Teleponku smalkaia ba yus tara kaia sip sa
1. Dia muni teleponku smalkaia ba, Gâd warkka dauki taka kum sa?
1 Dia muni teleponku smalkaia trai kaikaia sa? Kan baku daukaia ba upla wala ra tanka kasak ba smalki pri laka bribia help munaia tnatka kum sa (2 Pi. 3:9). Utla utla smalkaia tnatka ba yawan kau dauki kabia sin, ai watla ra apu uplika nani ra pliki sakaia dukyara yawan wilinkira tnatka wala nani yus munaia sa (Mat. 24:14; Luk 10:1-7; Par.m 14:6).
2. Teleponku smalkaia ba nahki asla daukisa?
2 Nahki asla pain daukaia. Utla utla smalkaia baku, teleponku smalkaia pliska sin bak sakisa. Want sma kaka, pliska kum makabi, man yakan, apia kaka smalki tataukra kumi, apia kaka wal aikuki daukaia sip sma. Plis kum bin apu kabia ba ra daukaia sa. Kum kum ba tibil kum purara, smalkaia dukyara buk nani mangki, ba’ kat sir kum ra iwi aisaia yamni kaikisa.
3. Teleponku smalkisa taim dia ba wan auya tikaia apia sa?
3 Dia wiaia, bara nahki wiaia? Razonamiento bukka, Gâd Warkka Dauki, bara Tanka Kasak ba Nu Takan Mai Daukisa ki? wauhkataya nani ra, ta krikan bila nani taki ba help tara kaia sip sa. Pas pali, dia tanka aisaisma ba, wihki ba’ wina dia makabi walma, bara las kat ani tikska aisi kaikma sapa bak sakaia nit sma. Utla utla smalkisma taim, wauhtaya nani brihwisma satka sin yus munaia sip sma. Watla dawanka wal aisama taim, pana baku aisas. Ban kra, pas trip telepon bak smalkisa kaka, kum kum ba ta krikanka bila nani ba aisi kaikisa, kuna pana kum wal aisisa baku aisi kaikaia sa. Baku lika aisi kaikisa ai dara walbia apia. Naha lika ban kupiam krauki bas: Amyapah iws, bara tawa aisas. Pain aisas, wihka bila kaikan laka bris, bara pana baku aisas. Naku daukma ba bilam baikra bak uplika ba param kaikbia. Watla dawan nahki ai lukanka aisi ba aman wals, bara witin aisi ba kulkisma mariks. Aman kaiks prisant wilinkira yabaia ba dahra aisaia apia, kan uplika lukbia telepon bak diara wauhwi atkisma.
4. Teleponku smalkaia ba dia yamnika sakisa?
4 Teleponku smalkaia ba dia yamnika sakisa? Ban kra, upla kum siknis ai watla wina sip takras ba, apia kaka ai warkka mita sip ai watla ra sakras uplika wal sin aisaia sip sa. Kum kum ba upla inipis dimaia sip apia, apia kaka dimaia adar apu pliska nani ra iwisa. Baku bamna, wark kum kau kasak daukaia wisi, aitani sa teleponku smalkaia tnatka ba yus munaia.