¿Yawan nahki sip sa pamali lilia kum briaia?

¿BAIBIL BA DÎA SMALKISA?

‘¡Yamni pali sa baha uplika nani Gâd bîla wali ba kat dauki ba!ʼ (Luk 11:28, Dawan Bîla.)

¿DÎA YAMNIKA BRISA?

Latwan lâka kasak ba briaia (Epesus 5:28, 29).

Rispik lâka kasak ba (Epesus 5:33).

Pana pana wal asla lâka bribia (Mark 10:6-9).

¿BAIBIL DÎA SMALKI BA KASAK LUKAIA SIP SA KI?

Âu, natka wâl bâra sa:

• Gâd mita pamali lâka ba tâ krikan. Baibil ra wisa Jehova Gâd mita pas waitna bara pas mairin ra marit lâka ra asla prakan (Blasi Sturka 2:18-24). Naha tânka sa pamali lâka ba bâra sa, kan Jehova mita paskan. ¿Naha ba dîa tânka brisa?

  Sampla kum: Plun auhni kum pisma ba ra man nu takan mai daukisa baha pata piakaia dukiara dîa yus munan sapa. ¿Man yaura wih makabi walma ki? ¡Rait apia baha pata piakan uplika ra wih makabi walma!

  Sim natka ra, yawan pamali lilia kum briaia plikisa kaka, Jehova ra plikaia sa; Witin ba pamali lâka Papaskra sa.

• Gâd bui main mai kaikbia. Pamali nani Jehova lâka Baibil ra ba plikisa taim sins lâka marikisa. ¿Dîa muni? ‘Kan Witin main mai kaikisa’ (1 Pita 5:6, 7). ¡Jehova ai kupia aiska ni yawan dukiara lukisa bara ai lâka nani ba piua bani ra yus tara brisa! (Sins Lâka 3:5, 6; Aiseya 48:17, 18).