Tringsar bila aisi uplika nani ra ta baiki
1. Wan kangrigisanka smalki ba pliska ra dia sanska takaia sip sa ki?
1 Jisas kaina manas win sturi yamni ba tasba aiskara smalkan kabia “kuntri sut baha ba pain kaikbia dukyara”. Naiwa kat, ban ai bila ba karna bara param walisa, smalki bara lan daukaia warkka dauki nani kyama ra (Mat. 24:14; 28:19, 20). Sam taim smalki tauki bara upla tringsar, wan bila sip aisaras wal prawisa. Bamna Jehova yua tara kau balras bara naha uplika nani sin ai raitka brisa Kingka laka sturka ba walaia bara kasak tanka tanira tauaia (Mal. 3:18). Smalki taukisma pliska ra, nahki muni tringsar bila aisi uplika nani ra ta baikma ki?
2. Bila wala aisi uplika wal aisisa taim, nahki marikisa yawan Gâd baku daukisa?
2 Tringsar bila aisi uplika nani ra Jehova kaiki baku kaiki kap. Smalki pliska ra yawan sin upla sut ra nahki Jehova, Witin upla mawan kulkras ba pana baku kaikaia dukyara, nit pali sa rait aihwa want kaia upla ra help munaia tanka kasak ba lan takbia, dia bila aisi kabia sin (Lawana 83:18; W.n 10:34, 35). Wel au, wan kangrigisan ani bila ra smalki ba kau ta baikisa, sakuna tringsar bila aisi nitka nani ra sin lukaia sa, bara tnatka kum pliki sakaia witin nani sin Gâd Kingka laka walbia dukyara. Upla kum bila wala aisi ba tawan kaikras baku pulaia ba Jehova kupia laka wal waras sa, kan Witin bila upla sut ra witnis aisaia sa. Kuna naha uplika ra nahki help munaia sip sa ki?
3. Dia dukya pali wankan sa, bara yus munaia dukyara nahki ridi takisa?
3 Buenas nuevas para gente de todas las naciones wauhkataya ba yus muns. Naha wauhkataya ba ulbi sakan sa help wan munbia dukyara uplika bila tanka briras kaka naha yus munaia sip kabia. Pyu bani wauhkataya na brih tauki bas, bara kau isi kabia dukyara smalkisma pliska ra ani bila nani kau walisma ba wauhtayka ra pliki mark muns. Naha wal sin pain kakaira taks, bara ridi bas yus munaia. Mark munram bila nani ra ulbi sakanka nani bara sa kaka, aitani sa ulbi sakanka kum kum ba brih tauki kama, bara wauhkataya ra dia wi ba aisi kaiki lubia ningkara ulbi sakanka nani ai bila kat brih taukisma ba mihta ra swis.
4. Smalkaia warkka ra Naciones wauhkataya ba nahki yus munisa?
4 Smalkisma bara tringsar bila aisi uplika kum wal prawma kaka, uplika dia bila aisisa sapa nu apia sma kaka, pas taura wauhkataya ba kwaks, bara taya sait ba mariks. Ba’ wina selp mihtam ni man tani kulki, mariks wauhkataya ba ra ani wina sma ba, bara sain muni baku makabi wals witin ani wina, bara dia bila aisisa sapa, wis man nu takaia want sma. Dia bila aisisa nu takma bara, lalka nani wahya ra ba kaiks, sakma taim uplika aisi bila taki wahya pali ba kwaks, ba’ wina pas ulbanka siksa ra taki ba aisi kaikbia mariks. Aisi kaikbia ningkara mihta ra swis ai bila kat wahya sirpi kum apia kaka ulbanka mapla puk baku mangkan ba mariks, baha ra wisa man ba au takisma ulbanka kum ai bila kat brisal yabaia. Ba’ wina siksa ra ulbanka “nini” taki ba mariks, bara ninam pain aisi wis, ningkara mariks siksa ulbanka ba “ninam”, mai wibia bila kaiks. Uplika ra ahkia kli wih kaikaia sip ba dukyara aisas.
5. Bila sat wala aisi kuna walan dauki uplika ra kli wih kaikbia dukyara dia pali ba nit sa daukaia?
5 Upla ra kli wih kaikaia sa. Gâd Kingka laka rait walan dauki nani ra nahki kabia sin trai muns kli wih kaikaia bila sat wala aisi kabia sin. Kuna uplika ba rait aihwa Dawan Bila bara Gâd dahra walan daukisa kaikma kaka, Sírvase visitar (S-43) wahya ba bangki mahka Kangrigisan Aîulbra ra yas, naha na Apis Tara ra blikbia. Apis Tara wina baha bila wark taki uplika nani ra laki yabia. Kangrigisan nani ba bahamuna wahya brisuya wal baku mahka uplika ra plikisa. Baku bara, aitani sa sin Kangrigisan Aîulbra ba Smalki Warkka Pura Kakairika ra ulbanka kopia kum laki yabia. Naha na sip kabia laki kaikaia ani pali bila ra walan daukisa uplika bara sa sapa. Sakuna nu bas, Sírvase visitar (S-43) wahya ba ani taim rait aihwa uplika walan daukisa kaka baman wahya ba yus munaia sa.
6. Upla kum walan daukisa kuna bila sat wala aisi kaka dia wihrika twilkanka brisa ki?
6 Ban sakuna S-43 wahya ba blikan wan ba wina pyu kum luisa ani kat smalki tataukra kum bila aisi lan sakbia wina, uplika ra wih kaikaia blikbia ba kat. Baha mita S-43 wahya ba blikuya bara uplika ra ban kli wih kaiki kap, walan dauki ba daskbia ra sia, sip sa sin Baibil stadika yabi kaia. Sakuna walan dauki uplika ra ai bila kat ulbi sakanka nani yabaia dukyara ani wina sakma ki?
