LISIN 6

¿Upla pruan nani ba dîa bîla kaikanka brisa?

1. ¿Dîa sturi yamni bâra sa upla pruan nani dukiara?

Lasarus ba pruan wina kli buan taim ai lakrika nani wal sa

Jisas Betania Jerusalem lamara kan ba ra wan taim, ai pânika Lasarus ba pruan pat yu walhwal bri kan. Jisas ba Marta Meri aikuki raiti ra wan. Naha mairka wâl ba Lasarus lakrika nani kan. Tisku kan taim, upla ailal witin nani lamara balan. ¡Jisas Lasarus ba pruan wina bukan taim, Marta Maria wal uba lilia ai dara walan! Jan 11:21-24, 38-44 aisi kaiks.

Marta sturi yamni nani ba dukiara lilia ai dara wali kan. Witin lan takan Jehova upla pruan nani ba raiti wina bukbia. Job 14:14, 15 aisi kaiks.

2. ¿Upla pruan nani ba nahki banhwisa?

Diara nani sut Paskanka ba bara Adam ba pruan taim — Gâd ba Adam ra win: “Man ba tasba yuya sma, bamna tasba yuya ra kli tawma.” (BLASI STURKA 3:19.)

Upla ba tasba yuya ni wan paskan (Blasi Sturka 2:7; 3:19). Yawan ba spirit uplika baku heven wina balras kan. Wan wîna tara brisa bara pruya taim pîska kumi sin ban raya kapras. Yawan pruya taim wan lal mabiarka sin pruisa, bara wan lukanka nani ba sin. Baha mita Lasarus raiti wina buan taim diara wiras kan prura ba dukiara, witin ai dara walras kan. Lawana 146:4 bara Smasmalkra 9:5, 6, 10 aisi kaiks.

¿Gâd upla pruan nani ra pauta klahwan ni panis munisa? Baibil ra wisa upla pruan nani ba ai dara walras, baha mita hil pauta smalkanka ba kunin kum sa. Bara Gâd baha smalkanka ba misbara kaikisa. Jehova lukras upla nani ra pauta ni panis munaia. Kau ni, naha lukanka ba Witin mapara saura pali sa. Jirimaya 7:31 aisi kaiks.

3. ¿Upla pruan nani ba yawan wal aisaia sip sa?

Upla pruan ba sturi sip aisaras bara walras (Lawana 115:17). Sakuna insal kum kum ba saura sa. Witin nani ba upla nani ra aisi kunin munisa. Bara upla pruan natka baku takisa (2 Pita 2:4). Jehova saura kaikisa upla pruan nani wal aisaia trai kaiki ba. Kli Smalkanka 18:10, 11 aisi kaiks.

4. ¿Ya nani raiti wina kli bukbia?

Upla kum pruan wina buan ba ra smalkisa ba wina witin mita upla wala nani smalkisa.

Upla pruan milian milian raiti ra banhwi ba kli raya takbia naha tasba ra. Baku sin upla nani Gâd dukiara diara lan takras kan nani ba bubia. Upla saurakira pruan ba sin bubia. Luk 23:43, TNM bara Apastil Nani Sturka 24:15 aisi kaiks.

Raiti wina bubia nani ba Gâd tânka kasak ba lan takbia bara sip kabia Jisas ra kasak luki bîla walaia (Param Marikanka 20:11-13). Naha uplika nani ba diara pain nani daukbia kaka, sip kabia ban kaia ra iwaia naha tasba ra. Jan 5:28, 29, TNM aisi kaiks.

5. ¿Kli buan lâka ba Jehova dukiara dîa wan smalkisa?

Gâd ba ai Luhpia naha tasba ra blikan ba mita upla pruan nani ra bîla kaikanka yaban. Bara kli buan lâka ba wan marikisa Jehova latwanka lâka ba tara sa bara kupia pihnikira sa. Upla pruan nani ba buan kabia taim, ¿ya pali ra kaikan mai daukisa? Jan 3:16 bara Roman 6:23 aisi kaiks.

Kau nu takaia dukiara, Rait pali Baibil ba Dia Smalkisa ki? bukka, sapta 6, 7, bara 10 ba laki kaiks.