Samuil ba piua bani Jehova want kan ba kat daukan

Samuil ba tuktan kan piua ba wina, Gâd tintka watla ra iwi bara wark takan. Bahara upla nani ba wih Jehova ra mayuni kan. ¿Nu takan mai daukisa dîa muni Samuil ba bahara iwi kan? Tânka briaia dukiara, witin mamika sturka ba pas kaikbia. Witin nina ba Ana.

Ana ba bibi kum briaia want kan, kuna luhpa sip baikras kan. Ba mita Jehova ra ai pura suni makaban: “Du pali, Jehova, hilp ai muns”. Bara pramis takan: “Luhpa kum baikamna kaka, tintkam watla ra blikamna bahara iwi bara warkkam daukbia dukiara”. Jehova ai pura sunra ba walan, bara las kat Ana bibi kum brin. Nina ba Samuil mâkan. Mani 3 apia kaka 4 bri kan taim, Ana ba ai pramiska kat daukan bara Gâd tintka watla ra brih wan Gâd dukia daukbia.

Prîs tara Gâd tintka watla ra kan ba nina Elí. Ai luhpia waitna wâl bri kan ba, Gâd tintka watla ra wark taki kan, pat waitna almuk nani kan. Gâd tintka watla ra Jehova ra mayuni kan, upla nani bâra kan ba daukanka pain briaia kan. Sakuna Samuil kaikan Elí luhpia nani ba diara saura dauki kan. ¿Samuil sin saurka daukan witin nani baku? ¿Man dîa lukisma?... Apia, Samuil ba Jehova dîa want kan ba kat dauki kan, ai aisika nani dîa smalkan ba baku.

¿Elí dîa daukaia kan? ¿Ai luhpia nani ra lawi daukaia kan?... ¡Âu sika! Elí ba swiaia apia kan witin nani ba tint watla ra wark takaia. Kuna witin diara daukras kan. Baha mita Jehova witin wal praut takan bara ai luhpia nani wal sin, bara klala yabaia lukan.

Tihmia kum, Samuil yapi kan taim, upla witin ra wini kan ba walan. “¡Samuil!”, wi kan. Ba mita witin Elí pliska kat wan, kuna witin win: “Yang mai winras kapri”. Sim sât aima wâl baku takan. Sakuna aima yumhpa takan piua ra, Elí Samuil ra win: “Kli mai winbia walma kaka, wis: ‘Jehova, ai wis. Mai walisna’”. Samuil baha daukan taim, Jehova pana win: “Elí ra wis ai pamalika ra klala yabamna diara saura daukan ba mita”. ¿Samuil mapara isi kan ki naha bîla nani Elí ra wiaia? ¿Dîa lukisma?... Uba karna kan kaia sa. Raitka ba sika Samuil ba, baha sut wiaia sibrin kan. Kuna Jehova bîla walan bara Elí ra bîla nani sut ba win. Piu luan ningkara Gâd dîa win ba takan: Elí bara ai luhpia wâl ba pruan.

Yawan Samuil wina diara ailal lan takaia sip sa. Upla wala nani diara saura daukan ba witin kaikan, kuna witin diara saura daukras kan. ¿Bara man? ¿Samuil baku kama an Jehova bîla wali kama? Daukma kaka, Jehova uba lilia kabia man dukiamra, papikam an mamikam sin.