Tahbi daukan lâka ba: karna trai muns alki briaia

Jisas smalkan upla kum kristian takaia dukiara tahbi daukan lâka ba briaia sa (Matiu 28:19, 20). ¿Sakuna tahbi daukan lâka ba dîa sa ki? ¿Bara upla kum dîa daukaia sa tahbi daukan lâka ba alkaia dukiara?

1. ¿Tahbi daukan lâka ba dîa sa?

Bîla “tahbi daukaia” wi ba, Grik bîla wina bal takisa “rungkaia” lî ba ra. Jordan awala ra Jisas “lî wina taki aula kan” taim, tânka ba sika Jan mita witin ra liura dingki tahbi sakan (Mark 1:9, 10). Jisas ra daukan baku, kristian rait aihwa nani ba liura dimi ai wîna aiska ba upla rungkisa.

2. ¿Upla kum tahbi daukan lâka brisa taim dîa marikisa?

Upla kum tahbi daukan lâka brisa taim, ai rayaka pat Jehova ra yaban ba marikisa. ¿Baha dîa tânka sa? Kau aihtabi takras kainara, upla kum silp ai pura suni Jehova ra wisa ai warkka daukaia want sa ban kaia ra. Uplika ba pramis takisa Jehova ra baman mayunaia bara Gâd kupia lâka daukaia ba lika diara kau tara sa ai rayaka ra. Jisas naha adarka win ba bîla walisa: “Ya yang nini blikan dauki kaka, witin ai wîna ba kulkaia apia sa” (Matiu 16:24). Upla kum ai rayaka yabi bara tahbi daukan lâka brisa taim, sip sa Jehova wal asla pali kaia, bara upla nani Jehova ra mayuni ba wal sin asla takaia.

3. ¿Pas tâura upla kum dîa daukaia sa aihtabi takaia dukiara?

Man ba aihtabi takaia want sma kaka, pas Jehova tânka ba stadi munaia sma bara witin ra kasak lukaia (Hibru Nani 11:6). Kau Baibil tânka brih bara kau kasak lukma taim, Jehova ra kau latwan kaikma. Baku bamna, man want kama sturi yamni nani ba smalkaia bara Baibil lâka bîla nani ba wali daukaia (2 Timoti 4:2; 1 Jan 5:3). Bara Jehova “uplika nani baku” tânka pain brih Baibil dîa wi ba kat dauki kabia taim, ban kra upla kum want kabia Jehova ra ai rayaka yabi tahbi daukan lâka ba briaia (Kolosi 1:9, 10).a

KAU LAN TAKS

4. Jisas ra tahbi daukan sturka ba dîa wan smalkisa

Matiu 3:13-17 aisi kaikma, bara baku kau tânka brima nahki Jisas ra tahbi daukan. Ningkara naha dukiara aisi banhma:

• ¿Jisas ra tahbi daukan taim, witin bibi kan?

• ¿Jisas ra nahki tahbi daukan? ¿Ai lal purara baman lî laikan?

Jisas ba tahbi daukan lâka ba brin ningkara, wark tara Gâd witin ra yaban ba mahka alki daukan. Luk 3:21-23 bara Jan 6:38 aisi kaikma, bara naha dukiara aisi banhma:

• Jisas ba tahbi daukan lâka brin ningkara, ¿ani warkka witin kau tara kulkan?

5. Tahbi daukan lâka ba man alki briaia sip sma

Jehova ra rayakam yabi bara tahbi daukan lâka briaia dukiara lukisma taim, sringkam briaia sip sma. Sakuna man sip sma spirit lainka ra pâwi kaia tahbi daukan lâka mahka briaia lukma kat. Nahki upla kum kum baku daukan sturka ba nu takaia dukiara, LILKA ba kaikma.

LILKA: Nahki Jehova wal pâna lâka briaia (1:11)

Jan 17:3 bara Jems 1:5 aisi kaikma, bara naha dukiara aisi banhma:

• ¿Upla kum ra dîa hilp munbia tahbi daukan lâka briaia dukiara?

1. Wan pura suni wan rayaka ba yabi Jehova ra pramis munisa ai kupia lâka daukbia ban kaia ra

2. Tahbi daukan lâka brisa taim, yawan marikisa wan rayaka Gâd ra pat yaban ba

6. Yawan tahbi daukan lâka ba brisa taim Jehova pamalika tilara dimisa

Yawan tahbi daukan lâka brisa taim, tasba aiska pamalika kum tilara dimisa. Pas taim yawan dîa sât uplika kan bara ani wina kabia kra sin, Jehova witniska tahbi daukan lâka brin nani ba sim smalkanka nani kasak lukisa, bara sim Gâd lâka nani alki daukisa. Lawana Nani 25:14 bara 1 Pita 2:17 aisi kaikma, bara naha dukiara aisi banhma:

• ¿Nahki tahbi daukan lâka ba upla ra yamni munisa Jehova wal asla kaia dukiara, bara Gâd ra mayuni uplika nani wal sin asla kaia?

DÎA LAN TAKRAM

Jisas smalkan upla kum kristian kaia dukiara, liura tahbi daukan kaia sa. Baku takaia dukiara, Jehova ra aihwa kasak lukaia sa, ai lâka bîla walaia bara ai rayaka ba Gâd ra yabaia.

Wan kupia krawaia

• ¿Tahbi daukan lâka ba dîa sa, bara dîa muni diara tara sa?

• ¿Wan rayaka Gâd ra yabaia wihki tahbi daukan lâka ba wal nahki asla sa?

• ¿Upla kum pas tâura dîa daukaia sa ai rayaka Gâd ra kau yabras kainara bara tahbi daukan lâka kau briras kainara?

KAU PLIKI KAIKS

Tahbi daukan lâka tânka ba bris bara baha dukiara upla nahki mistik luki ba sin.

“¿Tahbi daukan lâka ba dîa sa?” (jw.org ra kaiks)

Tnatka kum kum laki kaiks nahki upla kum sip sa spirit lainka ra pâwi tahbi daukan lâka briaia.

“Jehova ra latwan kaiki bara tingki luki ba mita yawan aihtabi takisa” (La Atalaya marzo, 2020)

Aisi kaiks dîa muni waitna kum aihtabi takaia lukan, diara painkira kum sa lukan ba mita baman apia, tara kulkan ba mita wahbi sakan bara daukan.

“Yang silp Baibil tânka kasak ba sakamna ai win” (La Atalaya febrero 1, 2013)

Luki kaiks nahki tahbi daukan lâka alki briaia aitani sa bara man nahki ridi takaia sip sma.

“¿Mahka aihtabi takaia sna?” (Lo que los jóvenes preguntan. Respuestas prácticas [volumen 2], sapta 37)