Gâd upla ra paradais kum yaban

“KAU diara wala nani sut paskras kan ba tâura, Gâd bui kasbrika pura ba bara tasba ba wal pas paskan.” (Blasi Sturka 1:1.) Naha bîla nani ba upla sut kakaira sa. Baku sin, naha sturka painkira wal Baibil ba wan marikisa Gâd ba karnika sut brisa bara wan Papaskra ba mita diara sut paskan. Baha wina, Baibil ba tânka marikisa piua ailal bilara Gâd tasba na yawan dukiara ridi daukan bara diara sâtka manis sin paskan. Baibil ra naha piua nani ra yua nani mâkisa.

Tasba ra diara kau tara Gâd mita paskan ba sika upla. Pas waitna ba Gâd mita tasba yuya ni paskan. Gâd ai lilka talia kat paskan, naha wiaia want sa waitna ra latwan lâka, sinska lâka bara daukanka painkira wala nani sin yaban. Waitna ba Gâd mita nina kum yaban, Adam, bara paradais kum ra Eden nina bri ba ra mangkan. Baha pliska ba Gâd mita giadin kum baku paskan bara dus mâ auhni sâtka manis bâra kan.

Yu kum, Gâd aitani lukan waitna ba ai maritka bribia. Baha mita, waitna tnaya dusa kum brih pas mairin ba paskan, ai nina Iv bara waitna ra yaban witin ai maritka kabia dukiara. Adam uba lilia takan. Baha mita, sturi painkira kum aisan: “¡Naha lika yang wînki wina wînka sa bara dusi nani wina dusa!” Gâd sin win: “Baku bamna mairin ba dukiara waitna ba ai aisika bara ai yaptika sin swibia, bara ai mairka ra asla prawbia, bara witin nani wal ai tânka brih, wal ai wîna kumi takbia” (Blasi Sturka 2:22-24; 3:20).

Adam bara Iv ba Gâd lâka wâl alki daukaia kan. Pas ba, tasba ba main kaikaia, saumuk mangkaia bara luhpa ailal baikaia kan. Wala ba, giadin dusa sut wina kumi baman piaia apia kan: “Diara yamni bara saura tânka kaikaia dusa mâ ba” (Blasi Sturka 2:17). Witin nani ba naha lâka nani alki daukras kaka, ¿dîa takbia? Witin nani prubia. Naha ba sanska kum kan Gâd ra marikaia Witin ra rispik muni, latwan kaiki kan bara tingkika lâka sin yabi kan. Rait pali naha uplika nani ba ai Papaskra bîla walaia sip kan. Witin nani saurka luha kan, kan Baibil ra wisa: “Gâd kaikan diara nani witin paskan ba sut yamni pali kan” (Blasi Sturka 1:31).

(Blasi Sturka sapta 1 bara 2 wina sakan sa.)