Pain smalkaia dukiara natka yumhpa ba
1. ¿Dîa muni wan smalkanka ba kau pain dauki waia sa?
1 Kristian nani sut ba smasmalkra kum sa. Yawan utla utla ra smalkisa, upla ra kli wih kaikisa, apia kaka Baibil stadika nani yabi kabia sin, yawan want sa upla nani ra hilp munaia tânka kasak ba kakaira takaia. Baku natka ra “ulbanka holikira nani” smalki ba upla nani ra hilp munisa ‘sins lâka briaia bara swaki sakan lâka ba sin’ (2 Tim. 3:15). ¡Naha warkka daukaia ba kulkanka tara brisa! Baha mita, pain kabia wan smalkanka ba kau pain daukaia. Kau pain smalkaia dukiara natka yumhpa laki kaikbia.
2. ¿Nahki muni natka isi ra smalkaia sip sa?
2 Natka isi ra smalkaia. Upla nani ra tânka kum smalkisa taim, wan auya tikaia apia sa, uplika baha tânka pain kakaira apia sa. Baha mita, witin mapara diara kum raya sa bara ai tânka briaia ba karna sa. Baibil stadika kum daukisa piua ra tânka ailal smalkaia apia sa. Baha sirka ra, tânka kau tara nani ba smalks. Smalkanka kum pain daukaia dukiara sturi ailal aisaia nit apia sa (S.L 10:19). Baku sin, nit apia sa Baibil tikska nani sut aisi kaikaia, ani nit ba baman. Bara tikska nani ba aisi kaikbia taim, ulbanka lalka dîa tânka mariki ba dukiara aisas. Matiu sapta 5 wina 7 ba kat marikisa Jisas il pura wina aisi smalkan taim natka isi ra daukan bara sturi uba aisaras kan.
3. Smalkaia dukiara, ¿dîa muni maprika lilka nani ba yus tara brisa? Bara, ¿ani sât lilkika nani ba yus munaia kau pain sa?
3 Maprika lilka nani yus muns. Maprika lilka nani ba hilp wan munisa diara nani ba pain lukaia, wan kupia bilara dîa bri ba sakaia, bara wan sinska ra dîa bri ba wan kupia kraukaia. Nit apia sa yawan sturi aisasara pain kum kaia maprika lilka pain kum yus munaia dukiara. Jisas maprika lilka nani yus munan ba ra uba sturi aisaras kan. Bara natka isi ra smalki kan (Mt. 7:3-5; 18:2-4). Natka wala maprika lilka nani hilp wan munaia sip ba lilka isi nani wan mihta ni paski ba. Kaina manis wina pain ridi takbia kaka, pain smalkaia natka nani wan sinska ra balbia.
4. Makabi walanka nani ba, ¿nahki pain yus munaia sip sa?
4 Makabi walanka nani ba pain yus muns. Makabi walanka nani ba stadi tatakra nani ra hilp munisa kau pain luki kaikaia. Baha mita, makabi walanka kum daukisa taim, uplika ansika yabia dukiara wihka bîla kaikan lâka briaia sa. Yawan bui isti ansika yabia kaka, uplika ba dîa ai tânka brin sapa nu âpu kabia. Baku sin, uplika ba ansika saura yaban kaka, minitka ra wiaia apia sa saura aisan. Kau pain kabia makabi walanka wala wal hilp munaia ansika pain kum yabaia (Mt. 17:24-27). Kupiam krauks, smasmalkra kum kasakkira âpu sa. Baha mita, Baibil ba sut ra wan kupia bukisa wan smalkanka ba aman kaikaia sa. Kan naku daukbia kaka, wan rayaka ba swaki sâkbia bara upla nani wan wali banhwi ba sin (1 Tim. 4:16).