7. Uplika bila aisi ba kat ulbi sakanka nani ba ani wina pliki sakaia sip sa ki?
7 Bila sat wala ra ulbi sakanka nani. Kangrigisan nani ba ulbi sakanka nani bila sat wala ra uba bri kaia apia sa. Sakuna Pura Kakaira ba ani bila pawi auya kaikisa kaka ban kra pain kaikbia kangrigisan ra ma wal kum pan suni bri kaia. Kangrigisan ba ulbi sakanka kumi sin apu kaka aitani sa makabia. Bila sat wala ulbi sakanka nani ba isti wan blikras ba tawan, Smalki Tataukra kum kum ba Internet ra www.watchtower.org, pliska wina dia nit ba saki yus munisa, Smalki Tataukra nani ra, bara walan dauki nani ra sin kasak help munisa ulbi sakanka nani bila sat sat ra pliki sakaia. Rait aihwa naha dukya na —Internet ba— help wan munbia bila sat wala aisi uplika ra help munaia.
8. Bila wala aisi uplika nani bara sa kaka kangrigisan ba dia daukaia sa?
8 Kangrigisan warkka ba. Sam pyua ra tringsar bila kum aisi ba pawisa, sakuna baha bila kat aidrubanka kumi sin apu sa. Baku sa kaka uplika ra wan aidrubanka nani ra paiwaia sa. Baha ra yamni balanka yabi uplika ra sin luki ba kaikbia taim uplika ba pain ai dara walbia bara kau aidrubanka nani ra balaia want kabia. Taura lika ai bila aisi ba tawan bara iwanka tnatka wala ba tawan sin karna munbia, sakuna Jehova Witniska nani aslika laka ba mapara diara kumi apu sa wan takasbia rait aihwa latwanka laka marikaia (Sip. 3:9; Jan 13:35). Man bila wala kum pain aisisma ki? Baha bila sat aisisma uplika ra wih kaikaia want sma ki? Baku kaka, Kangrigisankam Aîulbra ra nu muns, bara witin ba Apis Tara ra blikbia. Dia ulbi mangki blikram ba aitani sa kan Apis Tara ra laki kaiki taim anira nit bara blikisa.
9. Bila aisanka wala nani kulka ba ahkia taim raitka brisa daukaia bara nahki sin daukaia sa ki?
9 Bila wala lan takaia kulka nani ba. Bila sat wala aisi uplika ra help muni bara, pain kabia wiaia sip kaka aidrubanka nani ai bila kat dauki bara wabia. Baha sip apia pali kaka, uplika ra help munaia dukyara smalki tataukra kum kum ba bila ba lan takaia trai munisa. Kangrigisan kum lamara apu sa kaka, sakuna bila wala aisi uplika ailal bara sa kaka, Apis Tara ba sip sa au takaia bila nani ba lan takaia dukyara kulka nani daukaia. Baku sa kaka, Apis Tara ba wina baha bila aisi lamara kangrigisanka nani ra nu munbia nitka bara ba dukyara baku sin makabia kangrigisan ra maisapahkanka kum aisi kaikbia bila wala lan takaia dukyara kulka dauki ba dahra. Ya nani kulka dimaia want makabi ba lukanka bri waia sa daknika wal wark takaia, apia kaka baha bila aisi kangrigisanka ra tauaia, tasba piska pain asla daukaia dukyara ta baikaia bara help munaia.
10. Ahkia taim tringsar bila aisi daknika kum paskaia sip sa, bara dia bapanka nani pas laki kaikaia sa ki?
10 Dakni kum paskaia dukyara. Bila sat wala aisi daknika kum paskaia dukyara diara walhwal nit pali sa: 1) Rait aihwa walan dauki pawaia sip uplika aitani bara kaia sa. 2) Bila aisi lan smalki tataukra ap kum bara kaia sa playka baku apia kaka bila lan taki kaia. 3) Tilara sin almuk kum apia kaka help mamunra napakanka lankira kum bara kaia sa, daknika ta briaia dukyara bara daknika bila aisi ba kat wik bilara aidrubanka kum pan sakaia. 4) Almuk daknika kum sin bara kaia sa naha nani ba daknika paskan bara ta baikaia dukyara sa. Naha bapanka walhwal laki kaikan ba aihkika sut daukisa kaka, almuk daknika ba Apis Tara ra daknika tanka sut ulbi lakisa, bara sin kangrigisan baku makabisa tringsar bila aisi daknika lalka baku kaia (Organizados bukka, wahya 106,107 laki kaiks). Daknika almukka ba apia kaka help mamunra napakanka ta bri auya ba ra “dakni pura kakaira ba” apia kaka “dakni help mamunra ba” makbia, bara ai warkka kabia daknika bilara dia nitka bara sa kaka laki kaikaia.
11. Dia muni uba tara sa kangrigisan smalki ba pliska ra tringsar bila aisi uplika ra help munaia?
11 Kangrigisan smalki ba pliska ra bila tringsar aisi uplika ra help munaia ba uba tara sa, kan Jisas Kraist ba naha sat warkka ba ta krikan. Yawan sut lilia wan warkka daukaia want sa kau Jehova mita nisan nani ra nikbi, bara ai dukya kukan nani brih param takbia yabi bara (Hag. 2:7). Rait lilia wan sakisa naha warkka ra wan kupia aiska ni wan mihta dingkaia! Jehova blis wan munbia sika, wan kangrigisanka smalki pliska ra bila tringsar aisi uplika ra help muni ba tawan. Amya tiwbiara, tringsar bila nani ba wan takaski kabia kra sin, Jehova pawbia daukaia sip sa! (1 Kor. 3:6-9.)