¿Gâd Kingka lâka ba dîa tânka sa ki?

¿BAIBIL BA DÎA SMALKISA?

“Kasbrika purara Gâdka ba king lâka kum bukbia bara ban kaia ra sauhki tikan kabia apia.” (Daniel 2:44, Dawan Bîla.)

“Yawan ra luhpa waitna kum wankan sa, witin ra king kaia karnika yaban sa.” (Aiseya 9:6.)

¿DÎA YAMNIKA BRISA?

• Gabamint pain kum sa bara yawan kumi bani ra yamni wan munaia sip sa (Aiseya 48:17, 18).

• Tisku pali, tasba raya ra, naha kingka ba daukbia yawan lilia iwbia bara siknis nani ba âpu kabia (Param Marikanka [Apocalipsis] 21:3, 4).

¿BAIBIL DÎA SMALKI BA KASAK LUKAIA SIP SA KI?

Âu, natka wâl bâra sa:

• Jisas marikan Gâd kingka lâka dîa daukbia ba. Jisas ai nina blablikra nani ra marikan naha Kingka lâka dukiara makabaia sa, bara Gâd kupia lâka ba naha tasba ra sin daukbia (Matiu 6:9, 10). Baku sin marikan nahki naha makabanka ba aimakbia.

  Jisas tasba ra kan taim, plun dauki kan nani ra dakakan, upla siknis nani rakan bara upla pruan nani ra kli bukan (Matiu 15:29-38; Jan 11:38-44). Witin ba Gâd Kingka lâka ra King kum kaia kan ba mita, marikaia sip kan ai uplika nani dukiara dîa daukbia ba (Param Marikanka 11:15).

• Tasba aiska ra dîa taki ba marikisa Gâd Kingka lâka ba tisku pali balbia. Jisas win Gâd Kingka lâka naha tasba ra kupia kumi lâka kau brih balras kainara, war aiklabanka nani, plun wahwanka, bara tasba nikbanka ailal bâra kabia (Matiu 24:3, 7).

  Naha trabilka nani ba sut naiwa kaikisa. Baha mita yawan kasak lukaia sip sa Gâd Kingka lâka ba tisku pali trabil nani sut wapnika mangkbia.