan kuninka laka nani kum ra ai plamaia brisa. Upla nani prui bangwan bara sin yamni munras, kan witin nani ba ai rayaka apu sa. Pruan nanira sibriaia apia wan pura suni sin mayunaia apia sa. God ra baman wan pura suni mayunaia.​—Matyu 4:10.

Pruan nani ba kli rawi bui bangbia. Kaina piuara, Jehova pruan nanira kli raki bukbia Tasbara paradais kumra iwaia dukiara (Jan 5:​28, 29; Apostel Storka 24:15). God upla nani prui bangwan ba sipsa kli bukaia yawan nani upla kum yapi taim bukaia sip ba baku.​—Mark 5:​22, 23, 41, 42.

Yawan nani prui bangras lukanka ba kunin kum sa, bara Sitan Dibil ba daukan upla ailal kasak kulki sa. Sitan bara ai lasi ka nani upla nanira yan lukisa upla pruan nani spirit ka ba raya bangwisa bara siknis nani bukisa apia kaka pât wala nani. Sitan upla nani ra yaprisauhkan nani apia kaka diara aihka kaikan nani bak kunin munisa. Baku bamna, Jehova latubi sa baha nani upla pruan nani wal aisaya trai kaiki nanira.​—Deuteronomio 18:​10-12.