¿Yawan nahki Gâd ra mayunaia sa witin yamni wan kaikbia dukiara?

Smalkanka luan ba ra yawan kaikan church kum kum Gâd bui yamni kaikras ba. Sakuna, yawan sip sa wan Papaskra ba ra mayunaia bara witin kupia lilia daukaia. ¿Gâd mapara kristian lâka klin ba ani sa ki? ¿Ani rilidianka witin yamni kaikisa? (Jems 1:27). Kaisa kaikaia Baibil dîa smalki ba.

1. ¿Nahki Gâd ra mayunaia ba yawan nu takaia sip sa?

Gâd ra nahki mayunaia ba Baibil aisi kaiki yawan nu takisa. Jisas Gâd ra naku win: “Man smalkankam bîla ba sika diara kasak pali ba” (Jan 17:17). Baibil ba Gâd bîla pali sika, sakuna rilidian kum kum ba Baibil dîa smalki ba kulkras. Kau ni upla lâka kat, bara upla lukanka kat smalkaia want sa. Jehova witin nani dîa dauki ba yamni kaikras, baha dukiara Baibil wisa “Gâd lâka ba tnaya ra ni swisma” (Mark 7:9 aisi kaikma). Sakuna, Gâd kupia lilia daukaia sip sa Baibil dîa wan smalki ba yawan alki daukisa taim.

2. ¿Nahki tnatka ra yawan Gâd ra mayunaia sa?

Jehova ra baman yawan mayunaia sa kan witin wan paskan bamna (Param Marikan 4:11). Tânka ba sika, witin ra baman yawan latwan kaikaia sa, aidul kum yus munaia apia sa, lilka bara diara wala sin apia (Aiseya 42:8 aisi kaikma).

Jehova ra kasak mayunaia ba lika “holikira prisant yaia sma ba tânka sa” (Roman 12:1). Baha tânka sika, Gâd smalkanka bîla ba kat yawan iwaia sa. Naha luki kaiks, Gâd ra latwan kaiki uplika nani ba tara kulki banhwisa marit lâka dukiara Gâd smalki ba. Baku sin, vicio lâka ba briras, druga bara twaku diras, sîka dih pura luras bara rum dih bla takaia lâka ba sin apia.a

3. ¿Dîa muni upla kasakkira aikuki yawan Gâd ra mayunaia sa ki?

Wik bani aidrubanka nani ba chans wankisa Jehova ra mayuni bara naku wiaia “mayunamni kupi aiskakira, upla wapnikira asla takanka ra” (Lawana Nani 111:1, 2). Lawana aiwanaia ba Gâd ra mayunaia tnatka kum sa (Lawana Nani 104:33 aisi kaikma). Jehova latwan wan kaiki ba mita wan makabisa yawan aidrubaia, kan witin nu sa asla aidrubanka nani hilp wan munbia raya ban kaia lâka ba briaia. Yawan asla aidrubisa taim wala nani ra kupia bukisa, pana sin witin nani wan kupia bukisa.

KAU LAN TAKS

4. Gâd ra mayunaia dukiara lilka bara aidul yawan yus munaia apia sa

LILKA: ¿Gâd want sa ki lilka bara aidul wal witin ra mayunbia? (3:26)

• ¿Patitara piua ra dîa takan Gâd uplika nani ba aidul wal Gâd ra mayunan taim?

Upla kum kum ba lilka bara aidul yus munisa Gâd ra mayunaia dukiara, kan witin nani lukisa baku dauki Gâd wal asla kabia. Sakuna baku daukisa taim, ¿Gâd ra tnaya ra swisa? Impakan Sturka 20:4-6 bara Lawana Nani 106:35, 36 aisi kaikma, bara naha dukiara aisi banhma:

• ¿Man kaikram sa ki dîa sât lilkika bara aidul nani upla yus munisa Gâd ra mayunaia dukiara?

• ¿Baha aidulka nani ba dukiara Jehova dîa lukisa?

• ¿Aidul nani yus munaia dukiara man dîa lukisma?

5. Jehova ra baman yawan mayunisa kaka, kunin lâka ba wina yawan pri kabia

LILKA: Tânka kasak ba pri ai sakan (5:16)

Lawana Nani 91:14 aisi kaikma, bara naha dukiara aisi banhma:

• Yawan Jehova ra latwan kaikbia bara witin ra baman mayunbia kaka, ¿witin dîa pramis wan munisa?

6. Kangrigisan asla aidrubanka nani ra Gâd ra mayuni banhwisa

Kangrigisan wan mihta buki aisisa taim, Jehova ra mayunisa bara pana pana wan kupia bukisa. Lawana Nani 22:22 aisi kaikma, bara naha dukiara aisi banhma:

• Asla aidrubanka nani ra upla nani ai mihta buki aisisa taim, ¿man liliakira walisma?

• ¿Aisanka kum ridi dauki bara asla aidrubanka ra mihtam buki aisaia want sma ki?

7. Yawan dîa lan taki ba upla wala ra smalkaia Jehova yamni kaikisa

Baibil tânka ba upla wala ra smalkaia dukiara tnatka ailal bâra sa. Lawana Nani 9:1 bara 34:1 aisi kaikma, bara naha dukiara aisi banhma:

• Man Baibil wina diara lan takisma ba, ¿upla wala ra dîa wiaia want sma?

DÎA LAN TAKRAM

Wan Papaskra ba ra lilia daukaia sip sa witin ra baman yawan mayunisa taim, kangrigisan asla aidrubanka nani ra mayuni bara upla wala ra yawan dîa lan taki ba smalkisa taim.

Wan kupia krawaia

• Gâd ra mayunaia tnatka witin want ba, ¿yawan nahki lan takaia sip sa?

• ¿Dîa muni Jehova ra baman yawan mayunaia sa?

• ¿Dîa muni Gâd bîla wali uplika nani aikuki yawan Jehova ra mayunaia sa?

KAU PLIKI KAIKS

Aisi kaiks upla sturka nina ba “Aidul albika danh apia sna”, bara lan takma nahki mairin kum pri bara lilia takan aidul nani swin taim.

“Baibil ba upla rayaka chens munisa” (La Atalaya julio 1, 2011)

Tânka pliki kaiks, dîa hilp mai munaia sip sa asla aidrubanka nani ra mihtam buki aisaia.

“Kangrigisan ra Jehova ra mayunpi” (La Atalaya, enero 2019)

Kaiks nahki asla aidrubanka nani ba wahma kum ra hilp munan piua bani dimaia.

Jehova main ai kaikisa (3:07)

Upla ailal dus prihni ba kristian lâka ba wal asla daukisa, sakuna ¿Gâd ra mayunaia dukiara yus munaia sa ki?

“¿Dîa muni Jehova witniska nani ba dus prihni yus munras?” (jw.org ra kaiks)