Isi Smalks
1. Param bara pain smalkaia dukyara dia ba help wan munaia sip sa?
1 Upla ra lan daukuya taim, isi smalkaia ba nit pali takisa. Smasmalkra Kau Tara —Jisas ba— nahki smalkan ba kaiki, sip sa help wan munaia upla ra pain smalkaia (2 Tim. 4:2; Jan 13:13).
2. Isi smalkaia wisi dia ba aman luki kaikaia sa, bara baku smalki ba mita dia takbia ki?
2 Isi Aisas. Jisas il ra smalkan taim, tanka kau kasak, kau tihu, ai kanra waitna wala kumi sin baku smalkras kata ba aisan. Sut ba isi laka ra (Mat. sapta 5-7). Upla kwara kum Jisas ra walata ba “ai smalkanka dukyara [...] ta iwi kan.” Jisas ra priski brihwaia mata blikan kan waitnika nani ba sin, Jisas nahki aisan ba wali ta iwi win: “Baha waitnika aisi ba baku, kau upla kumi sin aisaras sa!” (Mat. 7:28, 29; Jan 7:46). Kasak wan lukbia wisi, yawan upla ai tanka briras bila uba tara nani yus munaia nit apia sa, bara maprika lilka uba yari sin apia. Baibil tanka kasak ba, upla ai tanka bri bila isi yus muni smalkaia sip sa.
3. Diakan kum kum ba tanka uba ailal smalkisa, sakuna baha ra kauhwaia apia wisi dia daukaia sip sa?
3 Aitani Kat Smalks. Nahki pitka yarika smalkaia dukyara Jisas ba, witin ra wali kan nani ra luki kan (Jan 16:12). Yawan sin nit sa ya wal aisi ba kaikaia, bara ba’wina dia pitka yarika aisaia ba selp luki kaikaia. Wan taya nani, kangrigisan ra raya balan nani, bara tuktan nani wal, kau pali nahamuna luki kaikaia nit sa. Upla ai kyama pain mangki wali kabia kra sin, yawan tanka uba ailal wiaia apia sa. Amya tikpara rait kupia yamni bri uplika ba, rait aihwa Gâdka tanka plikaia ba swibia apia (Jan 17:3; 1 Kor.3:6).
4. Tanka uba pura praki sitnika sut aisaia watlika ra, dia muni lal kat smalkaia ba kau pain sa ki?
4 Lal Kat Smalks. Jisas ba smalkanka isi nani ba, uba sturi aisi karna ra lakras kan. Luki kais: “Pruan nani sut [...] raiti wina buan kabia” win taim, pyua apia kan kum kum heven ra, wala nani tasba ra buan kabia ba dukyara Jisas ba baha minitka ra mahka tanka sut smalkaia (Jan 5:28, 29). Sim baku, yawan Baibil stadi yabisa taim, tanka lal kat smalkaia sa. Kuna buk stadi taki ba ra diara tanka wiras pura praki aisaia lika apia.
5. Isi smalkaia ba nahki blis wan munisa?
5 Tingki lukisa, kan Jehova mita yawan dia nu takaia nit kan ba sut isi laka ra wan smalkan! (Mat. 11:25.) Isi smalkaia lan takpi, bara kaikbia wan warkka ma ba uba yamni pali sakan kabia.