Pain wali nani ra pliks
1. Yawan nahki marikisa smalkaia warkka ba tara kulkisa?
1 Smalkaia warkka ba dauki, bara kupia pain nani ra sin maisanihkaia wisi Jisas plis laiura impaki tauki kan (Ais. 61:1, 2). Kraist tawan aisaia blikan uplika baku, yawan wark kulkanka tara bri ba dauki, swap takras, kasak kat upla pain wali nani ra ban plikisa (Mat. 10:11; 2 Kor. 5:20).
2. Pâl plis sat sat ra smalkaia wilin kan ba nahki marikan, bara wilin kan ba mita dia takan?
2 Plis sat sat ra smalks. Apastil Pâl tnatka kan, taun kum ra wih pas pali sinagog ra dimi, Ju nani ra, bara Ju rilidianka ra tawan nani ra sin wih smalkaia (W.n 14:1). Sakuna Pilipai ra wan taim, Pâl Sailas wal, upla ai pura sunaia wi kan pliska kum ra wan. Bara mahka mairin nani bali kan ba ra smalkan. Tila wina mairin kum nina Lidia kan ba sin walan, bara tanka kasak ba ai kupia alkan kristian takan (W.n 16:12-15).
3. Utla utla smalki ba purkara, yawan Gâd warkka dauki dia wala sin daukaia sip sa?
3 Utla utla smalki ba purkara, yawan ba bus, plen, apia kaka upla duri aimakaia bila kaiki pliska nani ra, kirhbaia pliska nani ra, apis nani ra, upla ailal lui yabalka nani ra, bara diara atkaia pliska nani ba ra sin wih smalkaia sip sa. Baku sin sip sa baha pliska nani pain kutbi bri upla dimaia adar apu pliska nani ra, wauhtaya ulbi bliki, apia kaka teleponku smalkaia. Smalkaia warkka ra nitka sat sat taki ba dukyara man sins bri kaiki, nit ba kat diara kum daukaia wilin sma kaka, “Dawan warkka ba kau ban dauki [kaia]” sip kama (1 Kor. 15:58).
4. Wan kangrigisanka ra smalkaia pliska uya apu sa kaka, yawan dia wala sin daukaia sip sa?
4 Smalki tataukra kum kum ra kau daukaia sip munisa. Kum kum ai kuntrika bilara kangrigisan wala ra tauisa. Wala nani sin, bila wala aisi uplika nani ra smalkaia wisi, bila raya kum lan takan sa.
5. Yawan naiwa pyua iwi ba nahki kaikaia sa, bara dia sin daukaia wan kupia ra luki briaia sa?
5 Wan auya tikbiara “nasla ba lika naha tasbaia” sika (Mat. 9:37; 13:38). Bara tasbaia tnatka saura ba tisku dikan kabia ba kaiki, yawan kumi bani wan mihta ra dia dia bri ba wal, smalkaia warkka ra dia kau daukaia sip ba aman luki kaikaia sa. Jehova pramis wan munisa yawan ai Kingka laka pas pliska ra mangkbia sa kaka, witin daukbia wan warkka ba blis munan kabia (Mat. 6:33).